PM Modi’s Bihar Visit on Sept 15: وزیر اعظم مودی 15 ستمبر کو کریں گے پورنیہ ہوائی اڈے کا افتتاح، بہار کی خواتین کو بھی دیں گے بڑا تحفہ

وزیر اعظم نریندر مودی 15 ستمبر کو بہار کے ضلع پورنیہ کا دورہ کریں گے، جہاں وہ پورنیہ ایئرپورٹ کا افتتاح کریں گے اور ایک عظیم الشان عوامی جلسے سے خطاب بھی کریں گے۔ یہ جلسہ شیشاباری گاؤں میں منعقد ہوگا، جہاں پورنیہ، کٹیہار، ارریہ اور کشن گنج جیسے اضلاع سے بڑی تعداد میں لوگوں کی آمد متوقع ہے۔ بی جے پی کے ایک سینئر لیڈر نے بتایا کہ ’’وزیر اعظم مودی سیمانچل کے عوام کو ایک بڑا تحفہ دینے جا رہے ہیں۔ پورنیہ ایئرپورٹ کی مانگ کافی عرصے سے کی جا رہی تھی اور اب وہ دن آ گیا ہے۔ وہ اس دن ہوائی اڈے کا افتتاح کریں گے اور وہاں سے پہلی کمرشل پرواز کو روانہ کریں گے۔‘‘

خواتین کو بھی دیں گے خاص تحفہ 

اس دورے کے دوران وزیر اعظم مودی ہر خاندان کی ایک خاتون کے بینک اکاؤنٹ میں 10,000 روپے منتقل کرنے کا اعلان بھی کریں گے۔ یہ اقدام خواتین کو بااختیار بنانے کے حکومتی منصوبے کا حصہ ہے۔ بی جے پی لیڈر کے مطابق ’’وزیر اعظم ترقی یافتہ بہار کے خواب کو پورا کرنے کے وژن کے ساتھ آ رہے ہیں۔‘‘

جیویکا ندھی اسکیم کا افتتاح

اس سے قبل منگل کے روز وزیر اعظم مودی نے ویڈیو کانفرنسنگ کے ذریعے ’’بہار راجیہ جیویکا ندھی ساکھ سہکاری سنگھ لمیٹڈ‘‘ کا بھی افتتاح کیا۔ اس موقع پر وزیر اعلیٰ نتیش کمار، نائب وزیر اعلیٰ سمراٹ چودھری اور دیگر ریاستی لیڈر بھی موجود تھے۔ وزیر اعظم نے اس ادارے کے بینک اکاؤنٹ میں 105 کروڑ روپے کی رقم بھی منتقل کی۔ وزیر اعظم مودی نے کہا کہ ’’ہم کوئی کسر نہیں چھوڑ رہے تاکہ بہار کی مائیں، بہنیں اور بیٹیاں مواقع سے محروم نہ رہیں۔‘‘ وزیر اعظم دفتر (PMO) کے مطابق، جیویکا ندھی اسکیم کا مقصد کم شرح سود پر آسان مالی سہولت فراہم کرنا ہے۔ اس میں کلَسٹر سطح کے تمام رجسٹرڈ فیڈریشنز ممبر ہوں گے اور ریاستی و مرکزی حکومتیں مالی تعاون فراہم کریں گی۔

بھارت ایکسپریس اردو