Delcy Rodriguez, PM Narendra Modi hold bilateral talks: پی ایم مودی اور ڈیلسی روڈریگز کے درمیان اہم ملاقات، اقتصادی و تکنیکی شراکت داری پر تفصیلی بات چیت

نئی دہلی: بھارت کے وزیر اعظم نریندر مودی اور وینزویلا کی قائم مقام صدر ڈیلسی روڈریگز کے درمیان ایک اہم اور وسیع ملاقات ہوئی، جس میں دونوں ممالک کے درمیان اقتصادی، تکنیکی اور اسٹریٹجک شراکت داری کو مزید مضبوط بنانے پر تفصیلی تبادلہ خیال کیا گیا۔ یہ ملاقات نئی دہلی میں اس وقت ہوئی جب وینزویلا کی قائم مقام صدر پانچ روزہ سرکاری دورے پر بھارت میں موجود ہیں۔بھارتی وزارتِ خارجہ کے مطابق اس ملاقات میں دونوں لیڈروں نے دو طرفہ تعلقات کے تمام پہلوؤں کا جائزہ لیا اور مختلف شعبوں میں تعاون بڑھانے پر اتفاق کیا۔ وزارت خارجہ کے ترجمان رندھیر جیسوال نے سوشل میڈیا پلیٹ فارم “ایکس” پر بتایا کہ ملاقات انتہائی تعمیری اور مثبت ماحول میں ہوئی، جس میں توانائی کی سلامتی، تجارت، سرمایہ کاری، صحت کے شعبے اور آٹو موبائل صنعت جیسے اہم موضوعات زیر بحث آئے۔

گفتگو کے دوران دونوں ممالک نے اس بات پر زور دیا کہ اقتصادی اور تکنیکی شراکت داری کو نئی سمت دی جائے تاکہ نہ صرف دو طرفہ تعلقات مضبوط ہوں بلکہ دونوں ممالک کو طویل المدتی فوائد بھی حاصل ہوں۔ ذرائع کے مطابق ملاقات میں توانائی کے شعبے میں تعاون کو خاص اہمیت دی گئی کیونکہ وینیزویلا تیل کی دولت سے مالا مال ملک ہے جبکہ بھارت اپنی بڑھتی ہوئی توانائی ضروریات کے لیے متبادل اور مستحکم ذرائع کی تلاش میں ہے۔وزارت خارجہ کے بیان کے مطابق ملاقات میں عالمی اور علاقائی امور پر بھی تبادلہ خیال کیا گیا۔ دونوں لیڈروں نے اس بات پر اتفاق کیا کہ بدلتے ہوئے عالمی حالات میں ترقی پذیر ممالک کے درمیان تعاون کو مزید فروغ دینا ضروری ہے تاکہ وہ اپنے مشترکہ مفادات کا بہتر تحفظ کر سکیں۔

اس ملاقات میں “گلوبل ساؤتھ” کے ممالک کے کردار کو بھی خصوصی طور پر اجاگر کیا گیا۔ دونوں فریقین نے اس بات پر زور دیا کہ ترقی پذیر ممالک کو اقتصادی استحکام، توانائی کے تحفظ اور ترقیاتی اہداف کے حصول کے لیے ایک دوسرے کے ساتھ مل کر کام کرنا چاہیے تاکہ عالمی سطح پر ان کی آواز مزید مؤثر ہو سکے۔اس سے قبل ڈیلسی روڈریگز نے بھارت کے وزیر خارجہ ایس جے شنکر سے بھی ملاقات کی تھی۔ ملاقات کے بعد جے شنکر نے “ایکس” پر اپنے بیان میں کہا کہ وہ ڈیلسی روڈریگز سے مل کر خوش ہیں اور بھارت-وینیزویلا تعلقات کو مضبوط بنانے میں ان کے دیرینہ کردار کو قدر کی نگاہ سے دیکھتے ہیں۔ڈیلسی روڈریگز بدھ کے روز اپنے پانچ روزہ دورے پر نئی دہلی پہنچی تھیں۔ بھارتی وزارتِ خارجہ نے ان کے دورے کا خیرمقدم کرتے ہوئے کہا تھا کہ یہ دورہ دونوں ممالک کے درمیان تعلقات کو مزید مستحکم بنانے اور نئی شراکت داریوں کے دروازے کھولنے میں اہم کردار ادا کرے گا۔بھارت اور وینزویلا کے درمیان توانائی اور سرمایہ کاری کے شعبوں میں طویل عرصے سے تعاون جاری ہے، اور دونوں ممالک مستقبل میں اس شراکت داری کو مزید وسعت دینے کے امکانات پر کام کر رہے ہیں۔

بھارت ایکسپریس اردو