Akhilesh Yadav criticized government: آپریشن سندور کے بعد سیزفائرمرکزی حکومت کی ناکامی کی علامت، اکھلیش یادو کی پارلیمنٹ میں سخت تنقید

نئی دہلی: سماجوادی پارٹی کے صدر اور رکن پارلیمنٹ اکھلیش یادو نے لوک سبھا میں ’آپریشن سندور‘ پر جاری بحث کے دوران حکومت پر شدید حملہ کرتے ہوئے کہا کہ اس آپریشن  کے بعد سیزفائر کا ہونا ہی حکومت کی سب سے بڑی ناکامی ہے۔ ان کے مطابق، اگر آج ایوان میں آپریشن پر بحث ہو رہی ہے تو یہ اس بات کا ثبوت ہے کہ حکومت اپنے بنیادی فرائض ادا کرنے میں ناکام رہی ہے۔

یہ آپریشن نہیں، حکمت عملی کی شکست ہے

اکھلیش یادو نے کہا کہ اگر ہم اور آپ یہاں بیٹھ کر ایک فوجی کارروائی پر بحث کر رہے ہیں، تو یہ اس بات کی علامت ہے کہ حکومت اپنی حفاظتی ذمہ داریاں نبھانے میں ناکام رہی۔ یہ صرف ایک آپریشن نہیں، بلکہ قومی سلامتی کی حکمت عملی کی ناکامی ہے۔

حکومت پر سیاسی فائدہ اٹھانے کا الزام

سماجوادی پارٹی لیڈر نے الزام لگایا کہ حکومت اس حساس موضوع کو سیاسی فائدہ کے لیے استعمال کر رہی ہے۔ انہوں نے کہا کہ بی جے پی کے سوشل میڈیا ہینڈلز سے جاری کیے گئے کرتوس اور کارٹون اس کی سنجیدگی پر سوال کھڑے کرتے ہیں۔ اکھلیش نے طنزیہ انداز میں کہا کہ جب بیرونی طاقتیں کہہ رہی ہیں کہ جنگ بندی ہماری وجہ سے ممکن ہوئی، اور حکومت خاموش ہے، تو یہ ہندوستان کی خودمختاری اور غیرجانبداری پر بڑا سوال ہے۔

حکومت واضح کرے، ملک کا اصل رقبہ کیا ہے؟

اکھلیش یادو نے کہا کہ حکومت کو پارلیمنٹ میں کھل کر یہ بیان دینا چاہیے کہ آج ملک کا اصل زمینی دائرہ کیا ہے؟ پی او کے پر قبضہ کرنے کی باتیں ہو رہی ہیں، مگر حقیقت میں کہاں کھڑے ہیں؟ انہوں نے سوال اٹھایا کہ پاکستان کے پیچھے آخر کون سی عالمی طاقتیں کھڑی ہیں جو اسے بار بار اتنا حوصلہ دیتی ہیں؟ ان کا کہنا تھا کہ حکومت کو صرف فوجی بیانات نہیں بلکہ سفارتی سچائی بھی سامنے رکھنی چاہیے۔

چین سے خطرہ اور متضاد اقتصادی پالیسی

اکھلیش نے حکومت کی خارجہ پالیسی پر بھی سوال اٹھاتے ہوئے کہا کہ ہمیں چین سے بھی اتنا ہی خطرہ ہے جتنا دہشت گردی سے، لیکن حکومت کی معاشی پالیسییں چین کی تجارت کو فروغ دے رہی ہیں، جس سے دشمن کو فائدہ ہو رہا ہے۔ یہ کیسی دوہری پالیسی ہے؟ انہوں نے کہا کہ یہ وقت ہے کہ حکومت اپنی سیاسی، اقتصادی اور خارجہ حکمت عملی پر از سر نو غور کرے اور پارلیمنٹ و عوام کے سامنے سچائی رکھے۔

اکھلیش یادو کی تقریر کے اہم نکات

*  ہمارے پڑوسی ممالک آج ہندوستان کے ساتھ نہیں کھڑے ہیں، یہ ہماری خارجہ پالیسی کی ناکامی ہے۔

*  یہ خارجہ پالیسی کا بحران ہے، جس میں ہندوستان کی کمزور پوزیشن ابھر کر سامنے آئی ہے۔

*  کیا ہماری سفارتی دوڑ دھوپ ہماری کمزوریوں کو اجاگر نہیں کر رہی؟

چین سے خطرہ اور ہوشیار رہنے کی تنبیہ

*  چین سے ہمیں دہشت گردی کے برابر خطرہ ہے۔ وہ صرف ہماری زمین ہی نہیں بلکہ ہمارا بازار بھی چھین رہا ہے۔

*  حکومت کو سمجھنا چاہیے کہ ’آتم نربھر بھارت‘ (خود انحصاری) کے نعرے کے پیچھے کہیں چند تاجروں کو فائدہ تو نہیں پہنچایا جا رہا؟

*  یاد رکھیں، “چین ایک دیو ہے” — وہ ہماری زمین اور بازار دونوں ہڑپ لے گا۔

دفاعی بجٹ اور فوجی تیاریوں پر زور

*  ہماری دفاعی صلاحیت بڑھانے کے لیے جی ڈی پی کا 3 فیصد بجٹ دفاع کے لیے مختص کیا جانا چاہیے۔

*  صرف ’ڈیفنس ایکسپو‘ کے ذریعے سرمایہ کاری کی دعوت دینا کافی نہیں، ہمیں دفاعی پیداوار میں خود کفیل ہونا پڑے گا۔

پلوامہ حملہ اور خفیہ ایجنسی کی ناکامی پر سوال

*  پلوامہ میں جو RDX سے بھری گاڑی استعمال ہوئی، آج تک وہ گاڑی ملی کیوں نہیں؟

*  اگر حکومت کی تکنیکی صلاحیت اتنی مضبوط ہے تو وہ گاڑی سیٹلائٹ امیجنگ سے کیوں نہیں ڈھونڈی گئی؟

*  سیزفائر کے بعد بھی پاکستان سے ڈرون آ رہے تھے، حکومت کو یہ تسلیم کرنا ہوگا۔

*  انٹلیجنس کی ناکامی کی ذمہ داری کون لے گا؟

سیاسی فائدہ اور فوج کے استعمال پر تنقید

میں فوج کو سلام پیش کرتا ہوں، دہشت گرد مارے جاتے ہیں، ہم سب اس کے حق میں ہیں، لیکن ہر واقعہ کے بعد سیاسی فائدہ کون اٹھاتا ہے؟ آخر دہشت گردوں کا انکاؤنٹر ہمیشہ الیکشن کے قریب ہی کیوں ہوتا ہے؟

ایئر فورس اور سڑکوں پر فخر

ہم سماجوادیوں نے وہ سڑکیں بنائیں جن پر ایمرجنسی کے دوران ایئرکرافٹ اتارے جا سکتے ہیں۔ جس سڑک پر وزیر اعظم ہرکیولیس طیارے سے اترے تھے، وہ سماجوادی حکومت میں تعمیر ہوئی تھی۔

سیزفائر اور بیرونی دباؤ

*  سیزفائر کس کے دباؤ میں کیا گیا؟

*  پی او کے اور اکسائی چن کو 6 ماہ میں واپس لینے کے جو دعوے کیے گئے تھے، ان کا کیا ہوا؟

*  2014 میں ہندوستان کا رقبہ کیا تھا اور آج کیا ہے؟

اکھلیش یادو نے کہا کہ ہم جنگ کے خلاف ہیں لیکن ملک کی سرحد اور خودمختاری پر کوئی سمجھوتہ نہیں ہونا چاہیے۔ چین اور پاکستان دونوں سے ہمیں چوکنا رہنے کی ضرورت ہے۔ انہوں نے حکومت سے مطالبہ کیا کہ وہ صرف بیانات اور دعووں سے آگے بڑھے اور حقیقی دفاعی، اقتصادی اور خارجہ پالیسی پر ازسر نو غور کرے۔

بھارت ایکسپریس اردو۔