Indian Deportation: ٹرمپ اور مودی اچھے دوست ہیں، پھر یہ کیسے ہوا…’، فوجی طیارے سے ہندوستانیوں کو ڈی پورٹ کیے جانے پر پرینکا گاندھی کا سوال

نئی دہلی: امریکہ میں غیر قانونی طور پر مقیم ہندوستانیوں کی ملک بدر کئے جانے پر اپوزیشن لیڈران برہم ہیں ۔ اس معاملے پر پرینکا گاندھی نے پارلیمنٹ ہاؤس کے باہر ایک خصوصی انٹرویو لیا، جس میں انہوں نے وزیر اعظم نریندر مودی اور ان کے امریکی ہم منصب ڈونلڈ ٹرمپ کے درمیان تعلقات پر سوالات اٹھائے۔ پرینکا گاندھی نے کہا کہ اگر وزیر اعظم  مودی ٹرمپ کے اتنے اچھے دوست ہیں تو ایسا کیوں ہونے دیا گیا؟ اس کے بعد اس نے پوچھا کہ ہمارا جہاز ان ہندوستانیوں کو لینے کیوں نہیں جا سکا؟

بدھ (5 فروری) کو اپوزیشن نے ا مریکہ میں غیر قانونی طور پر مقیم ہندوستانیوں کی ملک بدر کئے معاملے پر پارلیمنٹ میں ہنگامہ کیا۔ صبح 11 بجے پارلیمنٹ کی کارروائی شروع ہونے کے بعد اپوزیشن ارکان پارلیمنٹ نے اس معاملے پر فوری بحث کا مطالبہ کیا۔ اس دوران ‘حکومت شرم کرو ‘ کے نعرے لگائے گئے۔ لوک سبھا کے اسپیکر اوم برلا نے کہا کہ حکومت اس معاملے سے واقف ہے اور یہ خارجہ پالیسی سے جڑا مسئلہ ہے۔ اس کے بعد کارروائی دوپہر 12 بجے اور پھر دوپہر 2 بجے تک ملتوی کر دی گئی۔

کانگریس ایم پی مانیکم ٹیگور کا التوا نوٹس

لوک سبھا میں کانگریس رکن پارلیمنٹ مانیکم ٹیگور نے امریکہ سے غیر قانونی طور پر مقیم ہندوستانیوں کی ملک بدر کئے جانے کے معاملہ پر  بحث کے لیے التوا کا نوٹس دیا تھا۔ ٹیگور نے کہا، ”100 سے زیادہ ہندوستانیوں کو امریکہ سے نکالے جانے کی خبر نے پورے ملک کو حیران کر دیا ہے۔ یہ انسانی حقوق کی خلاف ورزی ہے اور حکومت اس پر خاموش کیوں ہے؟ انہوں نے یہ سوال بھی اٹھایا کہ  ہندوستانی حکومت نے ابھی تک اس غیر انسانی رویے کی مذمت کیوں نہیں کی۔

اپوزیشن کا ایوان کے باہر شدید احتجاج

اپوزیشن ارکان پارلیمنٹ نے پارلیمنٹ ہاؤس کے باہر متحدہ طور پر مظاہرہ کیا۔ کانگریس لیڈران کے سی وینوگوپال، راہل گاندھی، ملکارجن کھرگے اور ششی تھرور سمیت کئی اپوزیشن لیڈروں نے حکومت کے خلاف احتجاج کیا۔ اس مظاہرے نے ملک بدر کے معاملے کو مزید گرم کر دیا ہے۔ اپوزیشن کا کہنا ہے کہ ہندوستانی شہریوں کو ملک بدر کرنا انسانی حقوق کی خلاف ورزی ہے اور حکومت کو اس پر سخت ایکشن لینا چاہیے۔

بھارت ایکسپریس۔