PM Modi Pays Floral Tribute To Sardar Vallabhbhai Patel On His 150th Jayanti : وزیر اعظم مودی نے سردار ولبھ بھائی پٹیل کی 150ویں جینتی پر ’اسٹیچو آف یونٹی‘ پر خراجِ عقیدت پیش کیا

وزیر اعظم نریندر مودی نے جمعرات کے روز گجرات کے کیوڑیا میں واقع ’’اسٹیچو آف یونٹی‘‘ پر بھارت کے آئرن مین، سردار ولبھ بھائی پٹیل کی 150ویں جینتی کے موقع پر پھولوں کی چادر چڑھائی اور انہیں خراجِ عقیدت پیش کیا۔ وزیر اعظم نے اس موقع پر کہا کہ سردار پٹیل نے ملک کی یکجہتی اور اتحاد کے لیے اپنی پوری زندگی وقف کر دی اور آج بھارت اُن کے خوابوں کے مطابق مضبوط، متحد اور ترقی یافتہ ملک بننے کی سمت میں گامزن ہے۔

اسی موقع پر اتراکھنڈ کے وزیر اعلیٰ پشکر سنگھ دھامی نے بہار کے مشرقی چمپارن ضلع کے ہرسیدھی اسمبلی حلقے میں بھارتیہ جنتا پارٹی کے امیدوار کرشن نندن پاسوان کے حق میں ایک عوامی جلسے سے خطاب کیا۔ دھامی نے کہا کہ وزیر اعظم مودی کی قیادت میں بہار تیزی سے ترقی کی راہ پر ہے اور ریاست کے پسماندہ طبقات کی فلاح و بہبود کے لیے مسلسل اقدامات کیے جا رہے ہیں۔

انہوں نے کہا کہ کرشن نندن پاسوان نے وزیر رہتے ہوئے علاقے میں نمایاں ترقیاتی کام انجام دیے، اب عوام پر ذمہ داری ہے کہ وہ ترقی کے اس سفر کو آگے بڑھانے کے لیے انہیں دوبارہ کامیاب کریں۔ دھامی نے عوام سے اپیل کی کہ وہ پاسوان کو دوبارہ اسمبلی میں بھیجیں تاکہ وزیر اعظم مودی کے ترقیاتی ویژن کو مزید مضبوطی ملے۔ وزیر اعلیٰ نے کہا کہ مودی حکومت کے دوران بہار میں ترقیاتی منصوبوں کی رفتار بے مثال رہی ہے۔ چار لاکھ کروڑ روپے سے زائد کے منصوبے اس وقت جاری ہیں، دو ہزار کروڑ روپے سے زیادہ کی سرمایہ کاری فضائی خدمات کے شعبے میں ہوئی ہے، جبکہ سڑکوں اور ایکسپریس ویز کے جال بچھائے جا رہے ہیں۔ انہوں نے کہا کہ ماضی میں جہاں بہار بنیادی ڈھانچے سے محروم تھا، آج وہ بڑے شاہراہوں، فلائی اوورز، ریل نیٹ ورک اور میٹرو سروسز کی بدولت تیزی سے بدل رہا ہے۔

انہوں نے بتایا کہ مودی حکومت نے بہار کے ریلوے بجٹ میں دس گنا اضافہ کیا، ریاست کو 20 نئی وندے بھارت ٹرینیں ملی ہیں، پٹنہ میٹرو کا آغاز ہو چکا ہے، اور دربھنگہ میں نیا ہوائی اڈہ تعمیر کیا جا رہا ہے۔ دھامی نے کہا کہ یہ تمام منصوبے بہار کے منظرنامے کو یکسر بدل رہے ہیں۔ وزیر اعلیٰ نے کہا کہ وزیر اعظم مودی کی قیادت میں پسماندہ اور انتہائی پسماندہ طبقات کی ترقی کے لیے مسلسل کوششیں کی جا رہی ہیں۔ آیوشمان بھارت، مفت راشن اسکیم اور دیگر فلاحی اقدامات کے ذریعے ہر طبقے کو بااختیار بنایا جا رہا ہے۔ ان کے مطابق مودی حکومت کی پالیسیوں سے اب تک 30 کروڑ افراد غربت سے باہر آ چکے ہیں۔

کانگریس اور آر جے ڈی پر سخت تنقید کرتے ہوئے دھامی نے کہا کہ ان جماعتوں کا مقصد ہمیشہ خاندان کا مفاد رہا ہے۔ ’’انہوں نے ’غریبی ہٹاؤ‘ کا نعرہ دیا، لیکن نتیجہ یہ ہوا کہ غریب ہی ختم ہو گئے۔‘‘ دھامی نے کہا کہ بدعنوانی میں ملوث خاندان بہار کو کبھی ترقی نہیں دے سکتے۔ انہوں نے کہا کہ لالو-رابڑی دور میں بہار ’جنگل راج‘ اور نکسل تشدد کی علامت تھا، لیکن آج بہار امن، ترقی اور بہتر حکمرانی کی مثال بن چکا ہے۔ صنعتکار جو پہلے بہار میں سرمایہ کاری سے کتراتے تھے، اب ریاست کے جی ڈی پی میں 33 فیصد سے زیادہ حصہ صنعتوں کا ہے۔

تیجسوی یادو پر نشانہ سادھتے ہوئے دھامی نے کہا، ’’تیجسوی عرف گپو بھیا کہتے ہیں کہ وقف قانون نافذ نہیں ہوگا، مگر یہ پارلیمنٹ سے منظور ہو چکا ہے، تمہاری مغل پرستی سے تمہیں اقتدار نہیں ملنے والا‘‘۔ آخر میں دھامی نے کہا کہ اب فیصلہ بہار کے عوام کے ہاتھ میں ہے کہ وہ ایسے رہنما چاہتے ہیں جو پورے صوبے کا خیال رکھیں یا وہ جو صرف اپنے خاندان کے مفادات کے لیے سیاست کریں۔

بھارت ایکسپریس اردو