PM Modi Announces Compensation Package for Victims of Jaisalmer Bus Tragedy : بس میں آگ لگنے سے 20 مسافروں کی موت، وزیر اعظم نریندر مودی نے کیا معاوضے کا اعلان

راجستھان کے جیسلمیر ضلع میں منگل کو ایک خوفناک حادثہ پیش آیا۔ سہ پہر تین بجے کے قریب، جیسلمیر-جودھ پور ہائی وے پر ایک پرائیویٹ بس میں اچانک آگ لگ گئی، جس میں کم از کم 20 افراد ہلاک اور 16 دیگر شدید زخمی ہو گئے۔ بس 57 مسافروں کو لے کر جودھ پور جارہی تھی۔

ابتدائی تفتیش میں چونکا دینے والے انکشافات

حادثے کی ابتدائی تحقیقات میں چونکا دینے والا انکشاف ہوا ہے۔ پولیس اس امکان کی تحقیقات کر رہی ہے کہ بس میں آگ پٹاخوں کے پھٹنے سے لگی۔ راجستھان حکومت کے وزیر گجیندر سنگھ کھمسر نے کہا کہ انہوں نے اپنی زندگی میں اتنا خوفناک حادثہ کبھی نہیں دیکھا۔ ان کا کہنا تھا کہ بس میں دھماکہ ہوا اور ایف ایس ایل ٹیم تحقیقات کرے گی۔ وزیر نے جائے وقوعہ کا معائنہ کیا اور بتایا کہ کچھ مسافر پٹاخے لے کر سفر کر رہے تھے جس سے آگ پھیل گئی اور بس کے اندر زور دار دھماکہ ہوا۔ بس مکمل طور پر آگ کی لپیٹ میں آگئی اور اندر موجود تمام سامان جل کر خاکستر ہوگیا۔

جیسلمیر پولیس کا کیا کہنا ہے؟

جیسلمیر پولیس کے مطابق، جیسے ہی بس ہائی وے پر آئی، ڈرائیور نے پیچھے سے دھواں اٹھتے دیکھا۔ اس نے بس کو روکنے کی کوشش کی لیکن آگ اتنی شدید تھی کہ چند منٹوں میں ہی شعلوں کی لپیٹ میں آگئی۔ مقامی، راہگیر اور فوج کے جوانوں نے مل کر امدادی سرگرمیاں شروع کی۔ زخمیوں کو پہلے جیسلمیر کے جواہر اسپتال اور پھر تشویشناک حالت میں جودھپور منتقل کیا گیا۔

بی جے پی ایم ایل اے نے کیا کہا؟

بی جے پی ایم ایل اے پرتاپ پوری نے بتایا کہ بس میں 19 افراد زندہ جل گئے اور ایک مسافر اسپتال لے جاتے ہوئے دم توڑ دیا تھا۔ لاشیں اتنی بری طرح جھلس چکی تھیں کہ شناخت ڈی این اے ٹیسٹ سے ہی ممکن ہے۔ ضلعی انتظامیہ نے ڈی این اے کی کارروائی شروع کر دی ہے۔

کلکٹر نے دیے ہدایات

کلکٹر پرتاپ سنگھ نے افسران کو زخمیوں کو فوری طبی امداد فراہم کرنے اور اہل خانہ کی مدد کے لیے ہیلپ لائن نمبر جاری کرنے کی ہدایت دی ہے۔

متاثرین کے لواحقین کو ریلیف

وزیر اعظم نریندر مودی نے مرنے والوں کے لواحقین کو 2 لاکھ روپے اور زخمیوں کو 50 ہزار روپے کی مالی امداد کا اعلان کیا ہے۔ صدر دروپدی مرمو اور نائب صدر سی پی۔ رادھا کرشنن نے بھی حادثے پر افسوس کا اظہار کیا۔

وزیراعلیٰ نے افسران کو دی ہدایات

راجستھان کے وزیر اعلیٰ بھجن لال شرما زخمیوں کی خیریت دریافت کرنے کے لیے فوری طور پر جیسلمیر پہنچے اور حکام کو متاثرہ خاندانوں کو ہر ممکن مدد فراہم کرنے کی ہدایت کی۔ انہوں نے سوشل میڈیا پر لکھا، “یہ واقعہ انتہائی افسوسناک ہے۔ میری تعزیت جاں بحق ہونے والوں کے اہل خانہ کے ساتھ ہے۔“

–بھارت ایکسپریس اردو