Amanatullah Khan appeals to the public Donation: امانت اللہ خان نے عوام سے مانگا تعاون، انتخابی اخراجات کے لئے لوگوں سے کی یہ بڑی اپیل

نئی دہلی: دارالحکومت دہلی کے اوکھلا اسمبلی حلقہ کے موجودہ ایم ایل اے اورعام آدمی پارٹی کے امیدوارامانت اللہ خان نے عوام سے تعاون کی اپیل کی ہے۔ انہوں نے آج سوشل میڈیا پر اپنا ایک پوسٹ ڈال کر بینک اکاؤنٹ کی تفصیلات طلب کی ہیں اور عوام سے تعاون کرنے کی اپیل کی ہے۔ انہوں نے جامعہ کوآپریٹیوبینک کا اپنا اکاؤنٹ نمبرشیئر کیا اور یوپی آئی نمبر بھی شیئرکیا ہے تاکہ بڑی تعداد میں لوگ ان کا تعاون کرسکیں۔ آپ کو بتا دیں کہ امانت اللہ خان عام آدمی پارٹی کے ٹکٹ پر تیسری بار اوکھلا سے قسمت آزما  رہے ہیں۔

امانت اللہ خان نے اس سے پہلے آج اوکھلا اسمبلی حلقہ کے مدن پور کھادر کے بھنگڑ محلہ میں جاکرعوام سے ملاقات کی۔ انہوں نے عوامی رابطہ مہم کے دوران عام آدمی پارٹی کی پالیسیوں کو شمار کراتے ہوئے کہا کہ پورے اسمبلی حلقہ میں جس طرح سے مجھے عوام کی حمایت مل رہی ہے، اس سے واضح ہے کہ عوام ایک بار پھر عام آدمی پارٹی کی حکومت بنانے جا رہی ہے۔ انہوں نے کہا کہ عام آدمی پارٹی نے غریبوں اور متوسط طبقے کا پورا خیال رکھا ہے اور سبھی کو بجلی پانی مفت دینے کا کام کیا ہے۔ امانت اللہ خان نے اپنی کارکردگی پر تفصیلی روشنی ڈالتے ہوئے کہا کہ ذاکر نگر، بٹلہ ہاؤس سے لے کر مدن پور کھادر، سریتا وہاراورجسولہ تک ہم نے ترقیاتی کام کرائے ہیں۔

امانت اللہ خان نے کہا کہ دوسری پارٹیوں کے امیدوارکو پورے اسمبلی حلقہ میں ووٹ نہیں مل رہا ہے بلکہ بی جے پی، کانگریس اور اے آئی ایم آئی ایم کے امیدوار ڈھائی وارڈ میں الیکشن لڑرہے ہیں۔ انہوں نے کہا کہ بی جے پی نے مسلم ووٹوں کی تقسیم کا فارمولہ تیارکیا ہے تاکہ وہ اس بار اوکھلا سے کامیاب ہوجائے، لیکن اوکھلا کے ہندومسلم سب مل کربی جے پی اوردوسری پارٹیوں کو ان کے مقصد میں کامیاب نہیں ہونے دیں گے۔ امانت اللہ خان نے عوام سے مخاطب ہوکر کہا کہ مجھے یقین ہے کہ میں 2020 سے بھی زیادہ ووٹوں سے اس بار جیتوں گا کیونکہ لوگ ان سب کی ذہنیت کو سمجھ چکے ہیں۔