Kashi in Rome: ’’روم میں کاشی کی جھلک‘‘، وزیراعظم نریندر مودی نے کی اطالوی مصور جیامپاؤلو توماسیٹی کے فن کی تعریف

روم: وزیراعظم نریندر مودی نے اپنے سرکاری دورۂ اٹلی کے دوران اطالوی مصور جیامپاؤلو توماسیٹی کی ہندوستانی تہذیب اور ثقافت سے وابستگی کی بھرپور تعریف کی۔ توماسیٹی نے وزیراعظم مودی کو وارانسی یعنی کاشی کی ایک دلکش پینٹنگ تحفے میں پیش کی، جسے ہندوستان اور اٹلی کی ثقافتوں کے درمیان ایک خوبصورت فنکارانہ پل قرار دیا جا رہا ہے۔ وزیراعظم مودی نے سوشل میڈیا پلیٹ فارم ایکس پر پوسٹ کرتے ہوئے لکھا: ’’روم میں کاشی کی ایک جھلک! اطالوی مصور جیامپاؤلو توماسیٹی نے مجھے وارانسی پر مبنی اپنی تخلیق پیش کی۔‘‘ انہوں نے کہا کہ توماسیٹی کی ہندوستانی ثقافت سے دلچسپی چار دہائیوں سے زیادہ پرانی ہے۔ مودی کے مطابق 1980 کی دہائی میں توماسیٹی نے ویدک ثقافت پر مبنی کتابوں کے لیے مصوری کا کام شروع کیا تھا، جبکہ 2008 سے 2013 کے درمیان انہوں نے مہابھارت سے متعلق 23 بڑی پینٹنگز تیار کیں۔

میلونی کے ساتھ عشائیہ اور کولوزیم کا دورہ

نریندر مودی منگل کے روز اپنے پانچ ملکی دورے کے آخری مرحلے میں روم پہنچے تھے، جہاں انہوں نے اطالوی وزیراعظم جارجیا میلونی سے عشائیے پر ملاقات کی۔ اس کے بعد دونوں رہنماؤں نے تاریخی کولوزیم کا دورہ کیا اور مختلف عالمی و دوطرفہ امور پر تبادلۂ خیال کیا۔  مودی نے ایکس پر لکھا کہ دونوں رہنماؤں کے درمیان کئی اہم موضوعات پر گفتگو ہوئی اور بھارت-اٹلی دوستی کو مزید مضبوط بنانے پر بات چیت جاری رہے گی۔

اطالوی دارالحکومت میں بھارتی برادری کا پرتپاک استقبال

اطالوی وزیراعظم جارجیا میلونی نے بھی وزیراعظم مودی کے استقبال میں ایکس پر ایک تصویر شیئر کرتے ہوئے لکھا: ’’روم میں خوش آمدید، میرے دوست!‘‘ ادھر روم پہنچنے پر بھارتی برادری نے بھی وزیر اعظم مودی کا پرتپاک استقبال کیا۔ مودی نے اٹلی میں مقیم ہندوستانی برادری کا شکریہ ادا کرتے ہوئے کہا کہ ان کی حب الوطنی اور بھارت-اٹلی تعلقات کو مضبوط بنانے کی کوششیں قابل ستائش ہیں۔ انہوں نے کہا کہ دنیا بھر میں بھارتی تارکین وطن ملک کا نام روشن کر رہے ہیں۔ وزیر اعظم مودی کا یہ دورہ ایسے وقت میں ہو رہا ہے جب بھارت اور اٹلی کے تعلقات تیزی سے مضبوط ہو رہے ہیں۔ دونوں ممالک 2025-2029 کے مشترکہ اسٹریٹجک ایکشن پلان کے تحت تجارت، سرمایہ کاری، دفاع، صاف توانائی، سائنس و ٹیکنالوجی اور عوامی روابط سمیت کئی شعبوں میں تعاون کو وسعت دے رہے ہیں۔

بھارت ایکسپریس اردو۔