PM Modi Five Nation Tour: وزیراعظم مودی 15 سے 20 مئی تک پانچ ممالک کے دورے پر ہوں گے روانہ، یواے ای کے بعد یورپ کا کریں گے رخ

نئی دہلی: وزیر اعظم نریندر مودی 15 مئی سے پانچ روزہ غیر ملکی دورے پر روانہ ہوں گے، جس کے دوران وہ متحدہ عرب امارات سمیت چار یورپی ممالک کا دورہ کریں گے۔ وزارت خارجہ کے مطابق اس اہم سفارتی دورے کا آغاز یواے ای سے ہوگا جبکہ اختتام اٹلی میں ہوگا۔ اس دورے کو بھارت اور یورپی ممالک کے درمیان بڑھتے ہوئے اقتصادی، تجارتی، دفاعی اور تکنیکی تعلقات کے تناظر میں انتہائی اہم قرار دیا جا رہا ہے۔ وزارت خارجہ کے سکریٹری (مغرب) سِبی جارج نے بدھ کے روز پریس بریفنگ میں بتایا کہ وزیر اعظم مودی 15 سے 20 مئی کے درمیان متحدہ عرب امارات، نیدرلینڈ، سویڈن، ناروے اور اٹلی کا دورہ کریں گے۔ انہوں نے کہا کہ وزیر اعظم 15 مئی کو ابوظہبی پہنچیں گے جہاں وہ متحدہ عرب امارات کے صدر شیخ محمد بن زاید النہیان سے ملاقات کریں گے۔ اس دوران دوطرفہ تعلقات، توانائی کے شعبے میں تعاون اور خطے کی صورتحال سمیت مختلف اہم امور پر تبادلہ خیال کیا جائے گا۔ انہوں نے بتایا کہ بھارت اور یواے ای کے درمیان جامع اسٹریٹجک شراکت داری قائم ہے اور وہاں تقریباً 45 لاکھ بھارتی شہری مقیم ہیں۔

یواے ای کے بعد وزیر اعظم مودی 15 سے 17 مئی تک نیدرلینڈ کا دورہ کریں گے۔ 2017 کے بعد یہ ان کا دوسرا دورہ ہوگا۔ اس دوران وہ تیسرے بھارت-نورڈک سربراہی اجلاس میں بھی شرکت کریں گے، جس میں تجارت، سرمایہ کاری، گرین ٹیکنالوجی اور اختراعات پر خصوصی توجہ دی جائے گی۔ وزیر اعظم نیدرلینڈ کے وزیر اعظم کے ساتھ دوطرفہ مذاکرات کریں گے اور شاہ ولیم الیگزینڈر اور ملکہ میکسیما سے بھی ملاقات کریں گے۔ توقع ہے کہ وہ بھارتی برادری سے خطاب اور وہاں کے بڑے کاروباری رہنماؤں سے ملاقات بھی کریں گے۔ اس کے بعد وزیر اعظم مودی 17 مئی کو سویڈن کے شہر گوتھنبرگ پہنچیں گے۔ یہ ان کا سویڈن کا دوسرا دورہ ہوگا۔ اس سے قبل وہ 2018 میں پہلے بھارت-نورڈک سربراہی اجلاس میں شرکت کے لیے وہاں گئے تھے۔ وزارت خارجہ کے مطابق بھارت اور سویڈن کے درمیان تعلقات گزشتہ چند برسوں میں مسلسل مضبوط ہوئے ہیں، خاص طور پر 2018 میں قائم ہونے والی ”بھارت-سویڈن انوویشن پارٹنرشپ“ کے بعد دونوں ممالک کے درمیان تعاون میں نمایاں اضافہ ہوا ہے۔

دورے کے دوران وزیر اعظم مودی سویڈن کے وزیر اعظم کے ساتھ تجارت، سرمایہ کاری، مصنوعی ذہانت، ابھرتی ہوئی ٹیکنالوجی، دفاعی تعاون، خلائی شعبے، موسمیاتی تبدیلی اور سپلائی چین جیسے موضوعات پر تفصیلی بات چیت کریں گے۔ وہ یورپین راؤنڈ ٹیبل فار انڈسٹری سے بھی خطاب کریں گے، جس میں یورپ اور برطانیہ کے بڑے صنعت کار اور کاروباری شخصیات شریک ہوں گی۔ 18 مئی کو وزیر اعظم مودی ناروے پہنچیں گے، جہاں وہ وزیر اعظم یوناس گہر اسٹورے کی دعوت پر دوطرفہ مذاکرات اور 19 مئی کو منعقد ہونے والے تیسرے بھارت-نورڈک سربراہی اجلاس میں شرکت کریں گے۔ یہ گزشتہ 43 برسوں میں کسی بھارتی وزیر اعظم کا پہلا دوطرفہ دورۂ ناروے ہوگا۔ اس موقع پر وہ ناروے کے بادشاہ ہیرالڈ پنجم اور ملکہ سونیا سے بھی ملاقات کریں گے۔

اوسلو میں ہونے والے بھارت-نورڈک اجلاس میں ناروے، ڈنمارک، فن لینڈ، آئس لینڈ اور سویڈن کے وزرائے اعظم شریک ہوں گے۔ اجلاس میں ٹیکنالوجی، پائیدار ترقی، قابل تجدید توانائی اور ڈیجیٹلائزیشن جیسے شعبوں میں تعاون کو مزید وسعت دینے پر تبادلہ خیال کیا جائے گا۔ وزارت خارجہ کے مطابق بھارت اور نورڈک ممالک کے درمیان تجارت کا حجم تقریباً 90 ارب امریکی ڈالر تک پہنچ چکا ہے۔ دورے کے آخری مرحلے میں وزیر اعظم مودی اٹلی جائیں گے، جہاں دفاعی تعاون، مشترکہ پیداوار، بحری سلامتی اور انسداد دہشت گردی کے موضوعات پر اہم بات چیت متوقع ہے۔ وزارت خارجہ کے مطابق اس دورے کے دوران کئی اہم معاہدوں اور مفاہمتی یادداشتوں پر دستخط کیے جانے کا بھی امکان ہے، جو بھارت اور یورپ کے درمیان اسٹریٹجک شراکت داری کو مزید مضبوط کریں گے۔

بھارت ایکسپریس اردو۔