PM Modi Invites PM Ishiba for AI Impact Summit 2026: پی ایم مودی نے جاپانی وزیر اعظم کو اگلے سال ہندوستان میں اے آئی امپیکٹ سمٹ کے لیے کیا مدعو

وزیرِاعظم نریندر مودی نے اپنے جاپانی ہم منصب شیگیرو ایشیبا کو فروری 2026 میں بھارت میں ہونے والی ’’اے آئی امپیکٹ سمٹ‘‘ میں شرکت کی دعوت دی ہے۔ یہ اعلان پی ایم مودی کے دو روزہ سرکاری دورۂ جاپان کے دوران کیا گیا۔ خارجہ سیکریٹری وکرم مسری کے مطابق یہ سمٹ 19 اور 20 فروری 2026 کو منعقد ہوگی، جس میں مصنوعی ذہانت پر عالمی سطح پر تبادلۂ خیال کیا جائے گا۔ دونوں وزرائے اعظم نے بھارت-جاپان مصنوعی ذہانت تعاون منصوبے کا بھی اعلان کیا، جس کا مقصد بڑے LLMs، ڈیٹا سینٹرز اور اے آئی گورننس جیسے شعبوں میں دوطرفہ تعاون کو فروغ دینا ہے۔ اس کا مقصد ایک قابلِ اعتماد اور جدید اے آئی ماحولیاتی نظام قائم کرنا ہے۔

پی ایم مودی اور ایشیبا نے اعلیٰ سطحی وفدی مذاکرات میں شرکت کی، جس کے دوران بھارت-جاپان ڈیجیٹل پارٹنرشپ 2.0 کا بھی آغاز ہوا۔ اس شراکت داری کے تحت ابھرتی ہوئی ٹیکنالوجیز میں اسٹارٹ اپس، ریسرچ، اور ڈیجیٹل ٹیلنٹ ایکسچینج کو فروغ دیا جائے گا۔ وزارت خارجہ کے بیان کے مطابق دونوں رہنماؤں نے اسٹارٹ اپس کی معاونت اور مشترکہ تحقیقی منصوبوں کی حمایت پر زور دیا۔ ’’جاپان-انڈیا اسٹارٹ اپ سپورٹ انیشی ایٹو‘‘ کے تحت بھارت میں دونوں ممالک کے اسٹارٹ اپس کی سرگرمیوں کو فروغ دیا جائے گا۔

اس دوران دونوں ممالک نے ایک مشترکہ دستاویز پر بھی دستخط کیے، جس میں ڈیجیٹل انفراسٹرکچر، جدید ٹیکنالوجی، اے آئی، آئی او ٹی اور سیمی کنڈکٹرز جیسے شعبوں میں تعاون کو مضبوط بنانے کا عزم کیا گیا۔ پی ایم مودی نے کہا کہ ’’ہائی ٹیکنالوجی میں تعاون ہماری ترجیح ہے۔ سیمی کنڈکٹرز اور ریئر ارتھ منرلز ہمارے ایجنڈے میں سرِفہرست ہیں۔‘‘ انھوں نے جاپان سے آئندہ 10 سال میں بھارت میں 10 کھرب ین سرمایہ کاری کا ہدف بھی پیش کیا، خاص طور پر چھوٹے اور درمیانے درجے کے کاروباروں کے درمیان روابط پر زور دیا۔ اختتامی بیان میں مودی نے جاپانی قیادت کو اگلی سالانہ بھارت-جاپان سمٹ میں شرکت کی دعوت دی۔

بھارت ایکسپریس اردو