Future of the Nation: ہنرمندی کے شعبوں میں وزیراعظم مودی نے کی نوجوانوں کے کردار کی ستائش، کہا-’’ملک اور دنیا کا مستقبل تشکیل دے رہے ہیں بھارت کے نوجوان‘‘

نئی دہلی: وزیراعظم نریندر مودی نے ہفتہ کے روز کہا کہ این ڈی اے حکومت نوجوانوں کی قیادت میں ترقی (Youth-led Development) کو مضبوطی کے ساتھ آگے بڑھا رہی ہے۔ انہوں نے کہا کہ یہ دیکھ کر خوشی ہوتی ہے کہ بھارتی نوجوان ان شعبوں میں نمایاں کردار ادا کر رہے ہیں جو نہ صرف ملک بلکہ پوری دنیا کے مستقبل کو تشکیل دے رہے ہیں۔ وزیر اعظم مودی کی قیادت میں مرکزی حکومت نے حال ہی میں اپنے 12 سال مکمل کیے ہیں۔ اس موقع پر انہوں نے نوجوانوں کے لیے حکومت کی مختلف اسکیموں، اقدامات اور کامیابیوں کا ذکر کیا۔

اسٹارٹ اپ انڈیا اور ڈیجیٹل انڈیا نے پیدا کیا نیا ماحول

وزیر اعظم نے سوشل میڈیا پلیٹ فارم ’ایکس‘ پر لکھا: ’’این ڈی اے حکومت نوجوانوں کی قیادت میں ترقی کے لیے مسلسل کام کر رہی ہے۔ گزشتہ 12 برسوں کی ایک نمایاں خصوصیت یہ رہی ہے کہ بھارت کے نوجوانوں نے پورے اعتماد کے ساتھ اپنی امنگوں کو حقیقت میں بدلنے کی سمت قدم بڑھائے ہیں۔‘‘ انہوں نے کہا کہ اسٹارٹ اپ انڈیا، ڈیجیٹل انڈیا، اسکل انڈیا اور اٹل انوویشن مشن جیسی اسکیموں نے ایسا ماحول پیدا کیا ہے جو اختراع (Innovation)، کاروباری صلاحیت (Entrepreneurship) اور نئی سوچ کو فروغ دیتا ہے۔

بھارت دنیا کے بڑے اسٹارٹ اپ مراکز میں شامل

وزیر اعظم کے مطابق آج بھارت دنیا کے اہم اسٹارٹ اپ مراکز میں شمار ہوتا ہے اور اس کامیابی میں نوجوانوں کا کردار کلیدی ہے۔ انہوں نے کہا کہ کئی کامیاب اسٹارٹ اپس کی کہانیاں چھوٹے شہروں اور دیہات سے تعلق رکھنے والے نوجوان لکھ رہے ہیں، جو ملک کے بدلتے ہوئے سماجی اور معاشی منظرنامے کی عکاسی کرتی ہیں۔ وزیر اعظم مودی نے کہا کہ بھارتی نوجوان سائنس اور ٹیکنالوجی، مینوفیکچرنگ، خلائی تحقیق، سیمی کنڈکٹر اور ڈرون ٹیکنالوجی جیسے جدید شعبوں میں اپنی صلاحیتوں کا لوہا منوا رہے ہیں۔ ان کے مطابق نوجوانوں کی یہ شراکت ایسے شعبوں میں ہو رہی ہے جو آنے والے برسوں میں دنیا کی سمت متعین کریں گے۔

کھیلوں میں بھی نوجوانوں نے بڑھایا ملک کا وقار

وزیراعظم نے کھیلوں کے میدان میں نوجوان کھلاڑیوں کی کامیابیوں کو بھی سراہا۔ انہوں نے کہا: ’’ہمارے نوجوانوں نے کھیلوں کے شعبے میں بھی ملک کا نام روشن کیا ہے۔ مختلف بین الاقوامی مقابلوں میں نوجوان بھارتی کھلاڑیوں نے مسلسل بہترین کارکردگی کا مظاہرہ کرتے ہوئے بھارت کا وقار بلند کیا ہے۔‘‘

بہتر انفراسٹرکچر سے نوجوانوں کو نئے مواقع

وزیراعظم مودی کے مطابق کھیلوں کے لیے مضبوط نظام، بہتر انفراسٹرکچر اور کھلاڑیوں کو فراہم کی جانے والی اضافی سہولیات نوجوان ٹیلنٹ کے لیے نئے مواقع پیدا کر رہی ہیں اور انہیں کھیلوں کے میدان میں آگے بڑھنے کی ترغیب دے رہی ہیں۔ انہوں نے اس عزم کا اعادہ کیا کہ حکومت نوجوانوں کو بااختیار بنانے اور انہیں ملک کی ترقی کا اہم ستون بنانے کے لیے مسلسل کام کرتی رہے گی۔

بھارت ایکسپریس اردو۔