Kalimul Hafeez on Pakistan: معروف دانشورکلیم الحفیظ نے پاکستان کوسبق سکھانے کی اپیل کی

نئی دہلی: معروف دانشور، ماہرتعلیم اورسیاست داں کلیم الحفیظ نے کہا کہ پہلگام دہشت گردانہ حملے کے بعد سے مسلمانوں میں زبردست ناراضگی ہے۔ باربارپاکستانی دہشت گرد آتے ہیں اور معصوم ہندوستانیوں کا قتل کردیتے ہیں، اس لئے ہم چاہتے ہیں کہ بھارت سرکارپاکستان کواس بارایسا سبق سکھائے، جس سے پاکستانی دہشت گردوں کی آئندہ نسلیں بھی ہندوستان کی طرف آنکھ اٹھاکردیکھنے کی بھی ہمت نہ کر سکیں۔ انہوں نے ساتھ ہی سوال اٹھایا کہ پہلگام ہندوستان میں موجود ہے اورسرحد سے کافی دوری پرہے۔ آخرپاکستان کے چاریا دہشت گرد کیسے ہندوستان میں داخل ہوگئے اورواردات کوانجام دینے کے بعد کیسے واپس چلے گئے اوراب تک وہ گرفتارنہیں ہوسکے ہیں۔ آخریہ کس ایجنسی کی غلطی ہے اورحکومت نے ان کے خلاف کیا کارروائی کی۔ اس پرحکومت کو جواب بھی دینا چاہئے۔ اس لئے سرحد پارکے دہشت گردوں کوبھی منہ توڑدیا جائے اورہمارے یہاں جن کی ناکامی سے اتنا بڑا حادثہ ہوا ہے، ان کی جوابدہی بھی طے کی جائے۔

  کلیم الحفیظ نے پاکستان کے خلاف ہندوستانی حکومت کی طرف سے کی گئی مختلف طرح کی کارروائی پرجواب دیتے ہوئے کہا کہ یہ سب ٹھیک ہے، لیکن یہ ناکافی ہے۔ انہوں نے کہا کہ اس طرح کی کارروائیوں سے ابھی کچھ اثرنہیں ہوگا۔ پاکستان کواسی کی جواب میں آپ کو جواب دینا ہوگا۔ وزیراعظم مودی کواب بڑا قدم اٹھانا ہوگا۔ یوٹیوب چینل کوبند کرنے، پاکستانی عوام کوواپس بھیج دینے سے کچھ نہیں ہوگا۔ انہوں نے کہا کہ پہلگام میں دہشت گردوں کا مقصد تھا کہ اسلام اورمسلمانوں کے خلاف ملک میں نفرت کا ماحول پیدا ہوجائے۔ جبکہ اسلام میں اس کی کوئی جگہ نہیں ہے اورمسلمان اس کے بالکل خلاف ہیں۔