Rohit Shetty firing case: روہت شیٹی کے گھر پر فائرنگ کے معاملے میں آئی ایم پی پی اے کا وزیراعلیٰ دیویندر فڑنویس کو خط، فوری مداخلت کی اپیل

ممبئی: انڈین موشن پکچر پروڈیوسرز ایسوسی ایشن (آئی ایم پی پی اے) نے مہاراشٹر کے وزیراعلیٰ دیویندر فڑنویس کو خط لکھ کر فلمی صنعت میں پھیلے خوف اور عدم تحفظ پر گہری تشویش کا اظہار کیا ہے اور معروف ہدایت کار روہت شیٹی کے گھر فائرنگ کے واقعے میں فوری مداخلت کی اپیل کی ہے۔ ایسوسی ایشن نے وزیراعلیٰ سے مطالبہ کیا کہ معاملے میں فوری، مکمل اور شفاف تحقیقات کو یقینی بنایا جائے اور روہت شیٹی، ان کے اہل خانہ اور پوری انٹرٹینمنٹ انڈسٹری کو مناسب سکیورٹی فراہم کی جائے۔ آئی ایم پی پی اے کے صدر ابھئے سنہا نے خط میں کہا کہ روہت شیٹی نے بھارتی سنیما میں نمایاں خدمات انجام دی ہیں اور ہمیشہ سماجی و قومی مفاد میں سرگرم رہے ہیں، اس لیے ان کے گھر پیش آنے والا واقعہ انتہائی تشویشناک ہے۔ انہوں نے کہا کہ اس واقعے کے بعد فنکاروں، پروڈیوسرز، ٹیکنیشنز اور دیگر وابستگان میں خوف کی فضا پیدا ہوگئی ہے، جس کو ختم کرنے کے لیے سخت اقدامات ضروری ہیں۔

فائرنگ کی تفصیلات اور دھمکی

یہ واقعہ یکم فروری کی آدھی رات کو پیش آیا جب روہت شیٹی کی نو منزلہ عمارت ’’شیٹی ٹاور‘‘ کی پہلی منزل، جہاں ان کا ذاتی جم موجود ہے، پر کم از کم پانچ راؤنڈ فائرنگ کی گئی۔ ایک گولی جم کی کھڑکی کے شیشے سے ٹکرائی تاہم کوئی جانی نقصان نہیں ہوا۔ اطلاعات کے مطابق لارنس بشنوئی گینگ سے وابستہ شبھم لونکر نے سوشل میڈیا پر اس حملے کی ذمہ داری قبول کرتے ہوئے دھمکی دی کہ آئندہ گولیاں نشانہ بنا سکتی ہیں۔

پولیس کارروائی اور مکوکا کا اطلاق

ممبئی پولیس کی کرائم برانچ معاملے کی تفتیش کر رہی ہے۔ تحقیقات کے دوران اسلحہ سپلائر آسارام کا تعلق بشنوئی گینگ سے پایا گیا، جو مبینہ طور پر گیراج مکینک کی آڑ میں کام کر رہا تھا، جبکہ مرکزی شوٹر تاحال مفرور ہے۔ پولیس نے گرفتار ملزمان کے خلاف مہاراشٹر کنٹرول آف آرگنائزڈ کرائم ایکٹ (مکوکا) کے تحت مقدمہ درج کیا ہے۔ عدالت نے پانچوں ملزمان کو 17 فروری تک پولیس تحویل میں بھیج دیا ہے۔ فلمی صنعت نے امید ظاہر کی ہے کہ وزیراعلیٰ کی مداخلت سے نہ صرف تحقیقات میں تیزی آئے گی بلکہ مستقبل میں ایسی وارداتوں کی روک تھام بھی ممکن ہوگی۔

بھارت ایکسپریس اردو۔