PM Modi Inauguration: مغربی بنگال کو 18,680 کروڑ روپے کی بڑی سوغات، وزیر اعظم مودی کولکاتا میں بچھائیں گے ترقی کا جال، کھڑگپور–مورگرام کوریڈور کا رکھیں گے سنگِ بنیاد

وزیر اعظم نریندر مودی 14 مارچ 2026 کو مغربی بنگال کا دورہ کریں گے۔ دوپہر تقریباً 2 بجے وزیر اعظم کولکاتا میں تقریباً 18,680 کروڑ روپے کی متعدد ترقیاتی منصوبوں کا افتتاح اور سنگِ بنیاد رکھیں گے۔ خطے میں سڑکوں کے بنیادی ڈھانچے کو مضبوط بنانے کی سمت ایک اہم قدم کے طور پر وزیر اعظم تقریباً 16,990 کروڑ روپے کی لاگت سے تیار ہونے والے 420 کلو میٹر سے زیادہ مجموعی لمبائی کے کئی قومی شاہراہ منصوبوں کا افتتاح اور سنگِ بنیاد رکھیں گے۔

افتتاح کئے جانے والے ان منصوبوں میں مغربی بنگال اور جھارکھنڈ میں این ایچ–19 کے مختلف حصے اور مغربی بنگال میں این ایچ–114 کے سیکشن شامل ہیں۔ان منصوبوں سے سڑکوں کی حفاظت میں بہتری، سفر کے وقت میں کمی، ٹریفک جام اور آلودگی میں کمی، علاقائی رابطے میں اضافہ، سیاحت کو فروغ اور خطے میں معاشی ترقی کو رفتار ملنے کی توقع ہے۔ وزیر اعظم کئی نئی قومی شاہراہ منصوبوں کا سنگِ بنیاد بھی رکھیں گے۔ ان میں این ایچ–116 اے کے تحت 231 کلومیٹر طویل چار لین والے کھڑگپور–مورگرام اقتصادی راہداری کے پانچ پیکیج شامل ہیں۔

یہ منصوبہ کھڑگپور اور سلیگڑی کے درمیان اقتصادی کوریڈور کا حصہ ہے اور مغربی بنگال کے ضلع مغربی مدنی پور، بانکورہ، ہگلی، مشرقی بردھمان، بیر بھوم اور مرشد آباد سے گزرے گا۔ کھڑگپور اور مورگرام کے درمیان براہِ راست رابطہ قائم ہونے سے سفر کا فاصلہ تقریباً 120 کلومیٹر کم ہو جائے گا اور سفر کے وقت میں تقریباً سات سے آٹھ گھنٹے کی بچت ہوگی۔ یہ راہداری این ایچ–16، این ایچ–19، این ایچ–14 اور این ایچ–12 سمیت اہم قومی شاہراہوں سے بھی منسلک ہوگی، جس سے ملٹی کوریڈور رابطہ مزید مضبوط ہوگا۔

دوبراج پور بائی پاس سے ٹریفک جام میں کمی

وزیر اعظم این ایچ–14 پر 5.6 کلومیٹر طویل چار لین والے دوبراج پور بائی پاس کی تعمیر کا سنگِ بنیاد بھی رکھیں گے، جس سے شہر کے گنجان علاقوں میں ٹریفک کا دباؤ کم ہوگا اور سفر کے وقت میں تقریباً ایک گھنٹے کی کمی آئے گی۔ اس کے علاوہ وہ این ایچ–14 پر کانگساباتی اور شیلباتی دریاؤں پر بننے والے اضافی چار لین کے بڑے پلوں کی تعمیر کا بھی سنگِ بنیاد رکھیں گے۔

اس دورے کے دوران وزیر اعظم جہاز رانی اور بندرگاہوں سے متعلق کئی منصوبوں کا افتتاح اور سنگِ بنیاد بھی رکھیں گے۔ وہ ہلدیا ڈاک کمپلیکس کے برتھ نمبر 2 کے میکانائزیشن منصوبے کا افتتاح کریں گے، جس سے سامان کے نقل و حمل زیادہ مؤثر، تیز اور ماحول دوست بن سکے گی۔ اس منصوبے سے کارگو ہینڈلنگ کی صلاحیت بڑھے گی، مکمل ریک ریل لوڈنگ سسٹم کو آسانی ملے گی، کارکردگی کے اشاریوں میں بہتری آئے گی، خطرناک کاموں میں انسانی خطرات کم ہوں گے اور روزگار کے نئے مواقع پیدا ہوں گے۔ وزیر اعظم کھدّرپور ڈاکس (ڈاک 1 – مغرب) میں مرمت و بحالی کے منصوبے کا بھی افتتاح کریں گے۔

کولکاتا ڈاک سسٹم میں بیسکیول برج کی تجدید

وزیر اعظم ریاست میں کئی بندرگاہی بنیادی ڈھانچے کے منصوبوں کا سنگِ بنیاد بھی رکھیں گے۔ ان میں شیاما پرساد مکھرجی بندرگاہ کے ہلدیا ڈاک کمپلیکس میں برتھ نمبر 5 کی میکانائزیشن شامل ہے۔ دیگر منصوبوں میں کولکاتا ڈاک سسٹم میں بیسکیول برج کی تجدید، کِڈّرپور ڈاک–I (مشرق) اور ڈاک–II (مشرق) میں یارڈ کی ترقی اور نکاسی آب کے نظام کی بہتری، ہاوڑہ برج کے ستون سے نمتلا گھاٹ تک دریائے کولکاتا کے کنارے حفاظتی پشتوں کی تعمیر اور انڈینچر میموریل کمپلیکس کے قریب دریائی کروز ٹرمینل اور دریائی سیاحت کے لیے ٹرمینل عمارت کی تعمیر شامل ہے۔

ریلوے کے شعبے میں وزیر اعظم پرولیا–آنند وہار ٹرمینل (دہلی) ایکسپریس کو ہری جھنڈی دکھائیں گے، جس سے مغربی بنگال، اتر پردیش، بہار، جھارکھنڈ اور قومی راجدھانی خطے کے درمیان ریل رابطہ مزید مضبوط ہوگا۔

وزیر اعظم امرت اسٹیشن یوجنا کے تحت ازسرنو تعمیر شدہ چھ ریلوے اسٹیشنوں کا بھی افتتاح کریں گے۔ ان اسٹیشنوں میں کاماکھیاگوری، انارا، تاملک، ہلدیا، بیر بھوم اور سیوری شامل ہیں۔

اس کے علاوہ وزیر اعظم دو اہم ریل منصوبوں کو قوم کے نام بھی وقف کریں گے، جن میں بیلڈا اور دانتان کے درمیان 16 کلومیٹر طویل تیسری ریل لائن اور کلائیکنڈا و کنیموہولی کے درمیان خودکار بلاک سگنلنگ نظام شامل ہے۔ ان منصوبوں سے ٹرینوں کی حفاظت اور وقت کی پابندی میں بہتری آئے گی، بھیڑ کم ہوگی اور مسافروں کے لیے سفر مزید آسان ہو جائے گا۔

یہ تمام اقدامات مغربی بنگال اور مشرقی ہندوستان میں بنیادی ڈھانچے کو مضبوط بنانے، رابطے کو فروغ دینے اور اقتصادی ترقی کو تیز کرنے کے لیے حکومت کے عزم کی عکاسی کرتے ہیں۔

بھارت ایکسپریس اردو۔