PM Modi Mann Ki Baat: راج گڑھ کی بہنوں نے پلاسٹک کی بوتلوں سے کیا ایسا کمال کہ متاثر ہوئے بغیر نہ رہے وزیر اعظم مودی

وزیر اعظم نریندر مودی نے اتوار کے روز اپنے ماہانہ ریڈیو پروگرام ’من کی بات‘ کے 135ویں ایپی سوڈ میں مدھیہ پردیش کی خواتین کے ایک منفرد اور حوصلہ افزا اقدام کی بھرپور تعریف کی۔ انہوں نے مدھیہ پردیش کے ضلع راج گڑھ کے بیاورا کی ان خواتین کی کہانی ملک کے سامنے رکھی، جنہوں نے اپنے شہر کو پلاسٹک کے کچرے سے پاک کرنے کے لیے کسی سرکاری نظام کا انتظار کرنے کے بجائے خود ہی ذمہ داری سنبھال لی۔ ان خواتین نے پلاسٹک کے کچرے کو مسئلہ سمجھنے کے بجائے اس کا ایسا مؤثر حل نکالا کہ آج پورا ملک ان کی ستائش کر رہا ہے۔

کچرے کو بنایا طاقت

وزیر اعظم مودی نے کہا، ’’ہم سب چاہتے ہیں کہ ہمارا گاؤں اور شہر صاف ستھرا رہے، لیکن اکثر لوگ یہ سمجھتے ہیں کہ صفائی کرنا کسی اور کی ذمہ داری ہے۔ بیاورا کی ان بہنوں نے کسی کا انتظار نہیں کیا بلکہ خود سڑکوں اور گلیوں سے خالی پلاسٹک کی بوتلیں اور پولیتھین جمع کرنا شروع کر دیں۔ دیکھتے ہی دیکھتے ان کی یہ چھوٹی سی کوشش ایک بڑے عوامی تحریک میں تبدیل ہو گئی۔‘‘بیاورا کی خواتین نے گزشتہ چند مہینوں میں سیکڑوں کلوگرام پلاسٹک کے کچرے کو ری سائیکل کرکے اسے ’ایکو برکس‘ (Eco-Bricks) میں تبدیل کر دیا۔ وزیر اعظم نے خوشی کا اظہار کرتے ہوئے کہا کہ جو پلاسٹک پہلے شہر میں آلودگی اور گندگی کا سبب بنتا تھا، آج انہی خواتین کی دانشمندی سے شہر کی خوبصورتی بڑھانے میں استعمال ہو رہا ہے۔

’ایکو برکس‘ کیا ہوتی ہیں؟

سادہ الفاظ میں، ایکو برکس پلاسٹک کے کچرے کو کارآمد بنانے کا ایک مؤثر اور گھریلو طریقہ ہے۔ اس میں پانی یا کولڈ ڈرنک کی خالی پلاسٹک بوتلوں کے اندر صاف اور خشک پلاسٹک کے کچرے کو اچھی طرح بھر کر مضبوطی سے دبا دیا جاتا ہے۔ جب بوتل پتھر کی طرح سخت ہو جاتی ہے تو اسے ایکو برک کہا جاتا ہے۔ان ایکو برکس کو صوفے اور کرسی جیسے فرنیچر بنانے، باغیچوں کی دیواریں تعمیر کرنے اور دیگر چھوٹے تعمیراتی کاموں میں استعمال کیا جاتا ہے۔ اس طریقے سے نہ صرف ماحول کا تحفظ ہوتا ہے بلکہ پلاسٹک کے فضلے کا مؤثر اور مفید استعمال بھی ممکن ہو جاتا ہے۔

بھارت ایکسپریس اردو۔