PM Modi Invites World To Invest In India Maritime Renaissance : بھارت کے پاس بلیو اکانومی کی ترقی کے لیے بلند عزم اور جامع وژن: وزیراعظم نریندر مودی

وزیراعظم نریندر مودی نے کہا ہے کہ بھارت کے پاس بلیو اکانومی کی ترقی کے لیے ایک بلند عزم اور جامع وژن ہے۔ انہوں نے سرمایہ کاروں کو دعوت دیتے ہوئے کہا کہ دنیا بھر کے سرمایہ کار بھارت میں سرمایہ کاری کریں، کیونکہ یہ ملک سرمایہ کاری کے لیے سب سے موزوں مقام بن چکا ہے۔ جمعرات کو میری ٹائم لیڈرز کانکلیو سے خطاب کے بعد وزیراعظم مودی نے کہا کہ “ہمارے پاس عالمی معیار کی بندرگاہیں، طویل ساحلی پٹی، اسٹریٹجک تجارتی راستے، جدید انفراسٹرکچر اور اختراعی جذبہ ہے۔” انہوں نے مزید کہا کہ بھارت کے نوجوانوں کی تخلیقی قوت اور اختراعی ذہنیت ملک کے میری ٹائم شعبے کو عالمی سطح پر نمایاں بنا رہی ہے۔

وزیراعظم نے اپنی لنکڈ اِن پوسٹ میں بتایا کہ وہ انڈیا میری ٹائم وِیک 2025 کے موقع پر متعدد عالمی سی ای اوز اور میری ٹائم سیکٹر کے بڑے اسٹیک ہولڈرز سے ملے۔ انہوں نے کہا کہ گزشتہ 11 برسوں میں انفراسٹرکچر، اصلاحات اور عوامی شراکت داری کی بدولت بھارت کے میری ٹائم سیکٹر میں تاریخی تبدیلیاں آئی ہیں۔ ان کے مطابق، یہ شعبہ اب جدید انفراسٹرکچر، بین الاقوامی اعتماد اور قومی فخر کی علامت بن چکا ہے۔

مودی نے کہا کہ حکومت نے “ریفارم، پرفارم اور ٹرانسفارم” کے منتر کے تحت میری ٹائم گورننس کو جدید شکل دی ہے۔ بلز آف لیڈنگ بل سے لے کر انڈین پورٹس بل 2025 تک پانچ اہم قوانین نے بندرگاہوں کی کارکردگی بہتر بنائی، ریاستوں کو مضبوط کیا اور بھارت کو عالمی معیارات سے جوڑا۔ وزیراعظم نے بتایا کہ حکومت نے سمندری شعبے کی ترقی کے لیے 70,000 کروڑ روپے کے ایک جامع پیکیج کو منظوری دی ہے، جس سے میری ٹائم معیشت کو نئی رفتار ملے گی۔

انہوں نے کہا کہ شپ بلڈنگ اسسٹنس اسکیم، میری ٹائم ڈیولپمنٹ فنڈ اور شپ بلڈنگ ڈیولپمنٹ اسکیم کے ذریعے ملک میں 4.5 لاکھ کروڑ روپے سے زیادہ کی سرمایہ کاری آئے گی اور 2,500 سے زائد جہازوں کی تعمیر ممکن ہوگی۔ مودی نے مزید بتایا کہ بھارت میں جہاز رانی اور آبی نقل و حمل کا شعبہ تیزی سے ترقی کر رہا ہے۔ بھارتی جھنڈے والے جہازوں کی تعداد 1,205 سے بڑھ کر 1,549 ہو گئی ہے، جبکہ فلیٹ کا مجموعی وزن 10 ایم جی ٹی سے بڑھ کر 13.52 ایم جی ٹی تک پہنچ گیا ہے۔ ساحلی مال برداری میں بھی نمایاں اضافہ ہوا ہے، جو 87 ایم ایم ٹی سے بڑھ کر 165 ایم ایم ٹی ہو چکی ہے۔

بھارت ایکسپریس اردو