PM Modi Praises Role of Indian-American Community: وزیراعظم مودی نے کی ہندوستانی نژاد امریکی کمیونٹی کے کردار کی تعریف، کہا ‘ہر شعبے میں بنائی مضبوط شناخت’

وزیر اعظم نریندر مودی نے مختلف شعبوں میں ہندوستانی نژاد امریکی کمیونٹی کی کامیابیوں کی تعریف کی۔ پی ایم مودی نے کہا کہ ہندوستان کے ثقافتی ورثے کے ساتھ ان کا لازوال تعلق ملک کے لیے طاقت کا ذریعہ ہے۔ نیشنل الائنس آف انڈین آرگنائزیشنز (این اے آئی او) کو بھیجے گئے ایک پیغام میں پی ایم مودی نے ریمارک کیا کہ ہندوستان کے 80ویں یوم آزادی اور امریکہ کی 250ویں سالگرہ کا مشترکہ جشن دونوں جمہوری ممالک کے درمیان قریبی تعلقات کی عکاسی کرتا ہے۔ پی ایم مودی نے کہا کہ یہ مشترکہ تقریبات ان اقدار کی عکاسی کرتی ہیں جو نئی دہلی اور واشنگٹن کو جوڑتی ہیں۔ انہوں نے کہا کہ یہ تقریبات ہندوستان اور امریکہ کے درمیان قریبی تعلقات کو ظاہر کرتی ہیں، جس کی جڑیں ہماری مشترکہ جمہوری اقدارمیں پیوست ہیں۔

انہوں نے مزید کہا کہ ‘ماں بھارتی’ (مدر انڈیا) اور ہندوستانی تارکین وطن کے درمیان مضبوط رشتہ اس طرح کی کوششوں سے ظاہر ہوتا ہے جو ہمیشہ ہمارے ملک کے لیے طاقت کا باعث رہا ہے۔ پی ایم مودی نے خاص طور پر امریکی زندگی کے مختلف پہلوؤں میں ہندوستانی امریکی کمیونٹی کے تعاون کا ذکر کیا ہے۔ انہوں نے کہا کہ ہندوستانی نژاد امریکیوں نے ملک کے سائنسی، تکنیکی، علمی، ثقافتی اور عوامی اداروں میں اپنی مضبوط موجودگی قائم کی ہے۔

انہوں نے مزید کہا کہ متحرک ہندوستانی-امریکی کمیونٹی نے سائنس، ٹیکنالوجی، تعلیم، عوامی خدمت اور فنون جیسے متنوع شعبوں میں اپنی کامیابیوں کے ذریعے پذیرائی حاصل کی ہے۔ اس کے ساتھ ساتھ یہ کمیونٹی ہندوستان کے شاندار ثقافتی ورثے سے بھی جڑی ہوئی ہے۔ پی ایم مودی نے ہندوستانی روایات کو زندہ رکھنے اور نسل در نسل روابط کو فروغ دینے میں مہاجر گروپوں کے کردار پر بھی زور دیا۔ انہوں نے کہا کہ ایسی تنظیمیں نوجوان ہندوستانی امریکیوں کو اپنے ورثے سے جڑے رہنے میں مدد کرتی ہیں۔

انہوں نے کہا کہ مہاجرتنظیمیں ہماری روایات کو بچانے اور کمیونٹی کے احساس کو فروغ دینے میں اہم کردار ادا کرتی ہیں۔ وہ نوجوان نسل کو اپنی جڑوں سے جڑے رہنے کی ترغیب بھی دیتی ہیں۔ انہوں نے الائنس کو اس کے یادگار پروگرام کے لیے مبارکباد دی۔ ملک کے اسکولوں، صحت کی دیکھ بھال کی سہولیات، کاروبار اور بڑے پیمانے پر کمیونٹی میں ہندوستانی کمیونٹی کے تعاون کی تعریف کرتے ہوئے وزیر اعظم نے کہا کہ ‘‘ہندوستان کے 80ویں یوم آزادی اور امریکہ کی 250ویں سالگرہ کے موقع پر منعقد ہونے والی تقریبات کی شاندار کامیابی کے لیے این اے آئی او کو نیک خواہشات’’۔

بھارت ایکسپریس اردو۔