PM Modi flags off three Amrit Bharat Express trains in Kerala: ترواننت پورم میں وزیراعظم مودی  نےتین امرت بھارت ایکسپریس کو دکھائی ہری جھنڈی، سی ایم وجین نے کہا-منصوبوں سے ریاست کو ملے گی نئی رفتار

کیرل کے وزیرِ اعلیٰ پنارائی وجین نے جمعہ کے روز ترواننت پورم میں وزیراعظم نریندر مودی کا شاندار استقبال کیا۔ وزیر اعظم ریاست میں متعدد بڑے ترقیاتی منصوبوں کے افتتاح اور آغاز کے لیے پہنچے، جسے وزیرِ اعلیٰ نے کیرل کے لیے خوشی اور اطمینان کا لمحہ قرار دیا۔ پنارائی وجین نے کہا کہ وزیراعظم کا یہ دورہ ریاست کی مجموعی ترقی کو نئی رفتار دینے میں نہایت مددگار ثابت ہوگا۔وزیر اعلیٰ نے اپنے خطاب میں کہا کہ کئی اہم منصوبوں کے افتتاح اور لوکارپن کے لیے وزیر اعظم کی موجودگی کیرل کے لیے ایک مثبت پیش رفت ہے۔ انہوں نے اس موقع پر اسٹیج پر موجود معزز شخصیات کا خیرمقدم بھی کیا، جن میں گورنر راجندر وی ارلیکر، ترواننت پورم کے میئر وی وی راجیش، مرکزی وزیرِ مملکت جارج کوریئن، مقامی خود اختیاری کے وزیر ایم بی راجیش، رکن پارلیمنٹ ششی تھرور، سابق مرکزی وزیر راجیو چندرشیکھر، سینئر افسران اور مختلف فلاحی اسکیموں کے مستفیدین شامل تھے۔

وزیر اعلیٰ نے سی ایس آئی آر۔این آئی آئی ایس ٹی انوویشن، ٹیکنالوجی اور انٹرپرینیورشپ ہب کے لیے سنگِ بنیاد رکھنے، نئے پوجاپور  ہیڈ پوسٹ آفس کی عمارت کے افتتاح اور پی ایم سواندھی اسکیم کے آغاز کا ذکر کیا، جس سے ایک لاکھ اسٹریٹ وینڈرز کو فائدہ پہنچے گا۔ انہوں نے بتایا کہ اس موقع پر اسکیم کے تحت مستفیدین کو کریڈٹ کارڈ اور قرض کے چیک بھی فراہم کیے گئے۔

نئی ریل خدمات اور ترقیاتی منصوبوں پر اظہاراطمینان

پنارائی وجین نے وزیراعظم مودی کی جانب سے تین امرت بھارت ایکسپریس ٹرینوں اور ایک پیسنجر ٹرین کو ہری جھنڈی دکھانے کا بھی مزید تذکرہ کیا۔ انہوں نے کہا کہ یہ نئی ریل خدمات کیرل کے لیے رابطہ کاری اور معاشی سرگرمیوں کے اعتبار سے بے حد اہم ہیں اور ان سے ریاستی ترقی کو مزید تقویت ملے گی۔وزیراعلیٰ نے کہا کہ یہ ریاستی حکومت کے لیے خاص اطمینان کا لمحہ ہے، کیونکہ ان میں سے کئی منصوبوں کے لیے طویل عرصے سے مرکزی حکومت سے منظوری کی درخواست کی جا رہی تھی۔ انہوں نے ان منصوبوں کو منظوری دینے پر وزیر اعظم مودی کا شکریہ ادا کیا۔

اپنے خطاب کے اختتام پر پنارائی وجین نے امید ظاہر کی کہ کیرل کے تئیں مرکز کی توجہ اور خیرسگالی آئندہ بھی برقرار رہے گی اور دیگر شعبوں میں ریاست کی حقیقی ضروریات پر بھی وقت کے ساتھ غور کیا جائے گا۔ انہوں نے یقین دلایا کہ وزیر اعظم ان منصوبوں کو مقررہ وقت پر مکمل کروانے کو یقینی بنائیں گے اور آخر میں ریاست اور اپنی جانب سے ایک بار پھر وزیراعظم مودی کا پرتپاک خیرمقدم کیا۔

بھارت ایکسپریس اردو