PM Modi Rally: تمل ناڈو میں 23 جنوری کو وزیر اعظم مودی کی ریلی سے ہوگا این ڈی اے کے انتخابی مہم کا آغاز

چنئی: تمل ناڈو اسمبلی انتخابات سے قبل بھارتیہ جنتا پارٹی کی قیادت والے این ڈی اے نے ریاست میں انتخابی سرگرمیوں کو تیز کر دیا ہے۔ این ڈی اے کی جانب سے 23 جنوری کو مدورنتکم میں وزیر اعظم نریندر مودی کی ایک بڑی عوامی ریلی کے ساتھ باضابطہ انتخابی مہم کا آغاز کیا جائے گا۔ اس ریلی کو حکمراں ڈی ایم کے کے خلاف این ڈی اے کی جارحانہ حکمت عملی کے پہلے بڑے قدم کے طور پر دیکھا جا رہا ہے۔ اس سلسلے میں اتوار کو بی جے پی کے ریاستی صدر اور اسمبلی میں پارٹی کے لیڈر نینار ناگیندرن نے اعلان کیا کہ وزیر اعظم نریندر مودی 23 جنوری کو دوپہر کے وقت مدورنتکم میں ایک عظیم الشان جلسہ عام سے خطاب کریں گے۔ انہوں نے کہا کہ یہی جلسہ تمل ناڈو میں این ڈی اے کے انتخابی مہم کی شروعات ہوگا۔ ناگیندرن کے مطابق اس ریلی کا مقصد ریاست میں موجودہ ڈی ایم کے حکومت کی ناکامیوں کو عوام کے سامنے لانا اور ایک مضبوط متبادل پیش کرنا ہے۔

بی جے پی لیڈر نے دعویٰ کیا کہ ڈی ایم کے حکومت عوامی مسائل کو حل کرنے میں ناکام رہی ہے اور ریاست میں بدعنوانی، مہنگائی اور بے روزگاری جیسے مسائل میں اضافہ ہوا ہے۔ انہوں نے کہا کہ این ڈی اے عوام کے سامنے ترقی، شفاف حکمرانی اور مضبوط قیادت کا وژن رکھے گا۔ وزیر اعظم مودی کی ریلی اسی وژن کو زمینی سطح پر پہنچانے کا ذریعہ بنے گی۔ این ڈی اے میں شامل اتحادی جماعتوں کو لے کر جاری قیاس آرائیوں پر ناگیندرن نے محتاط رویہ اختیار کیا۔ خاص طور پر ٹی ٹی وی دناکرن کی اے ایم ایم کے، سابق وزیر اعلیٰ او پنیّر سیلوم اور ڈی ایم ڈی کے کی شمولیت سے متعلق سوالات پر انہوں نے کسی بھی پارٹی یا لیڈر کا نام لینے سے گریز کیا۔ تاہم انہوں نے اشارہ دیا کہ مدورنتکم کی ریلی میں این ڈی اے کی یکجہتی واضح طور پر نظر آئے گی۔

انہوں نے کہا کہ 23 جنوری کو اسٹیج پر تمام اہم لیڈر موجود ہوں گے اور عوام خود دیکھ سکیں گے کہ این ڈی اے متحد ہے۔ ناگیندرن نے ڈی ایم کے اور اے آئی اے ڈی ایم کے کے درمیان انتخابی وعدوں کی نقل سے متعلق جاری بحث پر بھی ردعمل دیا۔ انہوں نے اے آئی اے ڈی ایم کے کے منشور کا دفاع کرتے ہوئے کہا کہ سابق وزیر اعلیٰ ایڈپاڈی کے پلانی سوامی نے پچھلے انتخابات میں خواتین کو ماہانہ 1,500 روپے امداد دینے کا وعدہ کیا تھا، جسے اب بڑھا کر 2,000 روپے کیا گیا ہے۔

سیاسی مبصرین کا ماننا ہے کہ 23 جنوری کی ریلی این ڈی اے کے لیے نہایت اہم ثابت ہو سکتی ہے۔ اس کے ذریعے اتحاد 2026 کے اسمبلی انتخابات سے قبل خود کو دراوڑی جماعتوں کے ایک مضبوط اور قابلِ اعتماد متبادل کے طور پر پیش کرنے کی کوشش کرے گا۔ وزیر اعظم مودی کی موجودگی این ڈی اے کے انتخابی مہم کو نئی توانائی دینے کا کام کرے گی۔

بھارت ایکسپریس اردو۔