PM Modi expresses grief over Uttarakhand helicopter crash: وزیر اعظم مودی نے کیدارناتھ ہیلی کاپٹر حادثے پر کیا گہرے دکھ کا اظہار، قبرص سے کیا وزیر اعلیٰ پشکر سنگھ دھامی کو فون

وزیر اعظم نریندر مودی نے اتوار کو اتراکھنڈ کے وزیر اعلی پشکر سنگھ دھامی سے ریاست میں المناک ہیلی کاپٹر حادثے کے تناظر میں بات کی۔ اتراکھنڈ کے وزیر اعلیٰ کے دفتر کے ایک سرکاری بیان کے مطابق وزیر اعلیٰ دھامی نے وزیر اعظم کو مطلع کیا کہ واقعے کے فوراً بعد ایک اعلیٰ سطحی میٹنگ ہوئی اور واقعے کی تحقیقات کے لیے ہدایات دی گئی ہیں۔

وزیر اعلیٰ کے آفس نے بتایا کہ ’’وزیر اعظم نے مرنے والوں کے اہل خانہ کے لیے صبر کی دعا کی اور مرکزی حکومت کی جانب سے ہر ممکن تعاون کا یقین دلایا۔ وزیر اعلیٰ دھامی نے وزیر اعظم کو بتایا کہ واقعے کے فوراً بعد ایک اعلیٰ سطحی میٹنگ ہوئی ہے۔ حادثے کی وجوہات کی مکمل تحقیقات کے لیے ایک اعلیٰ سطحی انکوائری کمیٹی تشکیل دینے کی ہدایات دی گئی ہیں۔‘‘

حادثے میں ایک شیرخوار بچے سمیت سات افراد کی ہوئی ہے موت

واضح رہے کہ آج دن کے اوائل میں کیدارناتھ سیکٹر میں ایک ہیلی کاپٹر گر کر تباہ ہوگیا جس میں ہیلی کاپٹر میں سوار سات افراد کی موقع پر ہی موت ہوگئی۔ شہری ہوا بازی کی وزارت نے ایک بیان میں کہا کہ ’’شری کیدارناتھ جی – آرین ہیلی پیڈ، گپت کاشی سیکٹر میں کام کرنے والے آرین ایوی ایشن کے بیل 407 ہیلی کاپٹر میں پانچ بالغ، ایک شیر خوار بچہ اور عملے کا ایک رکن سوار تھے، جو اتوار کو گر کر تباہ ہو گیا۔‘‘

اطلاعات کے مطابق ہیلی کاپٹر نے گپت کاشی سے صبح 05:10 بجے اڑان بھری اور صبح 5:18 بجے شری کیدارناتھ جی ہیلی پیڈ پر اترا اور پھر 05:19 بجے گپت کاشی کے لیے روانہ ہوا اور بتایا گیا ہے کہ یہ صبح 5:30 سے ​​05:45 کے درمیان گوری کنڈ کے قریب گر کر تباہ ہوگیا ہے۔ وزارت نے کہا کہ ابتدائی تحقیقات کے مطابق حادثے کی ممکنہ وجہ کنٹرولڈ فلائٹ ان ٹیرین (سی ایف آئی ٹی) ہو سکتی ہے۔ تاہم ایئر کرافٹ ایکسیڈنٹ انویسٹی گیشن بیورو (AAIB) کی طرف سے تفصیلی تحقیقات کے ذریعے اصل وجہ کا تعین کیا جائے گا۔

بھارت ایکسپریس اردو