PM Modi to inaugurate semiconductor plant in Sanand: پی ایم مودی آج سانند میں جدید سیمی کنڈکٹر پلانٹ کا کریں گے افتتاح، بھارت عالمی چپ مینوفیکچرنگ کی جانب گامزن

نئی دہلی: وزیر اعظم نریندر مودی ہفتہ کے روز گجرات کے سانند میں ملک کے جدید ترین سیمی کنڈکٹر اسمبلی، ٹیسٹنگ، مارکنگ اور پیکیجنگ (اے ٹی ایم پی) پلانٹ کا افتتاح کریں گے۔ اس منصوبے کو قومی سیمی کنڈکٹر مشن کے تحت بھارت کو عالمی چپ مینوفیکچرنگ مرکز بنانے کی سمت ایک اہم قدم قرار دیا جا رہا ہے۔

22,516 کروڑ روپے کی لاگت سے بنے گا جدید یونٹ

مائیکرون سیمی کنڈکٹر ٹیکنالوجی انڈیا پرائیویٹ لمیٹڈ کے سانند یونٹ کو 22,516 کروڑ روپے کی سرمایہ کاری سے تیار کیا گیا ہے۔ سانند میں قائم یہ سہولت عالمی منڈیوں کے لیے سالڈ اسٹیٹ ڈرائیو (SSD)، ڈی رام (DRAM) اور نینڈ (NAND) پر مبنی میموری مصنوعات کی اسمبلی، جانچ، مارکنگ اور پیکیجنگ کا کام انجام دے گی۔

حکام کے مطابق اس وقت پلانٹ میں تقریباً 2,000 ملازمین کام کر رہے ہیں، جبکہ آئندہ برسوں میں یہ تعداد بڑھ کر تقریباً 5,000 تک پہنچنے کی توقع ہے۔ اس منصوبے کی خاص بات یہ ہے کہ معذور افراد کو بھی آپریٹر اور ٹیکنیشن کے طور پر روزگار کے مواقع فراہم کیے گئے ہیں۔

اے آئی کے دور میں میموری اور اسٹوریج کی اہمیت

کمپنی کے صدر اور سی ای او سنجے مہروترا نے کہا کہ مصنوعی ذہانت کے تیزی سے فروغ پاتے دور میں میموری اور اسٹوریج ٹیکنالوجی کی اہمیت بے حد بڑھ گئی ہے۔ ان کے مطابق مضبوط میموری سپورٹ کے بغیر جدید اے آئی نظام مؤثر انداز میں کام نہیں کر سکتے۔

ریت سے چپ تک سیمی کنڈکٹر کی تیاری کا عمل

سیمی کنڈکٹر کی تیاری کا عمل ریت سے حاصل کیے جانے والے خالص سلیکون سے شروع ہوتا ہے۔ اس سلیکون کو پگھلا کر بیلن نما انگٹ کی شکل دی جاتی ہے، جسے بعد میں باریک ویفرز میں کاٹا جاتا ہے۔

فیبریکیشن پلانٹ میں ان ویفرز پر فوٹو لیتھوگرافی ٹیکنالوجی کے ذریعے الیکٹرانک ڈیزائن تیار کیے جاتے ہیں، جن سے ٹرانزسٹر اور میموری اسٹرکچر تشکیل پاتے ہیں۔ بعد ازاں ویفرز کو چھوٹے چپس میں تقسیم کر کے سانند کے اے ٹی ایم پی پلانٹ بھیجا جاتا ہے، جہاں ان کی اسمبلی، معیار کی جانچ اور پیکیجنگ کی جاتی ہے۔

عالمی منڈیوں کو بھارتی سپورٹ

سانند کی یہ یونٹ دنیا بھر میں تیار کیے گئے جدید DRAM اور NAND ویفرز کو پروسیس کر کے مکمل میموری مصنوعات میں تبدیل کرے گی۔ کمپنی کے مطابق اس سے عالمی سطح پر بڑھتی ہوئی طلب، خصوصاً مصنوعی ذہانت کے نظام کے لیے درکار میموری اور اسٹوریج حل کی فراہمی میں مدد ملے گی۔

ریاستی حکومت کا ماننا ہے کہ یہ منصوبہ گجرات کو بھارت کے ابھرتے ہوئے سیمی کنڈکٹر مرکز کے طور پر قائم کرنے میں اہم کردار ادا کرے گا اور ملک کی تکنیکی خود انحصاری کو مزید مضبوط بنائے گا۔

بھارت ایکسپریس۔