PM Shares Articles on Mission Saksham Anganwadi and Poshan 2.0: وزیر اعظم مودی نے مشن سکشم آنگن واڑی اور پوشن 2.0 کی کامیابی اور اہمیت پر دیا زور، شیئر کیا مضمون

وزیر اعظم نریندر مودی نے آج مرکزی وزیر خواتین و ترقی اَنّا پورنا دیوی کے لکھے ہوئے ایک مضمون کو شیئر کیا ہے، جس میں بچوں، نوعمر لڑکیوں اور حاملہ خواتین کی غذائیت بہتر بنانے کے لیے شروع کیے گئے اہم پروگرامز مشن سکشم آنگن واڑی اور پوشن 2.0 کا تفصیلی ذکر کیا گیا ہے۔ وزیر اعظم نے اس موقع پر اس بات پر زور دیا کہ یہ پروگرام ملک کی صحت مند نسل کی تعمیر اور بچوں کے روشن مستقبل کے لیے نہایت اہم ہیں۔

وزیر اعظم نے سوشل میڈیا پلیٹ فارم ’ایکس‘ پر یہ مضمون شیئر کرتے ہوئے کہا کہ ملک بھر میں پھیلے آنگن واڑی مراکز کے وسیع نیٹ ورک کے ذریعے لاکھوں مستفیدین کو یہ معاونت فراہم کی جا رہی ہے۔ انھوں نے کہا کہ ’’مشن سکشم آنگن واڑی اور پوشن 2.0 بچوں، نوعمر لڑکیوں اور حاملہ ماؤں کی غذائیت کو بہتر بنانے کے لیے ایک اہم پہل ہے۔ اس کے ذریعے ملک بھر کے آنگن واڑی مراکز کے وسیع نیٹ ورک سے لاکھوں افراد کو فائدہ پہنچ رہا ہے۔‘‘

مرکزی وزیر اَنّا پورنا دیوی نے اپنے مضمون میں اس پروگرام کی کامیابیوں اور اثرات پر روشنی ڈالتے ہوئے بتایا کہ کس طرح خواتین و ترقی کی وزارت کی زیرِ نگرانی یہ اسکیمیں نہ صرف غذائیت کی بہتری بلکہ بچوں کی صحت اور نشوونما میں بھی نمایاں کردار ادا کر رہی ہیں۔ انھوں نے لکھا ہے کہ آنگن واڑی مراکز جہاں ماؤں اور بچوں کو غذائی سپورٹ فراہم کرتے ہیں، وہیں یہ کمیونٹی کی سطح پر غذائیت کے بارے میں شعور بیدار کرنے میں بھی معاون ثابت ہو رہے ہیں۔ یہ اقدامات نہ صرف موجودہ نسل کی بہتری کے لیے ہیں بلکہ آئندہ نسلوں کے لیے بھی ایک مضبوط بنیاد فراہم کرتے ہیں۔

وزیر اعظم مودی نے اس بات پر بھی زور دیا کہ حکومت کی ترجیح ملک کی ہر بستی، ہر گھر تک صحت اور غذائیت کی خدمات پہنچانا ہے تاکہ ہر بچہ صحت مند اور محفوظ ماحول میں پرورش پا سکے۔ انھوں نے کہا کہ حکومت اس مہم کو مزید موثر بنانے کے لیے مسلسل کام کر رہی ہے اور اس کا مقصد نہ صرف غذائیت میں بہتری بلکہ بچوں کی تعلیمی اور سماجی ترقی کو بھی فروغ دینا ہے۔

بھارت ایکسپریس اردو