Sardar Patel was not given adequate respect: ’’سردار پٹیل کو وہ احترام نہیں دیا گیا جس کے وہ مستحق تھے‘‘ وزیرداخلہ امت شاہ نے کانگریس کو بنایا نشانہ، کہا-وزیراعظم مودی نے سردار پٹیل کے خواب کو مجسم کردیا

مرکزی وزیر داخلہ امت شاہ نے جمعہ کے روز کہا کہ ملک کے پہلے وزیر داخلہ سردار ولبھ بھائی پٹیل کو اُس وقت کی کانگریس حکومت سے وہ عزت نہیں ملی جس کے وہ مستحق تھے۔ انہوں نے بتایا کہ سردار پٹیل کو ’’بھارت رتن‘‘ اعزاز ملنے میں اکتالیس سال کی تاخیر ہوئی۔

’’وزیراعظم نے بنایا اتحاد کی علامت — اسٹچیوآف یونٹی‘‘

اتحاد کے قومی دن (National Unity Day) کے موقع پر امت شاہ نے وزیراعظم نریندر مودی کو خراج تحسین پیش کرتے ہوئے کہا کہ سردار پٹیل کے اعزاز میں ’اسٹیچو آف یونٹی‘ کا تصور اور اس عظیم یادگار کی تعمیر مودی جی کی قیادت میں ہی ممکن ہوئی۔ امت شاہ نے کہا: ’’سردار ولبھ بھائی پٹیل کو اُس وقت کی کانگریس حکومت نے مناسب احترام نہیں دیا۔ انہیں بھارت رتن دینے میں 41 برس لگے اور ملک میں ان کے نام پر کوئی یادگار نہیں بنائی گئی۔ صرف نریندر مودی نے گجرات کے وزیراعلیٰ کے طور پر، اسٹیچو آف یونٹی کا تصور پیش کیا اور ان کے اعزاز میں ایک شاندار یادگار تعمیر کی۔‘‘

’’جدید ہندوستان سردار پٹیل کی بصیرت کا نتیجہ ہے‘‘

دہلی میں منعقدہ ’رن فار یونٹی‘ (Run for Unity) پروگرام کے دوران امت شاہ نے سردار پٹیل کو خراج عقیدت پیش کیا۔ انہوں نے کہا کہ آج کا جدید ہندوستان پٹیل کی بصیرت، فیصلے اور کوششوں کا نتیجہ ہے۔ ان کا کہنا تھا: ’’آزادی کے بعد برطانوی حکومت ملک کو 562 ریاستوں میں تقسیم کرکے جانا چاہتی تھی، مگر سردار پٹیل نے قلیل مدت میں تمام ریاستوں کو ایک لڑی میں پرونے کا عظیم کارنامہ انجام دیا۔ آج جو متحد ہندوستان کا نقشہ ہم دیکھتے ہیں، وہ سردار پٹیل کے عزم اور بصیرت کا عکس ہے۔‘‘

’’سردار پٹیل کے خواب کو مودی نے پورا کیا‘‘

امت شاہ نے کہا کہ وزیراعظم نریندر مودی نے دفعہ 370 کو منسوخ کرکے کشمیر کو ہندوستان کے ساتھ مکمل طور پر جوڑ دیا، جو سردار پٹیل کے خواب کی تکمیل ہے۔ ’’کشمیر کو بھارت کے ساتھ یکجا کرکے مودی جی نے سردار پٹیل کے عزم کو پورا کیا۔‘‘

کسانوں کی خدمت سردار پٹیل کی زندگی کا مقصد

امت شاہ نے سردار پٹیل کے مجسمے پر پھول نچھاور کرتے ہوئے انہیں کسانوں کا ہمدرد اور قومی اتحاد کی علامت قرار دیا۔ انہوں نے ایک پوسٹ میں لکھا: ’’یوم پیدائش کے موقع پر میں مرد آہن سردار ولبھ بھائی پٹیل کو خراج عقیدت پیش کرتا ہوں، جو قومی یکجہتی، سالمیت اور کسانوں کے بااختیار بنانے کی علامت ہیں۔ سردار صاحب نے ریاستوں کو جوڑ کر ملک کی سلامتی کو مضبوط کیا اور کسانوں، محروم طبقات اور پسماندہ لوگوں کو تعاونی تحریکوں سے جوڑ کر خودکفالت کی راہ دکھائی۔‘‘ انہوں نے مزید کہا کہ ’’سردار پٹیل کی سوچ تھی کہ ملک کی ترقی کی بنیاد کسانوں کی خوشحالی میں ہے۔‘‘

 اتحاد کو قائم رکھنا ہر محب وطن کا فرض ہے

آخر میں امت شاہ نے کہا کہ جس اتحاد کی بنیاد سردار پٹیل نے رکھی، اسے برقرار رکھنا ہر شہری کا قومی فریضہ ہے۔ ’’یہ ہر محب وطن کی ذمہ داری ہے کہ وہ اس قوم کی حفاظت کرے جسے سردار پٹیل نے عدل و اتحاد کے اصولوں پر استوار کیا۔‘‘

بھارت ایکسپریس اردو۔