PM Modi Live In Rajya Sabha: وزیراعظم مودی نے راجیہ سبھا میں کہا- ’ملک دیکھ رہا ہے ایک اکیلا کتنوں پر بھاری‘

پارلیمنٹ کے دونوں ایوانوں (لوک سبھا اورراجیہ سبھا) میں اپوزیشن جماعتوں کی طرف سے اڈانی گروپ سے متعلق حکومت سے جواب دینے اور جے پی سی کی تشکیل کئے جانے سے متعلق مطالبات کے درمیان منگل کے روز وزیراعظم مودی نے لوک سبھا میں خطاب کیا۔ اس کے بعد آج بدھ کے روزوزیراعظم راجیہ سبھا میں خطاب کیا۔ انہوں نے کہا کہ ملک دیکھ رہا ہے، ایک اکیلا کتنوں پر بھاری ہے۔ وزیراعظم مودی کے خطاب کے دوران اپوزیشن نے جم کرہنگامہ آرائی کی اور نعرے لگائے۔ وزیراعظم نریندرمودی نے کہا کہ ہماری حکومت عوام کی پریشانیوں کے حل کے لئے پابند عہد ہے۔ حکومت کا زورعوام کو طاقتوراوربااختیاربنانا ہے۔ ہم حل کے ساتھ آگے بڑھ رہے ہیں۔ ہم چیلنجزسے بھاگنے والے نہیں ہیں۔

کانگریس نے 90 بار سرکار گرائی

وزیراعظم نریندر مودی نے کہا کہ کانگریس نے 90 بار منتخب حکومت گرائی۔ وہ ہم پر حکومت گرانے کی بات کرتے ہیں۔ شرد پوار کی حکومت بھی کانگریس نے گرائی۔ راج بھون کو کانگریس کے دفاتر بنا دیئے گئے تھے۔ کانگریس نے این ٹی آرکے ساتھ کیا کیا؟ کانگریس نے این ٹی آر کی سرکار گرادی۔ کانگریس نے ملک کو ہمیشہ گمراہ کیا۔ اندرا گاندھی نے 50 بار آرٹیکل 356 کا غلط استعمال کیا۔ یہ کون لوگ ہیں، کونسی پارٹی ہے، جس نے غلط استعمال کیا۔

نہرو سرنیم رکھنے میں شرم کیوں؟

وزیراعظم نریندر مودی نے کانگریس پرسخت تنقید کرتے ہوئے کہا کہ نہرو سرنیم لگانے میں  شرمندگی کیوں ہوتی ہے؟ نہرو کے خاندان کے لوگوں کو نہرو سرنیم لگانا چاہئے۔

اسکیموں کا سیدھا فائدہ آدیواسیوں کو ملا: وزیراعظم

راجیہ سبھا میں وزیراعظم نریندر مودی نے کہا کہ 110 ایسے اضلاع جہاں قبائلیوں کی اکثریت ہے، انہیں اسکیموں کا براہ راست فائدہ ملا ہے۔ یہاں تعلیم کے انفراسٹرکچر پر توجہ مرکوز کی گئی۔ بجٹ میں شیڈول ٹرائب کمپوننٹ فنڈ کے تحت 2014 کے پہلے کے مقابلے 5 گنا اضافہ ہوا ہے۔

خواتین کی ترقی ہماری اولین ترجیح

وزیراعظم نریندر مودی نے کہا کہ خواتین کی ترقی اور تحفظ ہماری اولین ترجیح ہے۔  ہماری حکومت نے ’بیٹی بچاؤ بیٹی پڑھاؤ‘ مہم چلائی۔ انہوں نے کہا کہ اسکولوں میں بچیوں کے لئے الگ بیت الخلاء بنوائے۔ بیٹیوں کے لئے سینک اسکول کھول دیئے۔ بیٹیوں کے لئے فوج کے دروازے کھلے ہوئے ہیں۔

کانگریس کو ملک نے کیا مسترد: وزیراعظم

وزیراعظم مودی نے کہا کہ کانگریس کو ملک نے بار بارمسترد کیا ہے۔ کانگریس کی سازشوں کو عوام دیکھ رہی ہے۔ اٹل بہاری واجپئی کی حکومت نے آدیواسیوں کی فلاح وبہبود کے لئے وزارت کی تشکیل کی گئی۔ کانگریس نے آدیواسیوں کو نظرانداز کیا۔ ہم نے آدیواسیوں کے لئے 500 نئے ایکلویہ اسکول کی منظوری دی۔  آدیواسیوں کو 14 لاکھ زمین کے پٹے دیئے۔ جبکہ اپوزیشن کی سیاست ووٹ بینک تک ہی محدود ہے۔

ہم نے ملک کا بھروسہ جیتا: وزیراعظم

وزیراعظم نریندر مودی نے کہا کہ ہم نے ملک کا بھروسہ جیتا ہے۔ لوگوں کا ملک کے سسٹم پر بھروسہ بڑھا۔ ہم نے ہرگاؤں میں بجلی پہنچائی۔ 22 گھنٹے بجلی دینے کی کوشش کامیاب کی۔ پہلے کچھ ہی گھنٹے بجلی آتی تھی۔ ہم نے محنت والا راستہ اختیارکیا۔ وزیراعظم مودی نے کہا کہ ہمارا مقصد اسکیموں کا 100 فیصد فائدہ پہنچانا ہے۔ سیچوریشن پالیسی سے بدعنوانی  ختم ہوگی۔ سیچوریشن سے خوشنودی کم ہوگی۔ ہم بھید بھاؤ کی تمام گنجائش کو ختم کریں گے۔

جن کو پیسہ نہیں ملا، ان کا چلانا فطری: وزیراعظم

وزیراعظم نریندر مودی نے کہا کہ جن دھن، آدھار اورموبائل۔ یہ وہ تین طاقتیں ہیں، جس سے گزشتہ کچھ سالوں میں 27 لاکھ کروڑ روپئے ڈی بی ٹی کے ذریعہ راست طور پر اکاؤنٹ ہولڈروں کے اکاؤنٹ میں گئے ہیں۔ اس سے 2 لاکھ کروڑ روپئے سے زیادہ روپئے جو کسی ایکو سسٹم کے ہاتھوں میں جاسکتا تھا وہ بچ گیا۔ اب جن کو یہ پیسہ نہیں مل پایا، ان کا چلانا فطری ہے۔

اپوزیشن کا بوکھلانا فطری بات: وزیراعظم

وزیراعظم مودی نے کہا کہ عوام نے کانگریس کو مسترد کردیا ہے۔ انہوں نے ہنگامہ آرائی کر رہے اراکین پارلیمنٹ پر طنز کستے ہوئے کہا کہ ہمارے کاموں سے بوکھلاہٹ کا شکار ہونا فطری بات ہے۔ انہوں نے کہا کہ ہم لٹکانے، بھٹکانے اور اٹکانے سے آگے نکلے۔ پہلے لٹکانے، اٹکانے (رخنہ اندازی) اور بھٹکانے کا کام ہوتا تھا، صرف کہنے سے بات نہیں بنتی۔ ہم نے کام کرکے دکھایا ہے۔ اپوزیشن کے ہنگامے کے دوران وزیراعظم نریندر مودی نے اپوزیشن پر تنقید کرتے ہوئے کہا کہ ان کے پاس کیچڑ ہے اورمیرے پاس گلال ہے۔ جتنا کیچڑ اچھالو اتنا ہی کمل کھلے گا۔ انہوں نے کہ کانگریس نے 6 دہائیوں کو برباد کردیا۔ کانگریس نے 60 سالوں میں گڈھے ہی گڈھے دیئے۔ 2014  میں میں نے دیکھا کہ صرف گڈھے ہی گڈھے ہیں۔