PM Modi NDA MPs Breakfast Meeting: پی ایم مودی کی رہائش گاہ پر ’بریک فاسٹ میٹنگ‘: پہلی بار این ڈی اے میں شامل ارکانِ پارلیمنٹ نے کیا کہا؟

پارلیمنٹ میں اپوزیشن کے مسلسل ہنگامے کے درمیان وزیر اعظم نریندر مودی نے ایک اہم قدم اٹھایا ہے۔ جمعہ کی صبح پی ایم مودی نے اپنی رہائش گاہ پر قومی جمہوری اتحاد (NDA) کے ارکانِ پارلیمنٹ کو ناشتے پر مدعو کیا۔ اس خصوصی اجلاس میں شرکت کے لیے تمام ارکانِ پارلیمنٹ بی جے پی کے قومی جنرل سیکریٹری ونود تاوڑے کی رہائش گاہ سے بسوں کے ذریعے براہِ راست وزیر اعظم کی رہائش گاہ کی جانب روانہ ہوئے۔ پی ایم مودی کی اس ’برےک فاسٹ ڈپلومیسی‘ نے سیاسی حلقوں میں خاصی ہلچل پیدا کر دی ہے۔

پہلی بار این ڈی اے کا حصہ بننے والے ارکان میں زبردست جوش

اس ہائی پروفائل ناشتے کی میٹنگ میں کئی نئے چہروں کے ساتھ رکنِ پارلیمنٹ سدیپ بندوپادھیائے اور کاکولی گھوش بھی نظر آئے، جو پہلی بار این ڈی اے کا حصہ بنے ہیں۔ وزیر اعظم کی رہائش گاہ روانہ ہونے سے پہلے اپنے جوش کا اظہار کرتے ہوئے سدیپ بندوپادھیائے نے کہا، ”میں نے پہلے کبھی ایسی میٹنگ میں شرکت نہیں کی۔ یہ پہلی بار ہے کہ ہم این ڈی اے کا حصہ بنے ہیں، اس لیے ہمارے تمام ارکانِ پارلیمنٹ اس میٹنگ میں جا رہے ہیں۔ یہ ہمارے لیے بالکل نیا تجربہ ہوگا۔“وہیں رکنِ پارلیمنٹ کاکولی گھوش نے خصوصی دعوت کے لیے وزیر اعظم مودی کا شکریہ ادا کیا۔

پارلیمنٹ کی کارروائی میں رکاوٹ پر ہوگی بات چیت

اس خصوصی ’برےک فاسٹ میٹنگ‘ کا اصل ایجنڈا صرف ارکان کا باہمی تعارف نہیں بلکہ پارلیمنٹ کی کارروائی کو ہموار انداز میں چلانے پر بھی توجہ دینا تھا۔ مرکزی وزیر مملکت رام داس اٹھاولے نے واضح کیا کہ اپوزیشن مسلسل ایوان کی کارروائی میں خلل ڈال رہا ہے اور اس معاملے پر میٹنگ میں سنجیدہ گفتگو ہونے کا امکان ہے۔اس کے ساتھ ہی اٹھاولے نے مہاراشٹر سے متعلق اہم مسائل کو بھی مضبوطی سے اٹھانے کی بات کہی۔

نئے ارکان کو ملے گا ’گرو منتر‘

ذرائع کے مطابق یہ میٹنگ صرف ناشتے تک محدود نہیں رہے گی بلکہ این ڈی اے کے ارکانِ پارلیمنٹ کے درمیان باہمی تعارف اور رابطے کے لیے بھی ایک اہم پلیٹ فارم ثابت ہوگی۔ وزیر اعظم مودی نئے ارکانِ پارلیمنٹ کو پارلیمانی طریقۂ کار، ان کی ذمہ داریوں اور اپنے اپنے حلقوں سے متعلق مسائل کو مؤثر انداز میں ایوان میں اٹھانے کے حوالے سے اہم رہنمائی دے سکتے ہیں۔ اس ناشتے کی میٹنگ کے ذریعے این ڈی اے نے آئندہ پارلیمانی کارروائی کے لیے اپنے اتحاد، باہمی رابطے اور مضبوط حکمت عملی کا واضح پیغام دینے کی کوشش کی ہے۔

بھارت ایکسپریس اردو۔