Army Chief Warns: Next War Could Happen Soon: ’’دشمن کے ساتھ اگلی جنگ جلد ہو سکتی ہے‘‘، آرمی چیف جنرل اُپیندر دویوی نے کہا- ہمیں اس کے لیے تیاری کرنی ہوگی

ہندوستانی فوج کے سربراہ جنرل اُپیندر دویدی نے کہا ہے کہ ملک کو آئندہ کسی بھی وقت جنگ کا سامنا ہو سکتا ہے اور فوج کو ہر ممکنہ چیلنج کے لیے مکمل طور پر تیار رہنا ہوگا۔ وہ انڈین انسٹیٹیوٹ آف ٹیکنالوجی (IIT) مدراس میں فوجی تحقیقی مرکز ’’اگنی شودھ‘‘ (AgniShodh)–انڈین آرمی ریسرچ سیل (IARC) کے افتتاح کے موقع پر خطاب کر رہے تھے۔ جنرل دویدی نے کہا کہ ’’اگلی جنگ جلد ہو سکتی ہے اور ہمیں اس کے لیے متحد ہو کر تیاری کرنا ہوگی۔‘‘ ان کا یہ بیان ایک ایسے وقت میں سامنے آیا ہے جب حالیہ مہینوں میں ہندوستان کی مغربی سرحد پر پاکستان کے ساتھ کشیدگی بڑھتی جا رہی ہے۔

آپریشن سندور: جنگ کی نئی شکل

جنرل دویدی نے خصوصی طور پر حالیہ فوجی کارروائی ’’آپریشن سندور‘‘ کا ذکر کیا اور بتایا کہ اس میں حکومت نے فوج کو مکمل آزادی دی۔ انھوں نے اسے ایک ’’گرے زون آپریشن‘‘ قرار دیا، یعنی ایسا فوجی اقدام جو روایتی جنگ کے دائرے سے باہر ہو۔ انھوں نے کہا کہ ’’ہم دشمن کے خلاف شطرنج کا کھیل کھیل رہے تھے۔ نہ ہمیں معلوم تھا کہ ان کی اگلی چال کیا ہوگی اور نہ ہی پاکستان کو اندازہ تھا کہ ہم کیا کرنے جا رہے ہیں۔‘‘ انھوں نے مزید کہا کہ ہندوستانی فوج نے غیر متوقع، درست اور برق رفتار کارروائی کرتے ہوئے دشمن کو بھاری نقصان پہنچایا۔ جنرل دویدی کے مطابق یہ کامیابی فوج کی حکمتِ عملی، تکنیکی صلاحیت اور حکومت کی جانب سے دی گئی اسٹریٹجک آزادی کا نتیجہ تھی۔

غیر روایتی جنگوں کی تیاری ضروری

فوجی سربراہ نے زور دیا کہ مستقبل میں روایتی جنگوں کے ساتھ ساتھ ’’نان کنوینشنل وارفیئر‘‘ یعنی غیر روایتی جنگی چیلنجز کا سامنا بھی متوقع ہے۔ انھوں نے کہا کہ ہندوستان کو صرف سرحدی تنازعات ہی نہیں، بلکہ سائبر وار، معلوماتی جنگ اور دیگر جدید خطرات کا سامنا بھی ہے، جن کے لیے جدید ٹیکنالوجی اور سائنسی اشتراک ناگزیر ہے۔

بھارت ایکسپریس اردو