Former MLA Mujahid Alam resigns from JDU: سابق رکن اسمبلی مجاہد عالم نے جے ڈی یو سے دیا استعفیٰ، وقف قانون پر کم نہیں ہو رہی ہے نتیش کمار کی پریشانی

ماسٹرمجاہد عالم نے پارٹی چھوڑنے کے بعد کشن گنج واقع اپنے جے ڈی یو دفتر سے وزیراعلیٰ نتیش کمار کے پوسٹر اور بینرہٹا دیئے۔ دفترمیں اب صرف مجاہد عالم کے ہی پوسٹر بینرلگے ہوئے ہیں۔ وہ موجودہ وقت میں کشن گنج جے ڈی یو کے ضلع صدر تھے اور 2024 لوک سبھا الیکشن 2024 میں پارٹی کے امیدوار بھی رہے تھے۔ لوک سبھا الیکشن میں وہ دوسرے نمبر پر رہے تھے اور انہیں کانگریس امیدوار ڈاکٹر محمد جاوید نے ہرا دیا تھا۔

وقف بل کی حمایت سے ناراض تھے مجاہد عالم

نتیش کمار کے ذریعہ وقف بل پر مرکز کی مودی حکومت کو حمایت دیئے جانے سے ماسٹر مجاہد عالم کافی وقت سے ناراض چل رہے تھے۔ انہوں نے اسے مسلمانوں کے مذہبی حقوق میں مداخلت قرار دیا۔ اسی وجہ سے انہوں نے جے ڈی یو کے سبھی عہدوں سے استعفیٰ دے دیا۔ استعفیٰ سے متعلق پریس کانفرنس کرتے ہوئے مجاہد عالم نے کہا کہ 15 سال جنتا دل یونائیٹیڈ (جے ڈی یو) میں رہنے کے بعد آج میں نے پارٹی سے باہر ہونے کا فیصلہ لیا ہے۔ انہوں نے مرکزی حکومت پر الزام لگاتے ہوئے وقف بل کو زمین پر قبضہ کرنے کی مرکزی حکومت کی سازش قرار دیا۔

کوچا دھامن سے دو بارایم ایل اے رہے ہیں مجاہد عالم

مجاہد عالم دو بار ضلع کے کوچا دھامن اسمبلی حلقہ سے رکن اسمبلی رہ چکے ہیں۔ وہیں گزشتہ لوک سبھا الیکشن میں انہیں پارٹی نے کشن گنج لوک سبھا حلقہ سے اپنا امیدوار بنایا تھا، لیکن انہیں ہارکا سامنا کرنا پڑا تھا۔ استعفیٰ کے اعلان کے بعد مجاہد عالم نے صحافیوں سے بات کرتے ہوئے کہا کہ انہوں نے 15 سالوں سے جے ڈی یو میں کارکن کے طورپر کام کیا اور پارٹی کو مضبوط بنانے کے ساتھ دو بار کوچادھامن اسمبلی حلقہ سے عوام نے اسمبلی میں بھیجنے کا کام کیا۔

وقف قانون سے متعلق کہی یہ بڑی بات

 انہوں نے کہا کہ ہم سبھی نتیش کمار کو سیکولراورترقی کا علمبردار کے ساتھ مسلمانوں کا ہمدرد سمجھتےتھے، لیکن انہوں نے وقف ترمیمی قانون کی حمایت کرکے ہم سبھی کو دھوکہ دینے کا کام کیا ہے۔ انہوں نے کہا کہ میں نے شروع سے وقف ترمیمی بل کی مخالفت کی تھی اور آگے بھی جاری رکھیں گے۔ صحافیوں کے ایک سوال کا جواب دیتے ہوئے کہا کہ ابھی کسی پارٹی میں جانے کا کوئی منصوبہ نہیں ہے۔ فی الحال اس قانون کی مخالفت کرنی ہے اور اپنے حامیوں کے ساتھ ہیں۔ انہوں نے کہا کہ سپریم کورٹ میں انہوں نے قانون کے خلاف عرضی داخل کی ہے اور انہیں سپریم کورٹ سے انصاف کی امید ہے۔

 بھارت ایکسپریس اردو