PM Modi launches Mukhyamantri Mahila Rojgar Yojana in Bihar: بہار میں ’مکھیہ منتری مہیلا روزگار‘ اسکیم کا وزیر اعظم مودی نے کیا افتتاح، وزیر اعلیٰ نتیش نے کیا اظہارِ تشکر

پٹنہ: وزیر اعظم نریندر مودی نے بہار میں ’مکھیہ منتری مہیلا روزگار‘ اسکیم کا آغاز کیا۔ اس موقع پر وزیر اعظم مودی ورچوئلی شامل ہوئے۔ اسکیم کے تحت بہار کی 75 لاکھ خواتین کے بینک کھاتوں میں براہِ راست 10-10 ہزار روپے، یعنی کُل 7,500 کروڑ روپے کی رقم بھیجی گئی۔

اس موقع پر بہار کے وزیر اعلیٰ نتیش کمار نے اسکیم کے بارے میں تفصیل سے جانکاری دی۔ پروگرام سے خطاب کرتے ہوئے وزیر اعلیٰ نتیش کمار نے کہا کہ جن خواتین کا روزگار اچھا چلے گا، اُنہیں دو لاکھ روپے کی اضافی مدد دی جائے گی۔ انہوں نے بتایا کہ دیگر خواتین کو اسکیم کا فائدہ دینے کے لیے الگ الگ تاریخیں طے کی گئی ہیں۔ اگلی تاریخ 3 اکتوبر مقرر کی گئی ہے اور اس کے بعد تقریباً ہر ہفتے خواتین کے بینک کھاتوں میں رقم بھیجی جائے گی۔

پچھلی حکومتوں پر الزام
پچھلی حکومتوں پر نشانہ سادھتے ہوئے نتیش کمار نے کہا، ’’سب جانتے ہیں کہ پچھلی حکومتوں نے ریاست میں کوئی کام نہیں کیا۔ پہلے بُرا حال تھا۔ جب 24 نومبر 2005 کو این ڈی اے کی حکومت بنی تب سے ہم لوگ بہار کی ترقی میں لگے ہوئے ہیں اور ریاست میں قانون کا راج ہے۔ تمام شعبوں میں تیزی سے ترقی ہو رہی ہے۔”

انہوں نے خواتین کی بااختیاری کے لیے کیے گئے اقدامات بھی گنوائے۔ وزیر اعلیٰ نے کہا، ’’شروع سے ہی خواتین کی بااختیاری پر زور دیا گیا۔ 2006 میں پنچایتی راج ادارے اور 2007 میں شہری بلدیات میں خواتین کے لیے 50 فیصد ریزرویشن کا انتظام کیا گیا۔ 2013 میں پولیس میں خواتین کے لیے 35 فیصد ریزرویشن دیا گیا۔ 2016 میں خواتین کو سرکاری نوکریوں میں بھی 35 فیصد ریزرویشن دیا گیا۔”

وزیر اعلیٰ نتیش کمار نے کہا کہ پہلے بہار میں سیلف ہیلپ گروپس کی تعداد کم تھی۔ اب اسے جیویکا کے نام سے جانا جاتا ہے اور اس گروپ کی تعداد تقریباً 11 لاکھ ہے۔ ان میں جیویکا دیدیوں کی تعداد قریب 1.40 کروڑ ہے۔ 2024 میں ہم نے شہری علاقوں میں بھی سیلف ہیلپ گروپس کا قیام کیا، جہاں تیزی سے کام ہو رہا ہے۔ ان کی تعداد اب 37 ہزار ہو چکی ہے اور 3.85 لاکھ جیویکا دیدیاں اس میں شامل ہیں۔

اس موقع پر نتیش کمار نے وزیر اعظم مودی اور مرکزی حکومت کی بھی تعریف کی۔ وزیر اعلیٰ نتیش نے کہا کہ وزیر اعظم مودی نے بہار میں بہت کام کرائے ہیں۔ جولائی 2024 کے بجٹ میں بہار کو خصوصی اقتصادی امداد کے طور پر سڑک، صنعت، صحت، سیاحت اور سیلاب سے نجات کے لیے بڑی رقم دینے کا اعلان کیا گیا۔

انہوں نے کہا کہ بہار میں مکھانا بورڈ، ایئرپورٹ اور مغربی کوسی نہر کے لیے مالی امداد جیسی اسکیموں کا بھی اعلان کیا گیا۔

اس دوران وزیر اعلیٰ نتیش کمار نے یہ بھی کہا کہ مجھے یقین ہے کہ مائیں اور بہنیں اسکیم کے تحت دی جا رہی رقم کا صحیح استعمال کریں گی، اپنے خاندان کو خوشحال بنائیں گی اور ریاست و ملک کی ترقی میں تعاون کریں گی۔

بھارت ایکسپریس۔