India AI Impact Summit 2026: بھارت منڈپم میں انڈیا اے آئی امپیکٹ سمٹ 2026 کا آغاز، پی ایم مودی کریں گے افتتاح

نئی دہلی :نئی دہلی میں جمعرات 19 فروری 2026 کو انڈیا اے آئی امپیکٹ سمٹ 2026 کا باقاعدہ آغاز ہوگا، جس کا افتتاح وزیراعظم نریندر مودی کریں گے۔ یہ عالمی نوعیت کا پروگرام پہلی بار گلوبل ساؤتھ میں منعقد ہو رہا ہے، جسے ٹیکنالوجی کے میدان میں ایک اہم سنگِ میل قرار دیا جا رہا ہے۔ افتتاحی تقریب بھارت منڈپم میں منعقد ہوگی، جہاں دنیا بھر سے سربراہان مملکت، وزرا، عالمی اداروں کے نمائندگان اور صف اول کے صنعتکار شریک ہوں گے۔ تقریب سے فرانس کے صدر ایمانویل میکرون اور اقوامِ متحدہ کے سیکریٹری جنرل انتونیو گوتریس بھی خطاب کریں گے۔ اس کے علاوہ مختلف ممالک کے اعلیٰ رہنما اور عالمی ٹیکنالوجی کمپنیوں کے سربراہان بھی اپنے خیالات کا اظہار کریں گے۔ اس سمٹ کا بنیادی مقصد بھارت کو مصنوعی ذہانت کے شعبے میں عالمی قیادت کی صف میں کھڑا کرنا اور ایسے مستقبل کی بنیاد رکھنا ہے، جہاں اے آئی انسانی فلاح، جامع ترقی اور ماحولیاتی تحفظ میں مؤثر کردار ادا کرے۔

وزیراعظم مودی نے بدھ 18 فروری کو مختلف عالمی لیڈروں کے ساتھ نو دوطرفہ ملاقاتیں کیں۔ انہوں نے اسپین، فن لینڈ، سربیا، کروشیا، ایسٹونیا، قازقستان اور بھوٹان کے لیڈروں سے تبادلہ خیال کیا۔ اس دوران حیدرآباد ہاؤس میں گوگل کے سی ای او سندر پچائی اور سن مائیکرو سسٹمز کے بانی ونود کھوسلہ سے بھی ملاقات کی گئی۔ سندر پچائی نے آئندہ پانچ برسوں میں بھارت میں تقریباً 15 ارب ڈالر کی سرمایہ کاری کا اعلان کیا اور کہا کہ بھارت اے آئی کے میدان میں غیر معمولی پیش رفت کرنے جا رہا ہے اور گوگل اس سفر میں شراکت دار بننا چاہتا ہے۔

وزیراعظم نے اسپین کے صدر پیڈرو سانچیز اور فن لینڈ کے وزیرِاعظم پیٹری اورپو سے بھی علیحدہ ملاقاتیں کیں۔ اس موقع پر بھارت اور یورپی یونین کے درمیان فری ٹریڈ ایگریمنٹ کو دوطرفہ تعلقات میں سنہری دور کی شروعات قرار دیا گیا۔ فرانسیسی صدر ایمانویل میکرون نے بھی سمٹ میں بطور مہمانِ خصوصی شرکت کی اور وزیراعظم مودی کے ساتھ ایک اے آئی سے تیار کردہ تصویر شیئر کرتے ہوئے دوستی اور اختراع کے رشتے کو اجاگر کیا۔

گنیز ورلڈ ریکارڈ اور میک ان انڈیا ٹیکنالوجی کی نمائش

مرکزی وزیر برائے الیکٹرانکس و آئی ٹی اشونی ویشنو نے اعلان کیا کہ بھارت نے 24 گھنٹوں کے اندر اے آئی رسپانسبلٹی مہم کے لیے سب سے زیادہ عہد حاصل کرکے گنیز ورلڈ ریکارڈ قائم کیا ہے۔ اس مہم کے تحت شرکاء کو ڈیٹا پرائیویسی، جوابدہی، شفافیت اور غلط معلومات سے نمٹنے جیسے اصولوں پر غور کرنے کی ترغیب دی گئی۔ سمٹ میں بھارتی فوج نے میک ان انڈیا ٹیکنالوجی کی جدید مثالیں بھی پیش کیں۔ فوج کی جانب سے ایک اے آئی ایگزام سسٹم کا مظاہرہ کیا گیا، جو امتحانی پرچوں کی جانچ سے لے کر فیڈبیک تیار کرنے تک کا عمل خودکار طریقے سے انجام دے سکتا ہے۔ اس کے علاوہ لینڈ سلائیڈنگ، سیلاب اور برفانی تودوں جیسی قدرتی آفات کی پیشگی اطلاع دینے والا نظام بھی متعارف کرایا گیا، جو تین سے سات دن پہلے تک درست پیش گوئی کرنے کی صلاحیت رکھتا ہے۔

وزیراعظم آفس کے مطابق 19 فروری کو وزیراعظم مودی افتتاح کے بعد مختلف عالمی رہنماؤں سے دوطرفہ ملاقاتیں کریں گے۔ دوپہر تقریباً بارہ بجے سربراہان کی مکمل نشست منعقد ہوگی، جس میں اے آئی سے متعلق قومی اور عالمی ترجیحات، حکمرانی کے نظام اور بین الاقوامی تعاون پر غور کیا جائے گا۔ شام ساڑھے پانچ بجے وزیراعظم عالمی کمپنیوں کے سی ای اوز کے ساتھ خصوصی اجلاس میں شرکت کریں گے، جہاں ٹیکنالوجی اور سرمایہ کاری کے نئے امکانات پر تبادلہ خیال کیا جائے گا۔

بھارت ایکسپریس اردو