PM Modi Holds Talks with Ex-Japan PMs Suga, Kishida: وزیر اعظم مودی نے جاپان کے سابق وزرائے اعظم یوشی سوگا اور فومیو کِشیدا سے کی ملاقات

وزیر اعظم نریندر مودی نے جمعہ کے روز اپنے جاپان کے دورے کے دوران سابق جاپانی وزرائے اعظم یوشی ہیدے سوگا اور فومیو کِشیدا سے ملاقات کی۔ یوشی ہیدے سوگا نے 2020 سے 2021 تک جاپان کے وزیر اعظم کی حیثیت سے خدمات انجام دیں، جب کہ فومیو کِشیدا 2021 سے 2024 تک وزیر اعظم رہے۔ دونوں رہنما حکمران جماعت ’’لبرل ڈیموکریٹک پارٹی‘‘ سے تعلق رکھتے ہیں۔ واضح رہے کہ وزیر اعظم مودی جمعہ کی صبح دو روزہ سرکاری دورے پر بھارت-جاپان 15ویں سالانہ سربراہی اجلاس میں شرکت کے لیے ٹوکیو پہنچے۔ اپنے دورے کے آغاز میں انھوں نے بھارت-جاپان اکنامک فورم سے خطاب کیا، جہاں انھوں نے غیر ملکی کمپنیوں کی بھارت میں بڑھتی سرمایہ کاری پر روشنی ڈالی۔

پی ایم مودی نے کہا کہ ’’JETRO (جاپان ایکسٹرنل ٹریڈ آرگنائزیشن) کے مطابق 80 فیصد جاپانی کمپنیاں بھارت میں اپنا کاروبار بڑھانا چاہتی ہیں اور 75 فیصد کمپنیاں منافع کما رہی ہیں۔ بھارت میں سرمایہ صرف بڑھتا نہیں، بلکہ کئی گنا بڑھتا ہے۔‘‘ وزیر اعظم مودی نے کہا کہ بھارت کی ترقی کے پیچھے ’’Reform, Perform, Transform‘‘ یعنی اصلاحات، کارکردگی، اور تبدیلی کا ماڈل ہے۔ انھوں نے ’’ون نیشن، ون ٹیکس‘‘ یعنی جی ایس ٹی اور کاروبار میں آسانی پیدا کرنے کے لیے کی گئی اصلاحات کا حوالہ دیتے ہوئے کہا ’’ہم نے سنگل ونڈو منظوری جیسے اقدامات کے ذریعے کاروباری عمل کو مزید سہل بنایا ہے۔‘‘

بھارت کی صلاحیت، جاپان کی ٹیکنالوجی

مودی نے بھارت اور جاپان کو تکنیکی انقلاب کے دو اہم ستون قرار دیا۔ انھوں نے کہا کہ ’’جاپان ٹیکنالوجی کا پاور ہاؤس ہے اور بھارت ٹیلنٹ کا۔ بھارت نے مصنوعی ذہانت، سیمی کنڈکٹرز، کوانٹم کمپیوٹنگ، بایوٹیکنالوجی اور خلائی شعبے میں جرأتمندانہ اقدامات کیے ہیں۔‘‘ وزیر اعظم نے مزید بتایا کہ دونوں ممالک نے صاف توانائی اور ماحول دوست مستقبل کے لیے مشترکہ کریڈٹ میکانزم پر معاہدہ کیا ہے۔

بھارت ایکسپریس اردو