PM Modi visits Melbourne Cricket Ground: وزیر اعظم نریندر مودی کامیلبورن کرکٹ گراؤنڈ کا دورہ، بھارت-آسٹریلیا اسپورٹس تعاون کے روڈ میپ کا کیاآغاز

نئی دہلی : وزیراعظم نریندر مودی نے اپنے دورہ آسٹریلیا کے آخری دن جمعہ کو دنیا کے مشہور میلبورن کرکٹ گراؤنڈ (ایم سی جی) کا دورہ کیا، جہاں انہوں نے آسٹریلیا کے نوجوان کھلاڑیوں سے ملاقات کی۔ اس موقع پر آسٹریلیا کے وزیراعظم انتھونی البانیز بھی ان کے ہمراہ موجود تھے۔ دونوں رہنماؤں نے مشترکہ طور پر بھارت-آسٹریلیا اسپورٹس کولیبریشن روڈ میپ کا افتتاح کیا، جس کا مقصد دونوں ممالک کے درمیان کھیلوں کے مختلف شعبوں میں تعاون کو نئی بلندیوں تک پہنچانا ہے۔میلبورن کرکٹ گراؤنڈ میں وزیر اعظم مودی کا نوجوان کھلاڑیوں نے پرتپاک استقبال کیا۔ کھلاڑیوں نے ان سے آٹوگراف لیے اور یادگار تصاویر بھی بنوائیں۔ اس موقع پر آسٹریلیا کی مردوں کی کرکٹ ٹیم کے سابق کپتان اسٹیو وا بھی موجود تھے اور انہوں نے وزیر اعظم مودی سے ملاقات کی۔

Sport is a key pillar of the India-Australia partnership, bringing our people closer through shared passion and mutual respect.

Delighted to visit the iconic Melbourne Cricket Ground (MCG) with PM Albanese.

More sporting exchanges, youth engagement and collaboration can… pic.twitter.com/o90MSPIswm

— Narendra Modi (@narendramodi) July 10, 2026

تقریب سے خطاب کرتے ہوئے وزیراعظم مودی نے کہا کہ ایم سی جی میں آتے ہی ہر بھارتی کے دل میں دو جذبات ایک ساتھ ابھرتے ہیں، ایک بھارت اور آسٹریلیا کے درمیان کرکٹ مقابلوں کا جوش اور دوسرا یہ احساس کہ دونوں ممالک میں کرکٹ صرف ایک کھیل نہیں بلکہ مشترکہ جذبہ ہے۔ انہوں نے کہا کہ آج یہاں کھیل کی خوشی، دوستی کی گرمجوشی اور مستقبل کے چیمپئنز کی توانائی صاف نظر آ رہی ہے۔انہوں نے بتایا کہ انہیں کبڈی، آسٹریلین فٹ بال اور کرکٹ سے وابستہ بچوں کے ساتھ بات چیت کا موقع ملا۔ ان کا کہنا تھا کہ ان بچوں کا جوش و خروش دیکھ کر ایسا محسوس ہوا جیسے کسی نمائشی میچ کے بجائے مستقبل کے چیمپئنز کا انتخاب کیا جا رہا ہو۔ انہوں نے کہا کہ نوجوان کھلاڑیوں کا اعتماد اس بات کا ثبوت ہے کہ بھارت اور آسٹریلیا میں کھیلوں کا مستقبل انتہائی روشن ہے۔

وزیر اعظم مودی نے کہا کہ جب بھی ان کی اپنے دوست وزیر اعظم انتھونی البانیز سے ملاقات ہوتی ہے، کرکٹ دونوں لیڈروں کے درمیان فطری تعلق کا ذریعہ بن جاتی ہے۔ انہوں نے احمد آباد میں مشترکہ اسٹیڈیم کے دورے کا ذکر کرتے ہوئے کہا کہ آج ایم سی جی میں بھی وہی کھیلوں کی روح محسوس ہو رہی ہے۔ انہوں نے اسٹیو وا اور لیزا اسٹالیکر جیسے عظیم کھلاڑیوں کی موجودگی کو نوجوان نسل کے لیے حوصلہ افزا قرار دیا۔انہوں نے کہا کہ کھیل بھارت اور آسٹریلیا کے تعلقات کا ایک مضبوط ستون ہیں۔ نئے اسپورٹس تعاون روڈ میپ کے تحت کرکٹ کے علاوہ دیگر کھیلوں میں بھی تعاون بڑھایا جائے گا، جبکہ اسپورٹس ٹریننگ، اسپورٹس سائنس، جدید ٹیکنالوجی اور بنیادی ڈھانچے کی ترقی پر مشترکہ کام کیا جائے گا۔وزیر اعظم مودی نے کہا کہ بھارت میں “کھیلو انڈیا” پروگرام کے ذریعے چھوٹے شہروں، دیہی علاقوں اور عام خاندانوں کے بچوں کو کھیلوں میں آگے بڑھنے کے مساوی مواقع فراہم کیے جا رہے ہیں۔ انہوں نے کہا کہ بھارت 2036 اولمپکس کی میزبانی کا خواہش مند ہے، جبکہ 2032 اولمپکس آسٹریلیا کے شہر برسبین میں منعقد ہوں گے، جس سے دونوں ممالک کو ایک دوسرے سے سیکھنے اور تعاون کے نئے مواقع حاصل ہوں گے۔

انہوں نے اعلان کیا کہ بگ بیش لیگ کا ایک میچ بھارت کے شہر چنئی میں بھی منعقد کیا جائے گا اور اس بات پر زور دیا کہ بھارت میں کسی بھی عالمی اسپورٹس لیگ کا انعقاد وسیع رسائی اور شاندار ناظرین کی ضمانت فراہم کرتا ہے۔ اپنے خطاب کے اختتام پر وزیر اعظم مودی نے کہا کہ جس طرح کھیل لوگوں کو جوڑتے ہیں، اسی طرح بھارت اور آسٹریلیا کی شراکت داری بھی ہر شعبے میں نئی بلندیوں کو چھوئے گی۔ انہوں نے وزیر اعظم البانیز کا شکریہ ادا کرتے ہوئے کہا، “ہم ساتھ کھیلیں گے اور ساتھ جیتیں گے۔”

بھارت ایکسپریس اردو