PM Modi attends Maldives’ 60th Independence Day: وزیر اعظم مودی نے بطور ’’مہمان خصوصی‘‘ مالدیپ کے 60ویں جشنِ یومِ آزادی میں کی شرکت، مالدیپ کے لوگوں کی پیش کیں نیک خواہشات

وزیر اعظم نریندر مودی نے ہفتہ کو مالے کے ریپبلک اسکوائر پر مالدیپ کے 60ویں یوم آزادی کی تقریبات میں شرکت کی، جہاں انھیں ’’گیسٹ آف آنر‘‘ کے طور پر نوازا گیا۔ اس موقع پر مالدیپ کے صدر محمد معیزو بھی موجود تھے۔ پی ایم مودی نے اس موقع کی تصاویر سوشل میڈیا پر شیئر کرتے ہوئے دونوں ممالک کے تعلقات پر بھی روشنی ڈالی۔

سوشل میڈیا پلیٹ فارم ’ایکس‘ پر ایک پوسٹ میں پی ایم مودی نے لکھا کہ ’’مالدیپ کے 60ویں یوم آزادی کی تقریبات میں شرکت کرنا اعزاز کی بات تھی۔ اس اہم موقع نے مالدیپ کے لوگوں کے بھرپور ثقافتی ورثے اور متحرک جذبے کی نمائش کی۔ اس نے گزشتہ برسوں میں ملک کی تبدیلی کے سفر کی بھی نشان دہی کی۔ اپنی قدیم سمندری روایات سے لے کر موسمیاتی تبدیلی جیسے اہم شعبوں میں عالمی قیادت تک، مالدیپ نے عالمی سطح پر اپنے لیے ایک منفرد مقام بنایا ہے۔ مالدیپ کے عظیم لوگوں کے لیے میری نیک خواہشات۔‘‘

پی ایم مودی نے مزید لکھا کہ ’’ہندوستان اور مالدیپ باہمی احترام، مشترکہ اقدار اور ثقافتی اور اقتصادی تبادلوں کی ایک طویل تاریخ پر مبنی گہری جڑوں والی شراکت داری کا اشتراک کرتے ہیں۔ ہمارے تعلقات میں مسلسل اضافہ ہوتا جا رہا ہے، جس کی تشکیل مختلف شعبوں میں لوگوں کے درمیان تعلقات اور تعاون سے ہوتی ہے۔ ہندوستان مالدیپ کے لوگوں کی امنگوں کی حمایت کرنے اور ہمارے سیارے کی بہتری کے لیے مل کر کام کرنے کے لیے پرعزم ہے۔‘‘

 دریں اثنا وزارت خارجہ کے سرکاری ترجمان رندھیر جیسوال نے بتایا کہ ’’وزیراعظم نریندر مودی نے آج مالے میں مختلف سیاسی پارٹیوں کے لیڈروں سے بات چیت کی۔ انھوں نے مالدیپ کے یوم آزادی کے موقع پر اپنی نیک خواہشات کا اظہار کیا۔‘‘ انھوں نے مزید کہا کہ ’’دونوں فریقوں نے ہندوستان اور مالدیپ کے لوگوں کے درمیان مضبوط تعلقات کو قدر کی نگاہ سے دیکھتے ہوئے اپنے عزم کا اعادہ کیا۔ وہیں مالدیپ کے لیڈران نے مالدیپ کے لوگوں کی فلاح و بہبود کے لیے ہندوستان کی مسلسل حمایت کے لیے وزیراعظم کا شکریہ ادا کیا۔‘‘

بھارت ایکسپریس اردو