New Zealand PM Luxon thanks PM Modi: نیوزی لینڈ کے وزیر اعظم کرسٹوفر لکسن نے ادا کیا وزیر اعظم مودی کا شکریہ، دورۂ ہندوستان اور دونوں ممالک کے تعلقات کی مضبوطی پر خوشی کا اظہار

نیوزی لینڈ کے وزیر اعظم کرسٹوفر لکسن نے پیر کے روز نئی دہلی کے حیدرآباد ہاؤس میں وزیر اعظم نریندر مودی سے ملاقات کے بعد ان کا شکریہ ادا کیا۔ سوشل میڈیا پلیٹ فارم X پر وزیر اعظم مودی کے ساتھ اپنی تصویر شیئر کرتے ہوئے لکسن نے لکھا ’’اس ہفتے ہندوستان کا دورہ کرنا اور وزیر اعظم نریندر مودی کے ساتھ اپنے ممالک کے درمیان تعلقات کو مضبوط بنانے کے ذرائع پر بات کرتے ہوئے وقت گزارنا خوش گوار تھا۔

کرسٹوفر لکسن کا دورہ بھارت

واضح رہے کہ لکسن ہندوستان کے پانچ روزہ سرکاری دورے پر تھے۔ وہ رائسینا ڈائیلاگ کے 10ویں ایڈیشن کے مہمان خصوصی تھے اور انھوں نے کلیدی خطبہ بھی دیا۔ نیوزی لینڈ کے وزیر اعظم لکسن نے راشٹرپتی بھون میں صدر دروپدی مرمو سے بھی ملاقات کی۔ لکسن کا یہ دورہ ایسے وقت میں ہوا ہے جب ہندوستان اور نیوزی لینڈ کا مقصد دو طرفہ تعلقات کو بڑھانا ہے۔ دونوں رہنماؤں نے اقتصادی تعاون، تجارتی توسیع اور علاقائی سلامتی پر تبادلہ خیال کیا۔

بھارت-نیوزی لینڈ آزاد تجارتی معاہدہ

ہندوستان اور نیوزی لینڈ نے وزیر اعظم مودی اور لکسن کی ملاقات کے بعد آزاد تجارتی معاہدہ (FTA) کا آغاز کیا۔ وزیر اعظم لکسن نے لکھا ’’مجھے خوشی ہے کہ ایک جامع آزاد تجارتی معاہدے پر مذاکرات اب شروع ہو چکے ہیں۔ ہندوستان سب سے تیزی سے ترقی کرنے والی معیشتوں میں سے ایک ہے اور اگلے دس سالوں میں دنیا کا تیسری سب سے بڑی معیشت بننے کے راستے پر گامزن ہے۔ ہماری حکومت اپنی معیشت کو ترقی دینے پر پوری توجہ مرکوز کر رہی ہے تاکہ تمام کیوی بہتر کارکردگی کا مظاہرہ کر سکیں اور ہندوستان کے ساتھ مذاکرات کے آغاز نے نیوزی لینڈ کو ایسا ہی موقع فراہم کیا ہے۔‘‘

دفاعی تعاون پر بھی معاہدہ

ایف ٹی اے کے علاوہ ہندوستان اور نیوزی لینڈ نے ایک نیا دفاعی تعاون بھی شروع کیا ہے۔لکسن نے کہا ’’علاقائی سلامتی کے لیے بھی نیوزی لینڈ کے عزم کو تقویت ملی ہے، کیوں کہ نیوزی لینڈ اور ہندوستان نے ایک نئے دفاعی تعاون کے انتظامات کا اعلان کیا ہے۔‘‘ اس کے علاوہ پی ایم مودی کے ساتھ ملاقات کے دوران زیر بحث دیگر شعبوں کا بھی ذکر کرتے ہوئے انھوں نے کہا ’’اس کےعلاوہ میں نے اور ہمارے تجارتی وفد نے تعلیم، ٹیکنالوجی، سیاحت، سرمایہ کاری، مینوفیکچرنگ، خوراک اور بنیادی صنعتوں سمیت اہم شعبوں میں نیوزی لینڈ کی موجودگی کو بڑھانے پر توجہ مرکوز کی۔‘‘