PM Modi offers prayers: وزیراعظم نریندر مودی کی مدورئی میں ارلمیگو سبرامنیا سوامی مندر میں کی پوجا ارچنا

مدورئی (تمل ناڈو): وزیراعظم نریندر مودی نے اتوار کے روز ریاست تمل ناڈو کے شہر مدورئی میں واقع ارلمیگو سبرامنیا سوامی مندر میں پوجا ادا کی۔ وزیراعظم کا یہ دورہ ایسے وقت میں ہوا ہے جب مدراس ہائی کورٹ کے اُس فیصلے پر تنازع جاری ہے جس میں مندر کے عقیدت مندوں کو تروپارنکنڈرم پہاڑی کی چوٹی پر واقع دیپا تھون (چراغ دان) پر روایتی چراغ روشن کرنے کی اجازت دی گئی تھی۔ ریاست میں برسر اقتدار ڈی ایم کے حکومت نے عدالت کے حکم کی مخالفت کی، جبکہ بی جے پی نے عقیدت مندوں کی حمایت کی۔ گزشتہ سال پارلیمنٹ کے سرمائی اجلاس کے دوران انڈیا اتحاد کے 100 سے زائد ارکان پارلیمنٹ نے اوم برلا کو خط پیش کر کے جسٹس جی آر سوامی ناتھن کے خلاف مواخذے کی تحریک لانے کا مطالبہ کیا تھا، جنہوں نے مذکورہ فیصلہ صادر کیا تھا۔

توہین عدالت کی کارروائی

جنوری 2026 میں جسٹس جی آر سوامی ناتھن نے مدورئی ضلعی انتظامیہ کی جانب سے توہین عدالت کیس میں جواب داخل نہ کرنے پر سخت ناراضگی کا اظہار کیا تھا۔ یہ عرضی اس بنیاد پر دائر کی گئی تھی کہ پہلے دیے گئے عدالتی حکم پر عمل درآمد نہیں کیا گیا۔ گزشتہ ماہ سپریم کورٹ آف انڈیا نے اکتوبر 2025 کے مدراس ہائی کورٹ کے اس فیصلے میں مداخلت سے انکار کر دیا تھا، جس میں تروپارنکنڈرم پہاڑی کے نیلیتھوپو علاقے میں بعض مذہبی سرگرمیوں پر پابندی عائد کی گئی تھی۔ سپریم کورٹ نے قرار دیا کہ مسلمان صرف رمضان اور بقر عید کے مواقع پر سکندر بادشاہ اولیا درگاہ میں نماز ادا کر سکتے ہیں، روزانہ کی بنیاد پر نہیں۔ عدالت نے درگاہ کے احاطے میں جانوروں کی قربانی پر پابندی کو بھی برقرار رکھا۔

4400 کروڑ روپے کے ترقیاتی منصوبوں کا اعلان

مدورئی میں عوامی جلسے سے خطاب کرتے ہوئے وزیراعظم مودی نے ’’ترقی یافتہ بھارت کے لیے ترقی یافتہ تمل ناڈو‘‘ کا نعرہ دیا اور ریاست میں شمولیتی ترقی کے لیے مرکز کی مکمل حمایت کا یقین دلایا۔ انہوں نے 4,400 کروڑ روپے مالیت کے بنیادی ڈھانچے کے منصوبوں کا افتتاح کیا اور سنگ بنیاد رکھا۔ ان میں مارکنم۔پڈوچیری سیکشن (این ایچ-332 اے) اور پراماکوڈی۔رامناتھ پورم سیکشن (این ایچ-87) کو چار لین بنانے کا منصوبہ شامل ہے۔ وزیراعظم کے مطابق ان منصوبوں سے زائرین کے سفر میں آسانی ہوگی اور زرعی و سمندری مصنوعات کی ترسیل بہتر ہوگی۔

بھارت ایکسپریس اردو۔