PM Modi accuses Congress-SP: ’’جیور پروجیکٹ 2004 سے 2014 تک فائلوں میں دبا رہا‘‘ وزیراعظم مودی نے کانگریس اور سماجوادی پارٹی کو بنایا نشانہ

وزیراعظم نریندر مودی نے نوئیڈا انٹرنیشنل ایئرپورٹ منصوبے میں تاخیر کے لیے کانگریس اور سماجوادی پارٹی کو ذمہ دار ٹھہراتے ہوئے کہا کہ یہ پروجیکٹ 2004 سے 2014 تک ’’فائلوں میں دبا‘‘ رہا۔ انہوں نے موجودہ حکومت کے تحت اتر پردیش کو ترقی کا نیا مرکز قرار دیا۔ وزیراعظم مودی نے کہا کہ سماجوادی پارٹی نے نوئیڈا کو ’’لوٹ کا اے ٹی ایم‘‘ بنا دیا تھا، لیکن اب بی جے پی حکومت میں اتر پردیش ترقی کے انجن میں تبدیل ہو رہا ہے۔ انہوں نے کہا کہ یہ تبدیلی ’’ڈبل انجن حکومت‘‘ کی وجہ سے ممکن ہوئی ہے۔

ایئرپورٹ منصوبے میں تاخیر کا الزام

وزیراعظم مودی نے انڈین نیشنل کانگریس اور سماجوادی پارٹی کو تنقید کا نشانہ بناتے ہوئے کہا کہ مرکز اور ریاست کی سابقہ حکومتوں نے ایئرپورٹ کے قیام کی اجازت تک نہیں دی۔ انہوں نے کہا: ’’2004 سے 2014 تک یہ منصوبہ فائلوں میں دبا رہا۔ جیسے ہی بی جے پی-این ڈی اے حکومت آئی، اس کی بنیاد رکھی گئی اور آج اس کا افتتاح ہو رہا ہے۔‘‘ وزیراعظم نے نوئیڈا انٹرنیشنل ایئرپورٹ کے پہلے مرحلے کا افتتاح کیا، جو تقریباً 11,200 کروڑ روپے کی لاگت سے پبلک پرائیویٹ پارٹنرشپ (PPP) ماڈل کے تحت تیار کیا گیا ہے۔ انہوں نے کہا کہ دادری میں ملک کے دو بڑے فریٹ کوریڈورز کا ملاپ اس خطے کی رابطہ کاری کو مزید مضبوط بنا رہا ہے۔

’آتم نربھر بھارت‘ میں نوئیڈا کا کردار

مودی نے کہا کہ سیمی کنڈکٹر فیکٹری، میرٹھ میٹرو اور نمو بھارت ٹرین جیسے منصوبے بھارت کو تکنیکی طور پر خود کفیل بنانے میں مدد دے رہے ہیں۔ انہوں نے کہا کہ جےور ایئرپورٹ پورے شمالی بھارت کو دنیا سے جوڑنے میں اہم کردار ادا کرے گا۔ وزیراعظم نے کہا کہ ماضی میں نوئیڈا کو توہمات اور سیاسی خوف کی وجہ سے نظر انداز کیا گیا۔ انہوں نے ایک واقعہ بیان کرتے ہوئے کہا کہ جب وہ نوئیڈا آنے والے تھے تو اس وقت کے وزیر اعلیٰ خوف کی وجہ سے تقریب میں شریک نہیں ہوئے، اور انہیں بھی آنے سے روکا گیا تھا۔

ہوائی رابطے میں تیزی سے اضافہ

وزیراعظم مودی نے کہا کہ 2014 سے پہلے ملک میں صرف 74 ہوائی اڈے تھے، جبکہ اب ان کی تعداد 160 سے تجاوز کر چکی ہے۔ انہوں نے کہا کہ اب فضائی سفر بڑے شہروں کے ساتھ ساتھ چھوٹے شہروں تک بھی پہنچ رہا ہے۔ وزیراعظم نے بتایا کہ اڑان اسکیم کے تحت گزشتہ برسوں میں 1.60 کروڑ سے زائد شہری سستے داموں ہوائی سفر کر چکے ہیں۔ انہوں نے کہا کہ اس اسکیم کی توسیع کے لیے تقریباً 29,000 کروڑ روپے کی منظوری دی گئی ہے، جس کے تحت چھوٹے شہروں میں 100 نئے ایئرپورٹس اور 200 ہیلی پیڈز بنانے کا منصوبہ ہے۔

بھارت ایکسپریس اردو۔