Rahul Gandhi On Satara Doctor Suicide Case : ’یہ خودکشی نہیں، ادارہ جاتی قتل ہے‘! راہل گاندھی نے مہاراشٹر کے ستارا میں خاتون ڈاکٹر خودکشی معاملے میں حکومت کو بنایا نشانہ

کانگریس لیڈر راہل گاندھی نے مہاراشٹر کے ستارا ضلع میں ایک سرکاری خاتون ڈاکٹر کی مشتبہ موت پر ریاستی حکومت پر سخت حملہ کیا ہے۔ انہوں نے کہا کہ ’’یہ خودکشی نہیں ہے بلکہ ایک ادارہ جاتی قتل‘‘ ہے جو بی جے پی حکومت کے ’’بے رحم اور بے حس‘‘ رویے کو بے نقاب کرتا ہے۔

کیا ہے پورا معاملہ؟
یہ ڈاکٹر جو کہ اصل میں بیڈ ضلع کی رہنے والی تھی، مہاراشٹر کے ستارا ضلع کے ایک سرکاری اسپتال میں کام کرتی تھی۔ جمعرات کی رات اس کی لاش پھلٹن قصبے کے ایک ہوٹل سے لٹکی ہوئی ملی۔ اس کی ہتھیلی پر لکھے سوسائڈ نوٹ میں اس نے لکھا ہے کہ پولیس سب انسپکٹر گوپال بدانے نے اس کے ساتھ متعدد بار جنسی زیادتی کی، جبکہ سافٹ ویئر انجینئر پرشانت بنکر نے اسے ذہنی طور پر ہراساں کیا تھا۔

راہل گاندھی نے کہا- ‘یہ خودکشی نہیں، ادارہ جاتی قتل ہے’
راہل گاندھی نے سوشل میڈیا پلیٹ فارم ’ایکس‘ پر اپنے پیغام میں لکھا کہ ’’مہاراشٹر کے ستارا میں عصمت دری اور ہراسانی سے تنگ آ کر ایک خاتون ڈاکٹر نے خودکشی کر لی۔ یہ کسی بھی مہذب سماج کی روح کو جھنجھوڑ دینے والا واقعہ ہے۔ ایک ہونہار ڈاکٹر بیٹی، جو دوسروں کو زندگی دینے کا عزم رکھتی تھی، اسی نظام کے ہاتھوں جان گنوا بیٹھی جو اسے انصاف دینے والا تھا‘‘۔

اہل خانہ نے سزائے موت کا مطالبہ کیا
ڈاکٹر کی آخری رسومات جمعہ کی رات بیڈ ضلع کی وڈوانی تحصیل میں عمل میں آئی۔ اہل خانہ کا الزام ہے کہ ڈاکٹر نے کئی بار ہراساں کرنے کی شکایت کی لیکن کسی نے توجہ نہیں دی۔ ایک رشتہ دار نے بتایا کہ سیاسی شخصیات نے ان پر پوسٹ مارٹم رپورٹ تبدیل کرنے کے لیے دباؤ ڈالا۔ اس نے کئی بار شکایت کی لیکن کوئی کارروائی نہیں ہوئی۔

دونوں ملزمین گرفتار
پولیس نے اس معاملے میں سب انسپکٹر گوپال بدانے اور سافٹ ویئر انجینئر پرشانت بنکر کو گرفتار کیا ہے۔ دونوں کے خلاف عصمت دری اور خودکشی کے لیے اکسانے کا مقدمہ درج کیا گیا ہے۔ سب انسپکٹر گوپال بدانے نے ہفتہ کی شام پھلٹن دیہی پولیس اسٹیشن میں خود کو سپرد کیا۔ اس سے پہلے ہفتہ کی صبح پولیس نے سافٹ ویئر انجینئر پرشانت بنکر کو پونے سے گرفتار کیا تھا۔ ڈاکٹر کی موت نے نہ صرف ملزم پی ایس آئی گوپال بدانے اور پرشانت بنکر کی بربریت کو بے نقاب کیا بلکہ اس میں ملوث بدعنوان عناصر کو بھی بے نقاب کیا ہے۔

بھارت ایکسپریس اردو