PM Modi holds meeting with French President: وزیراعظم نریندر مودی اور فرانسیسی صدر ایمینوئیل میکروں کی دوطرفہ ملاقات

نئی دہلی: وزیراعظم نریندر مودی نے جمعرات کو دارالحکومت میں فرانسیسی صدر ایمانوئیل میکرون سے دوطرفہ ملاقات کی۔ یہ ملاقات ’انڈیا اے آئی امپیکٹ سمٹ 2026‘ کے موقع پر ہوئی۔ اس سے قبل صدر میکروں نے سمٹ سے خطاب کرتے ہوئے بھارت کی ڈیجیٹل تبدیلی اور ٹیکنالوجی گورننس میں قائدانہ کردار کو سراہا اور اسے عالمی معیار قرار دیا۔ انہوں نے بھارت میں پُرتپاک استقبال پر شکریہ ادا کرتے ہوئے کہا: ’’نمستے۔ اس شاندار شہر اور اس عظیم ملک میں ہمارا خیرمقدم کرنے کے لیے بہت شکریہ۔ 2024 کے سرکاری دورے کے بعد اس آرٹیفیشل انٹیلیجنس امپیکٹ سمٹ کے لیے دوبارہ آنا خوشی کی بات ہے، جس کی میزبانی آپ کر رہے ہیں، وزیراعظم۔‘‘

مالی شمولیت اور ڈیجیٹل نظام کی مثال

فرانسیسی صدر نے گزشتہ دہائی میں بھارت کی تکنیکی پیش رفت کے سماجی اثرات کو اجاگر کرتے ہوئے کہا کہ دس برس پہلے ممبئی کا ایک اسٹریٹ وینڈر بینک اکاؤنٹ نہیں کھول سکتا تھا، مگر آج وہ اپنے موبائل فون پر ادائیگیاں قبول کر رہا ہے جو ڈیجیٹل ذرائع سے حاصل ہونے والی مالی شمولیت کی واضح مثال ہے۔ صدر میکروں نے کہا کہ بھارت نے ایسا نظام قائم کیا ہے جو دنیا میں کہیں اور نظر نہیں آتا: ’’1.4 ارب لوگوں کے لیے ڈیجیٹل شناخت، ایسا ادائیگی نظام جو ہر ماہ 20 ارب لین دین پر عمل کرتا ہے اور صحت کا ایسا انفراسٹرکچر جس نے 50 کروڑ ڈیجیٹل ہیلتھ آئی ڈیز جاری کی ہیں۔ یہی نتائج ہیں جسے ’انڈیا اسٹیک اوپن، انٹرآپریبل، خودمختار‘ کہا جاتا ہے۔‘‘ انہوں نے مزید کہا کہ ہم ایک بڑی اور تیز رفتار تکنیکی تبدیلی کے آغاز پر کھڑے ہیں اور وزیراعظم کے وژن کو سراہتے ہوئے اسے سمٹ کا مرکزی نکتہ قرار دیا۔

بھارت–فرانس تعلقات: دورہ اور آئندہ منصوبے

فرانسیسی صدر اور ان کی اہلیہ منگل کو مہاراشٹر کے شہر ممبئی پہنچے، جہاں گورنر آچاریہ دیوورت اور وزیراعلیٰ دیویندر فڈنویس نے ہوائی اڈے پر ان کا استقبال کیا۔ وزارت خارجہ کے ترجمان رندھیر جیسوال نے سوشل میڈیا پلیٹ فارم ’ایکس‘ پر بتایا کہ اس دورے کے دوران دونوں رہنما دوطرفہ ملاقات کریں گے اور سالِ اختراع 2026 کا آغاز کریں گے، جس سے بھارت–فرانس اسٹریٹجک شراکت داری کو مزید رفتار ملے گی۔ ممبئی میں مصروفیات کے بعد وفد نئی دہلی روانہ ہوا جہاں 16 سے 20 فروری تک بھارت منڈپم میں انڈیا اے آئی امپیکٹ سمٹ منعقد ہو رہی ہے۔ یہ عالمی جنوب میں منعقد ہونے والی پہلی عالمی اے آئی سمٹ ہے، جس میں مصنوعی ذہانت اور ابھرتی ہوئی ٹیکنالوجیز پر عالمی تعاون کو فروغ دیا جا رہا ہے۔

بھارت ایکسپریس اردو۔