PM Modi In RSS Headquarters: آرایس ایس کے ہیڈکوارٹر پہنچے پی ایم مودی، گرو کے قدموں میں رکھا سر،11سال میں پہلی بار سنگھ کے دفتر کا کیا دورہ

وزیر اعظم نریندر مودی 11 سال میں پہلی بار ناگپور میں آر ایس ایس ہیڈکوارٹر پہنچے ہیں ۔ آج صبح (30 مارچ)، انہوں نے یہاں اسمرتی مندر میں آر ایس ایس کے بانیوں کو خراج عقیدت پیش کیا۔ اس دوران آر ایس ایس کے سربراہ موہن بھاگوت بھی ان کے ساتھ تھے۔پی ایم مودی نے ایک پیغام کے ساتھ اسمرتی مندر کی وزیٹر بک پر بھی دستخط کیے۔ انہوں نے لکھا، ‘محترم ڈاکٹر ہیڈگیوار اور قابل احترام گروجی کو دل کی گہرائیوں سے سلام۔ میں ان کی یادوں کو تازہ کرنے کے لیے اس اسمرتی مندر میں آکر بہت خوش ہوں۔ ہندوستانی ثقافت، قوم پرستی اور تنظیم کی اقدار کے لیے وقف یہ جگہ ہمیں قومی خدمت میں آگے بڑھنے کی ترغیب دیتی ہے۔پی ایم مودی نے لکھا، ‘سنگھ کے دو مضبوط ستونوں کی یہ جگہ ملک کی خدمت کے لیے وقف لاکھوں رضاکاروں کے لیے توانائی کا ذریعہ ہے۔ ہماری کوششوں سے ہندوستان  کی شان میں ہمیشہ اضافہ ہو۔

واضح رہے کہ اس دوران سی ایم  فڑنویس اور کابینہ وزیر نتن گڈکری بھی موجود تھے۔ ان کا استقبال مہاراشٹر کے وزیر اعلی دیویندر فڈنویس اور مرکزی وزیر اور ناگپور کے ایم پی نتن گڈکری نے کیا۔ یہ دونوں رہنما بھی پی ایم مودی کے آر ایس ایس ہیڈکوارٹر کے دورے کے دوران ان کے ساتھ تھے۔ آپ کو بتادیں کہ اس دورے کے دوران پی ایم مودی آر ایس ایس کے بانیوں میں سے ایک گولوالکر کی یاد میں بنائے گئے سپر اسپیشلٹی آئی اسپتال ‘مادھو نیترالیا پریمیم سینٹر’ کا سنگ بنیاد بھی رکھیں گے۔

امبیڈکر کی دکشا بھومی پہنچے پی ایم مودی

اپنے ناگپور دورے کے دوران پی ایم مودی  دیکشا بھومی بھی پہنچے۔ یہیں 1956 میں بابا صاحب امبیڈکر نے اپنے ہزاروں پیروکاروں کے ساتھ بدھ مت اپنایا۔ یہاں پی ایم مودی ڈاکٹر بھیم راؤ امبیڈکر کو خراج عقیدت پیش کیا۔اس کے بعد، اپنے پروگرام کے دوران، وزیر اعظم ناگپور میں سولر ڈیفنس اینڈ ایرو اسپیس لمیٹڈ کی گولہ بارود کی سہولت کا بھی دورہ کررہے ہیں۔ یہاں وہ یو اے وی طیاروں کے لیے بنائے گئے 1250 میٹر لمبے اور 25 میٹر چوڑے رن وے کا افتتاح کریں گے۔آر ایس ایس ہیڈکوارٹر کا دورہ کرنے والے پی ایم مودی ناگپور میں ہیڈگیوار اسمرتی بھون جانے والے دوسرے وزیر اعظم ہیں۔ ان سے پہلے، 27 اگست 2000 کو، اٹل بہاری واجپائی وزیر اعظم کے طور پر آر ایس ایس کے ہیڈکوارٹر کا دورہ کیا تھا۔انہوں نے آر ایس ایس کے بانیوں کو بھی خراج عقیدت پیش کیا۔

سنگھ  کو خوش کرنے کی کوشش

 جہاں آر ایس ایس نے پی ایم مودی کے اس دورے کو تاریخی قرار دیا ہے وہیں اپوزیشن پارٹیوں نے اس پروگرام پر تنقید شروع کر دی ہے۔ آر ایس ایس کے مفکر آشوتوش ادونی نے کہا کہ ایک کار سیوک ملک کے وزیر اعظم ہیں اور وہ یہاں آرہے ہیں، اسی لیے یہ تاریخی دورہ ہے۔ دوسری طرف،عآپ لیڈر سنجے سنگھ نے کہا، ‘لوک سبھا انتخابات میں کم سیٹیں ملنے کا اثر نظر آرہا ہے۔ آر ایس ایس کو خوش کرنے کی کوشش کی جارہی ہے۔

بھارت ایکسپریس۔