Delhi NCR Weather Today: دہلی میں شدید گرمی کی لہر برقرار، محکمہ موسمیات نے جمعہ تک یلو الرٹ کیا جاری

نئی دہلی :دارالحکومت دہلی سمیت ملک کے شمال مغربی علاقوں میں شدید گرمی سے فوری راحت ملنے کے آثار نظر نہیں آ رہے۔ جمعرات 23 اپریل کو بھی گرمی کی شدت برقرار رہنے کا امکان ہے، جس کے باعث عوام کے لیے دن کے اوقات میں باہر نکلنا مشکل ہو سکتا ہے۔ محکمہ موسمیات نے جمعہ تک یلو الرٹ جاری کر دیا ہے۔بھارتی محکمہ موسمیات (آئی ایم ڈی) کے مطابق ہریانہ، چندی گڑھ، دہلی، پنجاب، مشرقی راجستھان، چھتیس گڑھ، اتر پردیش، مدھیہ پردیش، جھارکھنڈ اور اڈیشہ میں 23 سے 25 اپریل کے دوران لو چلنے کا امکان ہے۔ شہریوں کو ہدایت دی گئی ہے کہ وہ احتیاط برتیں اور شدید ضرورت کے بغیر گھروں سے باہر نہ نکلیں، خاص طور پر دوپہر 12 سے شام 4 بجے کے درمیان بچوں اور بزرگوں کو باہر جانے سے گریز کرنے کا مشورہ دیا گیا ہے۔

بدھ 22 اپریل کو دہلی میں درجہ حرارت 42 ڈگری سیلسیس تک ریکارڈ کیا گیا تھا، جس کے بعد ہیٹ ویو کے پیش نظر یلو الرٹ جاری کیا گیا۔ آج بھی درجہ حرارت 41 سے 43 ڈگری سیلسیس کے درمیان رہنے کا امکان ہے، جبکہ کم سے کم درجہ حرارت 23 سے 25 ڈگری کے آس پاس رہ سکتا ہے۔ محکمہ موسمیات نے دہلی اور اس کے آس پاس کے علاقوں کے لیے آج بھی الرٹ برقرار رکھا ہے۔

یہ بھی پڑھیں: امریکہ نے ایران کے ساتھ جنگ بندی غیر معینہ مدت تک بڑھائی، بحری ناکہ بندی رہے گی جاری

یہ بھی پڑھیں:ممتا جیت گئیں تو بنگال الگ دیش بن جائے گا: بی جے پی لیڈر کا دعویٰ، ٹی ایم سی نے کہا- بے خوف ہوکر ووٹ ڈالیں ،بنگال کی 152 اور تمل ناڈو کی 234 نشستوں پر ووٹنگ

ماہرین کے مطابق درجہ حرارت میں اضافے کے باعث رات کے وقت بھی گرمی کم نہیں ہو رہی، جس سے شہریوں کو آرام میں دشواری کا سامنا ہے۔ شدید گرمی کے سبب اسپتالوں میں مریضوں کی تعداد بڑھنے کا خدشہ ظاہر کیا جا رہا ہے، خاص طور پر ہیٹ اسٹروک اور پانی کی کمی (ڈی ہائیڈریشن) کے کیسز میں اضافہ ہو سکتا ہے۔ڈاکٹروں نے عوام کو مشورہ دیا ہے کہ زیادہ سے زیادہ پانی پئیں، ہلکے اور ڈھیلے کپڑے پہنیں اور دھوپ میں نکلتے وقت سر کو ڈھانپ کر رکھیں تاکہ گرمی کے مضر اثرات سے بچا جا سکے۔

بھارت ایکسپریس اردو