Prime Minister Narendra Modi: وزیر اعظم نریندر مودی نے اہل وطن کو وجے دشمی کی مبارکباد پیش کی

وزیر اعظم نریندر مودی نے منگل کے روز ملک کے عوام کو وجے دشمی کی مبارک باد پیش کی۔ اس موقع پر انہوں نے سوشل میڈیا پر سنسکرت کا ایک اشلوک بھی شیئر کیا، جس میں بھگوان شری رام کی خوبیوں اور ان کے کردار کی ستائش کی گئی ہے۔وزیر اعظم مودی نے سوشل میڈیا پلیٹ فارم ایکس پر اپنی پوسٹ میں لکھا، ’’آپ سبھی کو وجے دشمی کی ڈھیروں مبارک باد۔ خوشی اور اعتماد کا یہ تہوار ہر شخص کے عزم کو نئی طاقت عطا کرے۔ میری دعا ہے کہ سب کی زندگی خوشی، خوش بختی اور کامیابی سے مالا مال ہو۔‘‘

سنسکرت کا اشلوک شیئر کرکے شری رام کی ستائش کی

وزیر اعظم نے ایکس پر ایک اور پوسٹ میں سنسکرت کا یہ اشلوک شیئر کیا:

रामो विग्रहवान् धर्मस्साधुस्सत्यपराक्रमः। राजा सर्वस्य लोकस्य देवानां मघवानिव॥

اس اشلوک کا مفہوم ہے کہ بھگوان شری رام خود دھرم کی جیتی جاگتی تصویر ہیں۔ وہ نیک لوگوں کے لیے سب سے بڑا سہارا، سچائی پر قائم رہنے والے اور سچائی کے راستے پر بہادری سے چلنے والے ہیں۔ وہ پوری کائنات کے ایسے حکمراں ہیں جو تمام جہانوں کی اسی طرح حفاظت اور دیکھ بھال کرتے ہیں، جس طرح دیوراج اندر تمام دیوتاؤں کی دنیا کے سربراہ اور محافظ ہیں۔وزیر اعظم نے یہ اشلوک مہارشی والمیکی کی تصنیف ’والمیکی رامائن‘ کے ارنیا کانڈ کے 37ویں سرگ کے 13ویں اشلوک سے شیئر کیا ہے۔ اس میں بھگوان شری رام کے عظیم کردار، ان کی خوبیوں اور ان کے اثرات کو خوبصورتی سے بیان کیا گیا ہے۔

دھرم کے مجسم نمونے کے طور پر شری رام کا کردار

رامائن کے اس واقعے میں بتایا گیا ہے کہ جب راکشس رشیوں اور جنگلات میں رہنے والے سادھو سنتوں پر مظالم ڈھا رہے تھے، تب بھگوان شری رام نے ان کے دکھوں کو دور کرنے اور دھرم کی بحالی کا عزم کیا تھا۔ اس تناظر میں شری رام کو دھرم کی مجسم صورت کے طور پر پیش کیا گیا ہے۔اس اشلوک کا بنیادی مفہوم یہ ہے کہ دھرم محض کوئی غیر محسوس اصول یا ضابطہ نہیں، بلکہ بھگوان شری رام کے طرزِ عمل، ان کے قول اور ان کی زندگی میں عملی طور پر نظر آتا ہے۔ انہوں نے زندگی کے ہر مرحلے میں، چاہے وہ بیٹے، بھائی، دوست یا بادشاہ کی حیثیت ہو، دھرم کی پیروی کی۔

دھرم پر مبنی حکمرانی کی علامت ہیں شری رام

اشلوک میں یہ بھی بتایا گیا ہے کہ جس طرح دیوراج اندر تمام دیوتاؤں کی دنیا کی قیادت اور حفاظت کرتے ہیں، اسی طرح بھگوان شری رام پوری کائنات کے مالک اور محافظ ہیں۔ان کی حکمرانی کی بنیاد خوف یا طاقت نہیں، بلکہ دھرم، انصاف اور ذمہ داری پر مبنی طرزِ حکومت ہے۔ یہی وجہ ہے کہ شری رام کو ایک مثالی حکمراں اور دھرم کی پیروی کرنے والی شخصیت کے طور پر یاد کیا جاتا ہے۔

بھارت ایکسپریس اردو