National Civil Services Day: وزیر اعظم مودی نیشنل سول سروسز ڈے کے موقع پر بیوروکریٹس سے کریں گے خطاب

وزیر اعظم مودی 17ویں سول سروسز ڈے کے موقع پر پیر کو سرکاری ملازمین سے خطاب کریں گے۔ اس موقع پر وزیر اعظم فلاحی اختراعات پر روشنی ڈالنے کے ساتھ ساتھ ایکسی لینس ایوارڈز بھی پیش کریں گے۔ اس کے علاوہ وزیر اعظم بیوروکریٹس کے ساتھ ’’گورننس منتر‘‘ بھی شیئر کریں گے۔ وگیان بھون میں پی ایم مودی گورننس اور عوامی خدمت کے شعبوں میں اختراع کے لیے اپنے نقطۂ نظر کا خاکہ پیش کریں گے۔ قومی سول سروسز ڈے کی تقریبات میں یہ ان کا ساتواں خطاب ہوگا۔

پی ایم مودی پبلک ایڈمنسٹریشن میں بہترین کارکردگی کے لیے پیش کریں گے ایوارڈز

پی ایم مودی پبلک ایڈمنسٹریشن میں بہترین کارکردگی کرنے والوں کو وزیر اعظم ایوارڈز سے نوازیں گے۔ یہ ایوارڈ ترجیحی پروگراموں کے موثر نفاذ اور عوامی فلاح و بہبود کے شعبے میں اختراعی اقدامات کے لیے دیے جاتے ہیں۔ ہر ایوارڈ میں ایک ٹرافی، اسکرول اور ₹20 لاکھ کی رقم شامل ہوتی ہے۔ اس ایوارڈ کا مقصد عوام کو فائدہ پہنچانے والے جاری یا مستقبل کے منصوبوں کی حمایت کرنا ہے۔

حکومت اپنی کامیابیوں کا مظاہرہ کرے گی

حکومت اس تقریب کے دوران دو ای کتابیں بھی جاری کرے گی، جن میں سے ایک جامع ترقی پر توجہ مرکوز کرے گی اور دوسری ترجیحی پروگراموں سے متعلق اختراعات اور کامیابی کی کہانیوں کو اجاگر کرے گی۔ اس کے علاوہ منتظمین ایوارڈ کی تقریب سے قبل ایوارڈ یافتہ اقدامات کی نمائش کرنے والی ایک مختصر فلم بھی دکھائیں گے۔

کیوں منایا جاتا ہے سول سروسز ڈے؟

ملک بھر میں لوگ سرکاری ملازمین کی لگن اور کوششوں کے اعتراف میں ہر سال 21 اپریل کو نیشنل سول سروسز ڈے مناتے ہیں۔ یہ تاریخ سردار ولبھ بھائی پٹیل کے 1947 میں میٹکلف ہاؤس، دہلی میں سول سروس ٹرینیز کے پہلے بیچ سے خطاب کی یادگار ہے۔ دن بھر جاری رہنے والی اس تقریب میں ملک بھر سے اعلیٰ بیوروکریٹس شرکت کریں گے۔ شرکاء میں سکریٹریز، ایڈیشنل اور جوائنٹ سیکریٹریز، ڈپٹی اور اسسٹنٹ سیکریٹریز، چیف سیکریٹریز، ریزیڈنٹ کمشنرز اور ضلع کلکٹر شامل ہوں گے۔

ایوارڈز کی تقریب کے بعد کابینہ سکریٹری ٹی وی سومناتھن ایک مکمل اجلاس کی صدارت کریں گے جس کا عنوان ’’سول سروسز ریفارمز، چیلنجز اور مواقع‘‘ ہے۔ اس کے علاقہ چار الگ الگ سیشنز بھی ہوں گے جن میں شہری نقل و حمل میں اصلاحات، آیوشمان بھارت اور آیوشمان آروگیہ مندر کے ذریعے صحت کو فروغ دینا، مشن سکشم آنگن واڑی اور پوشن 2.0 کے ذریعے خواتین اور بچوں کی غذائیت کو بہتر بنانا اور خواہش مند بلاکس پروگرام کا نفاذ جیسے موضوعات پر توجہ مرکوز کی جائے گی۔ مرکزی حکومت نے عوامی خدمت کے لیے اپنی وابستگی کا اعادہ کرنے اور سرکاری ملازمین کو تبدیلی کی تحریک دینے کے لیے اس کانفرنس کا انعقاد کیا ہے۔

بھارت ایکسپریس اردو