Umar Khalid & Sharjeel Imam’s case update: دہلی فسادات معاملہ:5 سال سے زائد عرصے سے جیل میں قید عمر خالد اور شرجیل امام کی درخواست ضمانت پر فیصلہ محفوظ

سپریم کورٹ نے فروری 2020 کے دہلی فسادات سے متعلق یو اے پی اے کیس میں جے این یو طالب علم عمر خالد، شرجیل امام اور دیگر ملزمان کی ضمانت کی درخواستوں پر بدھ کو اپنا فیصلہ محفوظ کر لیا ہے۔ جسٹس اروند کمار اور جسٹس این وی انجاریا کی بنچ نے سالیسٹر جنرل تشار مہتا، ایڈیشنل سالیسٹر جنرل ایس وی راجو، سینئر وکیل کپل سبل، ابھیشیک سنگھوی، سدھارتھ ڈیو، سلمان خورشیداور سدھارتھ لوتھرا کے دلائل سنے۔

دہلی پولیس نے عمر، شرجیل اور دیگر ملزمان کی ضمانت کی درخواستوں کی سختی سے مخالفت کی

دہلی پولیس نے عمر، شرجیل اور دیگر ملزمان کی ضمانت کی درخواستوں کی سختی سے مخالفت کرتے ہوئے کہا کہ فروری 2020 کے فسادات بے ساختہ نہیں تھے بلکہ یہ بھارت کی خودمختاری پر حملہ کرنے کے لیے پہلے سے سوچے سمجھے کیے گئے تھے۔عمر، شرجیل اور دیگر ملزمان کے خلاف غیر قانونی سرگرمیاں (روک تھام) ایکٹ 1967، اور اس وقت کے تعزیرات ہند (آئی پی سی) کی دفعات کے تحت مقدمہ درج کیا گیا تھا۔ ان پر 2020 کے فسادات کے ماسٹر مائنڈ ہونے کا الزام ہے، جس میں 53 افراد ہلاک اور 700 سے زیادہ زخمی ہوئے تھے۔

شہریت ترمیمی قانون (سی اے اے) اور نیشنل رجسٹر آف سٹیزن (این آر سی) کے خلاف بڑے پیمانے پر احتجاج کے دوران تشدد پھوٹ پڑا۔ ملزمان نے فروری 2020 کے فسادات کی بڑی سازش سے متعلق کیس میں ضمانت دینے سے انکار کرنے والے دہلی ہائی کورٹ کے 2 ستمبر کے حکم کو چیلنج کرتے ہوئے سپریم کورٹ سے رجوع کیا تھا۔

شرجیل امام نے بھی سپریم کورٹ کے سامنے اپنی ناراضگی کا اظہار کیا تھا

واضح رہے کہ اس سے پہلے دہلی فسادات کیس میں گرفتار شرجیل امام نے بھی سپریم کورٹ کے سامنے اپنی ناراضگی کا اظہار کیا  تھا۔ انہوں نے کہا تھا کہ  انہیں بغیر کسی مقدمے یا سزا کے ایک ’’خطرناک دانشور دہشت گرد‘‘ قرار دیا گیا ہے۔ شرجیل نے سینئر وکیل سدھارتھ دوے کے ذریعے سپریم کورٹ میں اپنا کیس پیش کیا تھا۔ انہوں نے کہا تھا کہ، ’’میں یہ بتانا چاہوں گا کہ میں دہشت گرد نہیں ہوں، جیسا کہ مدعا علیہان (پولیس) نے دعویٰ کیا ہے۔ میں ملک مخالف نہیں ہوں، جیسا کہ حکومت نے دعویٰ کیا ہے۔ میں اس ملک کا شہری ہوں،  مجھے اب تک کسی جرم میں سزا نہیں ہوئی ہے۔‘‘

ملزمان پر ماسٹر مائند ہونے کا الزام

عمر خالد، شرجیل امام، گلفشہ فاطمہ، میران حیدر، اور رحمن پر یو اے پی اے اور تعزیرات ہند کی دفعات کے تحت 2020 کے فسادات کے ’ماسٹر مائنڈ‘ ہونے کا الزام ہے، جس میں 53 افراد ہلاک اور 700 سے زیادہ زخمی ہوئے تھے۔ یہ تشدد شہریت ترمیمی ایکٹ (سی اے اے) اور نیشنل رجسٹر آف سٹیزنز (این آر سی) کے خلاف زبردست مظاہروں کے دوران پھوٹ پڑا تھا۔

بھارت ایکسپریس اردو۔