Ganga Expressway: وزیراعظم نریندر مودی نے 36 ہزار کروڑ روپے کی لاگت سے تیار 594 کلومیٹر طویل ایکسپریس وے کا کیا افتتاح

ہردوئی (اتر پردیش): وزیراعظم نریندر مودی نے بدھ کے روز ریاست اتر پردیش کے ضلع ہردوئی میں 594 کلومیٹر طویل گنگا ایکسپریس وے کا افتتاح کیا، جو تقریباً 36,230 کروڑ روپے کی لاگت سے تعمیر کیا گیا ہے۔ اس موقع پر ریاست کے وزیراعلیٰ یوگی آدتیہ ناتھ اور بی جے پی کے ریاستی صدر پنکج چودھری بھی موجود تھے۔

ملک کے سب سے بڑے ایکسپریس ویز میں شامل

وزیراعظم کے دفتر (پی ایم او) کے مطابق، گنگا ایکسپریس وے ایک 594 کلومیٹر طویل، چھ لین (آٹھ لین تک توسیع کے قابل) جدید ہائی اسپیڈ کوریڈور ہے۔ یہ ایکسپریس وے 12 اضلاع میرٹھ، بلند شہر، ہاپوڑ، امروہہ، سنبھل، بدایوں، شاہجہاں پور، ہردوئی، اناؤ، رائے بریلی، پرتاپ گڑھ اور پریاگ راج سے گزرتا ہے، جس سے ریاست کے مغربی، وسطی اور مشرقی حصے ایک ہی تیز رفتار راستے سے جڑ جائیں گے۔

سفر کے وقت میں بڑی کمی، معیشت کو فروغ

اس پروجیکٹ کے مکمل ہونے سے میرٹھ سے پریاگ راج تک سفر کا وقت موجودہ 10 سے 12 گھنٹے سے کم ہو کر تقریباً 6 گھنٹے رہ جائے گا۔ اس سے نہ صرف آمد و رفت آسان ہوگی بلکہ ٹرانسپورٹ کے شعبے میں بھی کارکردگی بہتر ہوگی۔ حکومت کے مطابق، یہ ایکسپریس وے ایک بڑے اقتصادی کوریڈور کے طور پر کام کرے گا، جس کے تحت تقریباً 2,635 ہیکٹر رقبے پر مینوفیکچرنگ اور لاجسٹک حب تیار کیے جائیں گے۔ اس سے لاجسٹک لاگت میں کمی آئے گی اور سپلائی چین مزید مضبوط ہوگی۔

قومی سلامتی اور روزگار کے نئے مواقع

اس منصوبے کی ایک خاص بات شاہجہاں پور ضلع میں 3.5 کلومیٹر طویل ایمرجنسی لینڈنگ سہولت (ایئر اسٹرپ) ہے، جسے ضرورت کے وقت فضائیہ کے استعمال میں بھی لایا جا سکتا ہے۔ یہ خصوصیت نہ صرف قومی سلامتی کو مضبوط بناتی ہے بلکہ اس پروجیکٹ کی اسٹریٹیجک اہمیت کو بھی بڑھاتی ہے۔ مزید یہ کہ اس ایکسپریس وے سے کسانوں کو براہ راست شہری اور برآمدی منڈیوں تک رسائی ملے گی، جس سے انہیں بہتر قیمت ملنے کی امید ہے اور دیہی معیشت کو تقویت ملے گی۔ ساتھ ہی سیاحت میں اضافہ اور روزگار کے نئے مواقع بھی پیدا ہوں گے۔ یہ ایکسپریس وے اتر پردیش میں ایک وسیع ایکسپریس وے نیٹ ورک کا حصہ ہوگا، جس میں آگرہ-لکھنؤ ایکسپریس وے، جیور لنک ایکسپریس وے اور دیگر منصوبے شامل ہیں۔ اس نیٹ ورک کے ذریعے ریاست میں شمال سے جنوب اور مشرق سے مغرب تک تیز رفتار سڑک رابطہ ممکن ہوگا، جو متوازن علاقائی ترقی میں اہم کردار ادا کرے گا۔

بھارت ایکسپریس اردو۔