Rahul Gandhi To Visit Indore: اندور کے دورے پر راہل گاندھی، آلودہ پانی سے اموات کے بعد متاثرہ خاندانوں سے کریں گے ملاقات،سی ایم موہن یادو بولے لاشوں پر سیاست کر رہی ہے کانگریس

لوک سبھا میں قائد حزب اختلاف راہل گاندھی ہفتہ کو مدھیہ پردیش کے شہر اندور کے دورے پر پہنچ رہے ہیں، جہاں وہ آلودہ پانی کے باعث ہونے والی متعدد اموات کے بعد متاثرہ خاندانوں سے ملاقات کریں گے۔ مدھیہ پردیش کانگریس کمیٹی کی جانب سے جاری بیان میں تصدیق کی گئی ہے کہ راہل گاندھی اس المناک واقعے سے متاثر خاندانوں کے ساتھ اظہارِ یکجہتی کے لیے ان سے ملاقات کریں گے۔کانگریس کے رکن پارلیمنٹ راہل گاندھی ہفتہ کی صبح تقریباً ساڑھے گیارہ بجے اندور پہنچیں گے۔ اپنے دورے کے دوران وہ سب سے پہلے بمبئی اسپتال جائیں گے، جہاں آلودہ پانی پینے سے بیمار ہونے والے مریضوں کی عیادت کریں گے۔ اس کے بعد وہ متاثرہ علاقے بھاگیرتھ پورہ کا دورہ کریں گے اور وہاں مقامی لوگوں اور متاثرہ خاندانوں سے ملاقات کریں گے۔

راہل گاندھی کے دورے کے دوران کانگریس پارٹی آلودہ پانی کے مسئلے پر ریاستی حکومت کے خلاف احتجاج بھی کرے گی۔ مدھیہ پردیش کانگریس کے صدر جیتو پٹوارى اور اسمبلی میں قائد حزب اختلاف اُمنگ سنگھار کی موجودگی میں یہ احتجاجی مظاہرہ کیا جائے گا۔ پارٹی کا کہنا ہے کہ یہ احتجاج متاثرین کو انصاف دلانے اور حکومت کی ذمہ داری طے کرنے کے لیے کیا جا رہا ہے۔

مدھیہ پردیش کانگریس میڈیا سیل کے مطابق، پورے صوبے میں ریاست گیر سطح پر احتجاجی مظاہرے منعقد کیے جائیں گے۔ اندور میں کانگریس کارکن مہاتما گاندھی کے مجسموں کے قریب دھرنا دیں گے اور حکومت کے خلاف آواز بلند کریں گے۔دوسری جانب راہل گاندھی کے دورے سے قبل بھارتیہ جنتا پارٹی نے کانگریس پر سخت حملہ کیا ہے۔ اندور میں ایک تقریب سے خطاب کرتے ہوئے وزیر اعلیٰ موہن یادو نے کہا کہ حکومت نے بھاگیرتھ پورہ کے لوگوں کے درد کو سمجھا ہے اور متاثرین کی مدد کے لیے ہر ممکن قدم اٹھائے ہیں۔ انہوں نے کہا کہ یہ بدقسمتی کی بات ہے کہ کانگریس آفات کو سیاست کا موقع بناتی ہے۔

سی ایم موہن یادو نے کہا کہ حکومت نے اس معاملے کو پوری سنجیدگی اور حساسیت کے ساتھ لیا ہے۔ انہوں نے کانگریس کو مشورہ دیا کہ وہ اس مسئلے کو مثبت انداز میں اٹھائے اور تعمیری تجاویز دے، کیونکہ آفت کے وقت سیاست کرنے والوں کو اندور کے عوام معاف نہیں کریں گے۔ریاست کے شہری ترقیات کے وزیر کیلاش وجے ورگیہ نے بھی کانگریس کو نشانہ بناتے ہوئے کہا کہ اندور کو ملک کا سب سے صاف شہر قرار دینے پر سوال اٹھانا غلط ہے۔ انہوں نے کہا کہ چیلنجز آتے رہتے ہیں اور ان کا مقابلہ کرنا ہی اصل ذمہ داری ہے۔

بھارت ایکسپریس اردو