Priyanka Gandhi on Amit Shah’s speech: پرینکا گاندھی نے وزیر داخلہ امت شاہ کی تقریر پر کی سخت تنقید، کہا-’’حکومت پر شبہات مزید گہرے ہورہے ہیں‘‘

نئی دہلی: کانگریس کی رکن پارلیمنٹ پرینکا گاندھی واڈرا نے بدھ کے روز لوک سبھا میں انتخابی اصلاحات پر ہونے والی بحث کے دوران مرکزی وزیر داخلہ امت شاہ کی تقریر کو شدید تنقید کا نشانہ بنایا۔ انہوں نے الزام لگایا کہ ’ووٹ چوری‘ کے الزامات پر شاہ کی ڈیڑھ گھنٹے کی وضاحت خود یہ ثابت کرتی ہے کہ حکومت پر شبہات مزید گہرے ہورہے ہیں۔

’’اگر کوئی بےگناہ ہو تو اتنی لمبی وضاحت دے گا؟‘‘

میڈیا سے گفتگو کرتے ہوئے پرینکا گاندھی نے کہا: ’’ڈیڑھ گھنٹے تک وہ بس یہی وضاحت دیتے رہے کہ انہوں نے ووٹ چوری نہیں کی۔ اگر کوئی بےگناہ ہوتا تو کیا وہ اتنی لمبی وضاحت دیتا؟‘‘ ان کا یہ بیان اس وقت سامنے آیا جب امت شاہ نے انتخابی اصلاحات پر بحث کے دوران مفصل جواب دیا اور اپوزیشن کے مختلف الزامات کے جواب پیش کیے۔

لوک سبھا میں امت شاہ اور راہل گاندھی کے درمیان نوک جھونک

اس سے قبل انتخابی اصلاحات کے مسئلے پر امت شاہ اور راہل گاندھی کے درمیان پارلیمنٹ میں سخت الفاظ کا تبادلہ ہوا۔ راہل گاندھی نے شاہ کو ان کی تین پریس کانفرنسوں کے نکات پر کھلی بحث کا چیلنج دیا، جس پر وزیر داخلہ نے جواب دیا کہ ’’پارلیمنٹ ان کی مرضی سے نہیں چلے گی۔‘‘ بحث کے دوران شاہ نے اپوزیشن پر الزام لگایا کہ وہ اسپیشل انٹینسیو ریویژن (SIR) جیسی ضروری کارروائی کی بھی مخالفت کر رہی ہے۔ شاہ نے کہا: ’’آپ کی ہار طے ہے، اس میں ووٹر لسٹ کا کوئی کردار نہیں۔ جب آپ جیتتے ہیں تو الیکشن کمیشن بہترین ہوتا ہے اور جب ہارتے ہیں تو بی جے پی کا ایجنٹ؟ یہ دہرا معیار جمہوریت میں نہیں چلے گا۔‘‘

’’بحث کرنی ہے تو میری پریس کانفرنسوں پر کریں‘‘

راہل گاندھی نے امت شاہ کی تقریر میں مداخلت کرتے ہوئے کہا کہ وہ انتخابی کمشنرز کو مکمل تحفظ دینے کے پیچھے حکومت کی نیت جاننا چاہتے ہیں۔ انہوں نے کہا کہ ہریانہ سمیت کئی ریاستوں میں لاکھوں فرضی ووٹر درج ہیں اور اس پر بحث ہونی چاہیے۔ انہوں نے امت شاہ سے براہ راست کہا: ’’امت شاہ جی میں آپ کو چیلنج دیتا ہوں کہ میری تین پریس کانفرنسوں پر کھل کر بحث کریں۔‘‘

امت شاہ کا سخت موقف اور اپوزیشن کا واک آؤٹ

امت شاہ نے واضح کیا کہ وہ اپنی تقریر کے طریقۂ کار اور ترتیب کا فیصلہ خود کریں گے اور اپوزیشن کو صبر سے سننا چاہیے۔ انہوں نے کہا: ’’آپ ہٹ دھرمی سے پارلیمنٹ نہیں چلا سکتے۔ میں ہر سوال کا جواب دوں گا، مگر اپنی ترتیب سے۔‘‘ شاہ کے جواب کے دوران اپوزیشن کے اراکین پارلیمنٹ نے ایوان سے واک آؤٹ کیا۔ بعد ازاں لوک سبھا کی کارروائی 11 دسمبر صبح 11 بجے تک کے لیے ملتوی کر دی گئی۔

بھارت ایکسپریس اردو۔