PM Modi meets Speaker of Maldives’ Majlis: وزیر اعظم مودی نے مالدیپ کی ’مجلس‘ کے اسپیکر سے کی ملاقات، ہندوستان-مالدیپ پارلیمانی دوستی گروپ کی تشکیل پر کیا خوشی کا اظہار

وزیر اعظم نریندر مودی نے ہفتہ کے روز مالدیپ کی عوامی مجلس (پارلیمنٹ) کے اسپیکر عبدالرحیم عبداللہ سے ملاقات کی، جس میں دونوں ممالک کے درمیان پارلیمانی روابط اور دوستی کو مزید مضبوط بنانے پر بات چیت ہوئی۔ سوشل میڈیا پلیٹ فارم ’ایکس‘ پر پی ایم مودی نے اس ملاقات کی تصویر شیئر کرتے ہوئے لکھا کہ ’’عوامی مجلس کے اسپیکر عبدالرحیم عبداللہ سے ملاقات کی۔‘‘

پی ایم مودی نے مزید لکھا کہ ’’ہماری پارلیمنٹس کے درمیان قریبی تعلقات سمیت گہری جڑوں والی ہندوستان-مالدیپ دوستی کے بارے میں بات کی۔ 20 ویں مجلس میں ہندوستان-مالدیپ پارلیمانی دوستی گروپ کی تشکیل دو طرفہ تعلقات کے لیے ایک خوش آئند قدم ہے۔ ہندوستان مالدیپ میں صلاحیت سازی کی حمایت کے لیے پابند عہد ہے۔‘‘ وزیر اعظم نے اس بات پر زور دیا کہ ہندوستان اور مالدیپ کے درمیان تعلقات محض سفارتی سطح تک محدود نہیں بلکہ دونوں ممالک کی پارلیمانوں کے درمیان بھی قریبی روابط استوار ہو رہے ہیں۔ 20ویں مالدیپ پارلیمنٹ میں قائم ہونے والے ’’ہندوستان-مالدیپ پارلیمانی دوستی گروپ‘‘ کو انھوں نے ایک مثبت پیش رفت قرار دیا۔

اس سے قبل جمعہ کو وزیر اعظم مودی اور صدر معیزو کی موجودگی میں آٹھ کلیدی معاہدے طے پائے، جن میں لائن آف کریڈٹ، قرض کی ادائیگی، ماہی گیری، ڈیجیٹل تبدیلی اور ’یونائیفائیڈ پیمنٹس انٹرفیس‘ (UPI) شامل ہیں۔ یہ معاہدے دونوں ممالک کے درمیان اقتصادی اور تکنیکی شراکت داری کو نئی بلندیوں تک لے جانے کی سمت ایک اہم قدم ہیں۔ یہ دورہ نہ صرف دو طرفہ تعلقات کی گہرائی کو اجاگر کرتا ہے بلکہ آئندہ برسوں میں تعاون کے نئے باب کھولنے کے لیے راہ ہموار کرتا ہے۔

بھارت ایکسپریس اردو