PM Modi meets Italian President: وزیراعظم مودی کی اطالوی صدر سے ملاقات، بھارت اور اٹلی کے درمیان تجارت، ٹیکنالوجی، مصنوعی ذہانت، خلائی تعاون اور ثقافتی روابط بڑھانے پر زور

روم: وزیراعظم نریندر مودی نے بدھ کے روز اٹلی کے صدر سرجیو ماتاریلا سے روم میں ملاقات کی، جس میں دونوں رہنماؤں نے دوطرفہ تعلقات اور مختلف شعبوں میں تعاون کو مزید مضبوط بنانے کے امکانات پر تبادلۂ خیال کیا۔ وزیراعظم مودی نے کہا کہ ملاقات کے دوران تجارت، سرمایہ کاری اور ثقافتی روابط سمیت کئی اہم موضوعات زیر بحث آئے۔  نریندر مودی نے سوشل میڈیا پلیٹ فارم ایکس پر پوسٹ کرتے ہوئے کہا: ’’روم میں صدر سرجیو ماتاریلا سے ملاقات ہوئی۔ ہم نے بھارت-اٹلی دوستی کے مختلف پہلوؤں پر گفتگو کی، جن میں تجارت، سرمایہ کاری اور ثقافتی روابط شامل ہیں۔‘‘ انہوں نے مزید کہا کہ دونوں ممالک نے مصنوعی ذہانت (AI)، اہم معدنیات، خلائی تحقیق اور نیوکلیائی توانائی جیسے شعبوں میں تعاون کے امکانات پر بھی بات کی۔

علاقائی اور عالمی صورتحال پر بھی تبادلۂ خیال

وزارت خارجہ کے ترجمان رندھیر جیسوال نے کہا کہ دونوں رہنماؤں نے علاقائی اور عالمی حالات پر بھی تبادلۂ خیال کیا، جن میں باہمی دلچسپی کے مختلف بین الاقوامی امور شامل تھے۔ انہوں نے کہا کہ بھارت اور اٹلی نے تجارت، ٹیکنالوجی، اختراع، صاف توانائی، اے آئی اور ثقافت جیسے شعبوں میں تعاون بڑھانے کے عزم کا اعادہ کیا۔

مودی-میلونی ملاقات، ’انڈو-میڈیٹرینین‘ شراکت داری پر زور

اس سے قبل وزیراعظم نریندر مودی نے اٹلی کی وزیراعظم جارجیا میلونی سے عشائیے پر ملاقات کی تھی۔ دونوں رہنماؤں نے تاریخی کولوزیم کا دورہ بھی کیا اور دوطرفہ تعاون کو مزید گہرا کرنے کے طریقوں پر گفتگو کی۔ مودی اور میلونی نے مختلف بین الاقوامی پلیٹ فارمز پر شائع مشترکہ مضمون میں بھارت اور اٹلی کے تعلقات کو ’’خصوصی اسٹریٹجک شراکت داری‘‘ قرار دیا۔ اس مشترکہ مضمون کا عنوان ’’اٹلی اور بھارت: انڈو-میڈیٹرینین کے لیے ایک اسٹریٹجک شراکت داری‘‘ تھا، جس میں دونوں رہنماؤں نے کہا کہ دوطرفہ تعلقات اب ایک فیصلہ کن مرحلے میں داخل ہو چکے ہیں۔ مشترکہ مضمون میں ’’انڈو-میڈیٹرینین کاریڈور‘‘ کے تصور پر بھی زور دیا گیا، جسے ہند-بحرالکاہل اور بحیرہ روم کے درمیان ابھرتے ہوئے تجارتی، توانائی، ٹیکنالوجی اور اسٹریٹجک رابطوں کے نئے نظام کے طور پر پیش کیا گیا ہے۔

بھارت ایکسپریس اردو۔