PM Viksit Bharat Rozgar Yojana: وزیر اعظم مودی 19 جون کو وکست بھارت روزگار یوجنا کے تحت 2,400 کروڑ روپے کی ترغیبی رقم کریں گے جاری

نئی دہلی: وزیر اعظم نریندر مودی 19 جون (جمعہ) کو منعقد ہونے والے ایک خصوصی پروگرام میں پردھان منتری وکست بھارت روزگار یوجنا (پی ایم-وی بی آر وائی) کے تحت تقریباً 2,400 کروڑ روپے کی ترغیبی رقم جاری کریں گے۔ اس بات کا اعلان بدھ کو وزیر اعظم کے دفتر کی جانب سے کیا گیا۔

15 لاکھ روزگار مواقع کے قیام میں مدد

وزیر اعظم کے دفتر کے مطابق، اس اسکیم کے آغاز کے بعد سے اب تک ملک بھر میں تقریباً 15 لاکھ روزگار کے مواقع پیدا کرنے میں مدد ملی ہے۔ اس منصوبے کا مقصد ملازمین اور آجروں دونوں کو رسمی معیشت سے جوڑنے کے لیے حوصلہ افزائی کرنا ہے۔ اس اسکیم کے تحت پہلی بار ملازمت حاصل کرنے والے ملازموں کو 15 ہزار روپے تک کی ترغیبی رقم فراہم کی جاتی ہے، تاکہ انہیں روزگار کے آغاز کے مرحلے میں مالی سہارا مل سکے۔

نئے ملازمین رکھنے والے آجروں کے لیے بھی مراعات

دوسری جانب اضافی روزگار پیدا کرنے والے آجروں کو ہر نئے ملازم کے لیے ماہانہ 3 ہزار روپے تک کی ترغیبی رقم دی جاتی ہے، تاکہ مزید ملازمتوں کے مواقع پیدا کرنے کی حوصلہ افزائی کی جا سکے۔

مینوفیکچرنگ شعبے کے لیے خصوصی سہولت

حکومت نے مینوفیکچرنگ کے شعبے کو اقتصادی ترقی کی بنیاد قرار دیتے ہوئے اس شعبے کے آجروں کو چار سال تک ترغیبی رقم فراہم کرنے کا انتظام کیا ہے، جبکہ دیگر شعبوں کے آجروں کو یہ فائدہ دو سال تک حاصل ہوگا۔ حکومت کا کہنا ہے کہ یہ اسکیم روزگار پر مبنی ترقی کو فروغ دینے اور اقتصادی پیش رفت کے ثمرات نوجوانوں تک معیاری رسمی ملازمتوں کی صورت میں پہنچانے کے عزم کی عکاسی کرتی ہے۔

99,446 کروڑ روپے کے بجٹ والی اسکیم

99 ہزار 446 کروڑ روپے کے مجموعی بجٹ والی یہ اسکیم اگست 2025 میں نافذ کی گئی تھی۔ اس کا ہدف دو برسوں کے دوران 3.5 کروڑ سے زائد روزگار کے مواقع پیدا کرنا ہے۔ حکومت کے مطابق، اس اسکیم کے تحت متوقع مستفیدین میں تقریباً 1.92 کروڑ ایسے نوجوان شامل ہوں گے جو پہلی مرتبہ رسمی شعبے میں ملازمت کا آغاز کریں گے۔

وکست بھارت کے ہدف میں اہم کردار

حکومت کا ماننا ہے کہ یہ اسکیم رسمی روزگار کے دائرے کو وسیع کرنے، سماجی تحفظ کی سہولیات کو مضبوط بنانے اور ملازموں و آجروں دونوں کی معاونت کے ذریعے وکست بھارت کے وژن کو آگے بڑھانے میں اہم کردار ادا کرے گی۔

بھارت ایکسپریس۔