Priyanka Gandhi In Ranchi: پرینکا گاندھی نے رانچی میں قبائلی خواتین کے ساتھ کیا رقص

لوک سبھا انتخابات 2024 کے چھٹے مرحلے کی ووٹنگ سے قبل سیاسی جماعتوں کے لیڈران انتخابی مہم میں مصروف ہیں۔ اس دوران ان کے کئی روپ دیکھنے کو مل رہے ہیں۔ اسی سلسلے میں کانگریس جنرل سکریٹری پرینکا گاندھی واڈرا بدھ (22 مئی) کو جھارکھنڈ پہنچیں، جہاں انہوں نے رانچی ایئرپورٹ پر مقامی لوگوں کے ساتھ روایتی رقص کیا۔ اس کی ویڈیو سوشل میڈیا پر وائرل ہوگئی ہے۔

ویڈیو میں دیکھا جا سکتا ہے کہ پرینکا گاندھی قبائلی خواتین کے ساتھ روایتی رقص کرتی نظر آ رہی ہیں۔ دراصل، کانگریس جنرل سکریٹری انتخابی مہم کے لیے رانچی پہنچی تھیں، اس دوران وہ ان قبائلی خواتین کے ساتھ ڈانس کرتی بھی نظر آئیں۔

پرینکا گاندھی نے کیا کہا؟

رقص کے حوالے سے پرینکا گاندھی نے کہا کہ “میری دادی اندرا گاندھی کہتی تھیں کہ دنیا کی سب سے بہترین ثقافت قبائلیوں کی ہے جو فطرت (نیچر)کی پوجا کرتے ہیں اور اس کی ہر طرح سے حفاظت کرتے ہیں۔ آج رانچی میں لوک ثقافت کے کئی رنگ دیکھنے کو ملے۔”

گوڈا اور رانچی میں ریلیوں سے خطاب کیا۔

رانچی میں ریلی سے خطاب کرتے ہوئے کانگریس لیڈر نے کہا کہ تمام بڑے ادارے جیسے IIM، IIT، ISRO، DRDO، AIIMS کانگریس کا حصہ ہیں۔ اس دوران انہوں نے پی ایم مودی پر حملہ کرتے ہوئے کہا کہ آج ملک کا سب سے بڑا مسئلہ مہنگائی اور بے روزگاری ہے، لیکن آج اس کے متعلق پی ایم مودی کے منہ سے ایک لفظ بھی نہیں نکل رہا۔ وہ بے روزگاری کے بارے میں ایک لفظ بھی نہیں کہتے۔ اس کے ساتھ ہی پرینکا گاندھی نے جھارکھنڈ کے شہیدوں کو بھی یاد کیا۔

بھارت ایکسپریس۔