Viksit Bharat 2047: ’’بنیادی ڈھانچے کی مضبوطی سے ہی بھارت 2047 تک ترقی یافتہ ملک بن سکتا ہے‘‘ بھارت ایکسپریس کے میگا کانکلیو میں نتن گڈکری کا خطاب

نئی دہلی: سڑک ٹرانسپورٹ اور شاہراہوں کے مرکزی وزیر نتن گڈکری نے آج بھارت ایکسپریس نیوز نیٹ ورک کے میگا کانکلیو میں شرکت کی اور اپنے خیالات کا اظہار کیا۔ بھارت ایکسپریس نیٹ ورک کا یہ تیسرا یومِ تاسیس تھا جس کے مرکزی تھیم ’’وکست بھارت 2047: نئے بھارت کی بات‘‘ کے تحت پورے دن مختلف شعبہ ہائے زندگی کے افراد نے شرکت کی اور اپنے گراں قدر خدمات سے نوازا۔ سڑک ٹرانسپورٹ اور شاہراہوں کے مرکزی وزیر نتن گڈکری نے ملک کے بنیادی ڈھانچے، معیشت اور ترقی کے حوالے سے اپنے خیالات کا اظہار کیا۔ اس موقع پر انہوں نے کہا کہ اگر بھارت کو 2047 تک ایک ترقی یافتہ قوم بنانا ہے تو جدید انفراسٹرکچر، اختراع اور پائیدار ترقی پر توجہ دینا ضروری ہے۔

بنیادی ڈھانچہ ترقی کی بنیاد

نتن گڈکری نے اپنے خطاب میں کہا کہ ملک کی معاشی ترقی کا براہ راست تعلق سڑکوں، شاہراہوں اور ٹرانسپورٹ کے نظام سے ہے۔ انہوں نے کہا کہ بہتر سڑکیں اور جدید نقل و حمل نہ صرف صنعت و تجارت کو فروغ دیتے ہیں بلکہ روزگار کے مواقع بھی پیدا کرتے ہیں۔ انہوں نے اس بات پر زور دیا کہ آنے والے برسوں میں حکومت کا ہدف یہ ہے کہ ملک میں عالمی معیار کا سڑکوں اور ایکسپریس ویز کا نیٹ ورک قائم کیا جائے تاکہ سفر آسان ہو اور اقتصادی سرگرمیوں میں تیزی آئے۔ مرکزی وزیر نے کہا کہ حکومت ٹرانسپورٹ کے شعبے میں ماحول دوست ایندھن اور نئی ٹیکنالوجی کو فروغ دے رہی ہے۔ ان کے مطابق بایو فیول، الیکٹرک گاڑیاں اور متبادل توانائی کے ذرائع مستقبل میں آلودگی کم کرنے اور درآمدی ایندھن پر انحصار گھٹانے میں اہم کردار ادا کریں گے۔

وکست بھارت کے لیے مشترکہ کوششیں ضروری

گڈکری نے کہا کہ ترقی یافتہ بھارت کے خواب کو حقیقت بنانے کے لیے حکومت، صنعت اور نوجوانوں کو مل کر کام کرنا ہوگا۔ انہوں نے کہا کہ اختراع، سرمایہ کاری اور مضبوط پالیسیوں کے ذریعے بھارت کو عالمی معیشت میں ایک بڑی طاقت بنایا جا سکتا ہے۔ واضح رہے کہ بھارت ایکسپریس کے اس خصوصی کانکلیو میں متعدد مرکزی وزراء، سیاسی رہنما اور مختلف شعبوں سے تعلق رکھنے والی شخصیات شریک ہوئیں، جہاں ملک کے مستقبل اور ’’وکست بھارت 2047‘‘ کے وژن پر تبادلہ خیال کیا گیا۔

بھارت ایکسپریس اردو۔